საერთაშორისო ურთიერთობების ექსპერტი ირაკლი მენაღარიშვილი ,,გურია ნიუსთან“ საუბრისას აცხადებს, რომ საქართველო რუსეთის ხელისუფლებისგან რაიმე სიკეთეს არ უნდა ელოდოს. როგორც ექსპერტი გვეუბნება, რუსეთის დამპყრობლური პოლიტიკა საქართველოსთან მიმართებაში დღესაც უცვლელია და ის საკუთარი პოზიციების დათმობას არც ამჯერად აპირებს. მენაღარიშვილის განცხადებით, გასაკვირი არ არის, რომ ჟენევის მოლაპარაკებების 43-ე რაუნდი უშედეგოდ დასრულდა.
,,მოხდა ის, რაც მოსახდენი იყო. ჟენევის მოლაპარაკებები არ გახლავთ იზოლირებული მოვლენა, მასზე მოქმედებს ყველაფერი, რაც პოლიტიკურ და საერთაშორისო სივრცეში ხდება. ტენდენცია კი ამ სივრცეში დაძაბულობის გამწვავებისკენ არის მიმართული. რუსეთის დაპირისპირება ცივილიზებულ სამყაროსთან მხოლოდ გამწვავებას გამოიწვევს. ასე რომ, რაიმე სიკეთის მოლოდინი, სამწუხაროდ, ცოტა ხანი არ უნდა გვქონდეს.
პრემიერმა თქვა, რომ ჩვენი სურვილია, ჟენევა, რაც შეიძლება ეფექტური გახდეს და ამისთვის მზად ვართ გადავდგათ ყველა ნაბიჯი, რომელიც საქმეს წაადგება. ეს ნიშნავდა მოწოდებას, რომ მხარეებს ხელი შეეწყოთ ჟენევის მოლაპარაკების ფორმატი ეფექტურ ინსტრუმენტად გადაქცეულიყო, თუმცა, ამგვარ მოწოდებას მოჰყვა ის პასუხი, რაც მოჰყვა _ რუსეთი საკუთარ პოზიციაზე დარჩა.
განსაკუთრებული ოპტიმიზმი არ მაქვს, რომ ტატუნაშვილის მკვლელები დაისჯებიან, მაგრამ სამართლიანობის აღსადგენად ქართულმა მხარემ ყველაფერი უნდა გააკეთოს. არჩილ ტატუნაშვილის მკვლელები არიან ადამიანები, რომლებმაც საქართველოს ტერიტორიების დაკარგვაში დიდი წვლილი შეიტანეს, ამ ძალასთან ბრძოლა არც ისე მარტივი იქნება, მაგრამ საქართველომ ყველაფერი უნდა გააკეთოს მათ დასასჯელად. რუსეთი ამ პასუხისმგებლობას საკუთარ თავზე არ იღებს, რაც მის უპასუხისმგებლობაზე მეტყველებს.
სამწუხაროდ, რუსეთი კარგად ცნობილ ძველ თამაშს თამაშობს. იგი ცდილობს, 2008 წლის ომის შედეგებს როგორმე ლეგალური საფუძველი შეუქმნას, ანუ მიაღწიოს იმას, რომ საერთაშორისო თანამეგობრობა და მათ შორის, საქართველოც, შეურიგდნენ ოკუპაციას, რაც, რა თქმა უნდა, არ მოხდება“, _აღნიშნა მენაღარიშვილმა.
ცნობისთვის, ჟენევაში მოლაპარაკებების 43-ე რაუნდი გაიმართა. მასში მონაწილეობდნენ საქართველოს, რუსეთის, შეერთებული შტატების, ევროკავშირის, ოკუპირებული აფხაზეთისა და ოკუპირებული სამხრეთ ოსეთის დეფაქტო ხელისუფლების წარმომადგენლები.
