ოზურგეთის მუნიციპალიტეტის, სოფელ შემოქმედში 2017 წელს მშვიდობის კორპუსის წევრი, 24 წლის ათქა ბოლი ესტუმრა და ამავე სოფლის საჯარო სკოლაში დაიწყო მუშაობა. მისი მიზანი არის სკოლის მოსწავლეებმა უფრო მეტად ისწავლონ და დახვეწილად ისაუბრონ ინგლისურად.
ათქა ამერიკაში ნიუჰემში დედ-მამასთან, ორ დასთან და ძმასთან ერთად ცხოვრობს. ამ ეტაპზე ის სოფელ შემოქმედში კაპანაძეების ოჯახის სტუმარია.
“სოფელ შემოქმედში ყველაზე მეტად ადამიანები მომწონს და მიყვარს. ძალიან სტუმართმოყვარე არიან. ჩემი ოჯახის წევრები, რომლებთანც მიწევს ცხოვრება, ძალიან თბილები და ყურადღებიანები არიან“,_ გვიყვება ათქა.
მისივე თქმით, უკვე დაინტერესდა ქართული კულინარიით.
“შემოქმედში ბებოს დაბადების დღეზე გამოვაცხვე ტორტი. ასევე, ვიცი აჭარული ხაჭაპურის და ხინკალის გაკეთება. ძალიან რთულია ხინკლის გაკეთება, მაგრამ, სამაგიეროდ, გემრიელია. რთულია ქართული სამზარეული, რადგან ამერიკაში ყველაფერი გამზადებული იყიდება. აქ კი ყველაფერს შენ აკეთებ და იღებ მონაწილეობას კერძების მომზადებაში“, _ აღნიშნა ჩვენთან საუბრისას მშვიდობის კორპუსის წევრმა.
ინტერვიუ ათქა შემოქმედის საჯარო სკოლაში, ქართული ენისა და ლიტერატურის კაბინეტში ჩავწერეთ.
_ ათქა, რატომ გადაწყვიტეთ, რომ თქვენთვის უცნობ ქვეყანაში ჩამოსულიყავით?
_ მე ვარ მშვიდობის კორპუსის წარმომადგენელი. ძალიან ბედნიერი ვარ, რომ ჩამოვედი საქართველოში და მოვხვდი სოფელ შემოქმედში.
_ რა ინფორმაციას ფლობდით იმ სოფელზე, სადაც თქვენ უნდა იცხოვროთ წლების განმავლობაში?
_ მშვიდობის კორპუსის წარმომადგენელმა მომაწოდა ინფორმაცია სკოლის და ოჯახის შესახებ, სადაც მე ვიცხოვრებდი.
_ გაამართლა თქვენმა მოლოდინებმა?
_ ძალიან შემიყვარდა სოფელი შემოქმედი. ძალიან ლამაზი სოფელია.
_ როგორ შეაფასებდით შემოქმედის საჯარო სკოლის მოსწავლეებს, როგორ სწავლობენ?
_ მინდა გითხრათ, რომ მონდომებულები არიან ბავშვები ინგლისურის ენის სწავლით და ეს ძალიან მისასალმებელია.ბავშვებთან ერთად ყოველ თვე ვაკეთებ სხვადასხვა სახის ღონისძიებას. ამერიკის ისტორიის შესახებ ვუყვები მათ და მათგანაც ვისმენ საინტერესო ამბებს.
_ ათქა, საინტერესოა, რა მდგომარეობა ამერიკის სკოლებში. რა მეთოდებს იყენებენ იმისთვის, რომ სკოლაში სწავლა უსაფრთხო იყოს?
_ პრობლემები ამერიკაში სკოლებშიც არის, მაგრამ ყოველთვის ზრუნავს მთავრობა იმაზე, რომ მართვადი გახდეს და არანაირი გართულება არ მოყვეს.
_ კონკრეტულად რას აკეთებენ?
_ ყველგან ვიდეო თვალები არის დაყენებული და ამით ხდება ყოველდღე დაკვირება ბავშვებზე.
_ მანდატურები თუ არიან სკოლებში?
_ კი, არიან, მაგრამ სკოლის გარეთ აკვირდებიან ბავშვებს.
_ ფსიქოლოგები რამდენად არიან ჩართული სკოლაში?
_ მე თვითონ ფსიქოლოგი ვარ. ვაკვირდები ადამიანის თვისებებს, ემოციებს. სადაც მე ვსწავლობდი, იქ იყო და ძალიან კარგად მუშაობდა.
