ბოლო ორი კვირის განმავლობაში ჩატარებული სპეცოპერაციების შედეგად სამართალდამცველებმა დიდი რაოდენობით ნარკოტიკი ამოიღეს,-ამის შესახებ განცხადება შინაგან საქმეთა სამინისტროში გაკეთდა.
უწყების ინფორმაციით, დაკავებულია 13 პირი, აქედან 5 ნარკორეალიზატორი. კრიმინალური პოლიციის დეპარტამენტის ხელმძღვანელის მამუკა ჭელიძის ინფორმაციით, ნარკოდანაშაულისთვის დაკავებულთა შორის უცხო ქვეყნის მოქალაქეებიც არიან.
„რამდენიმე დღის წინ შს სამინისტროს თანამშრომლებმა 1974 წელს დაბადებული ყაზახეთის მოქალაქე თბილისის საერთაშორისო აეროპორტში იმ დროს დააკავეს, როდესაც ის ბრაზილიიდან დუბაის გავლით საქართველოში ჩამოფრინდა. პოლიციამ ხელბარგის ჩხრეკისას ერთი კილოგრამი ნარკოტიკი ამოიღო, დანაშაული 8-დან 20 წლამდე თავის აღკვეთას ითვალისწინებს“-განაცხადა5 ჭელიძემ.
მისივე თქმით, ამ საქმეზე გამოძიება დიდი ოდენობით ნარკოტიკული საშუალების უკანონო შეძენა შენახვის, გადაზიდვისა და საქართველოში უკანონოდ შემოტანის მუხლით მიმდინარეობს.
შსს-მ ასევე ნარკოდანაშაულისთვის დააკავა 1977 წელს დაბადებული გერმანიის მოქალაქე, რომლის საცხოვრებელი სახლის ჩხრეკისას ამოღებულია დიდი ოდენობით ნარკოტიკი.
“სამართალდამცველებმა, დაკავებულის დროებით საცხოვრებელ ბინაში არსებული სეიფიდან, 2644 აბი „ექსტაზი“, 323 აბი „სუბუტექსი“, 400 გრამი კოკაინი, დაახლოებით, 1 კილოგრამი „მდმა“ და 200 გრამი ამფეტამინის ჯგუფის ნარკოტიკი ამოიღეს.“-განაცხადა ჭელიძემ.
უწყების ცნობით, ბოლო ორი კვირის განმავლობაში თბილისში, ფონიჭალის დასახლებაში, აჭარაში, კახეთში, გურიაში, შიდა ქართლსა და სამეგრელოში ნარკოდანაშაულისთვის 13 პირი დავაკავეთ. დაკავებულთაგან – 5 ნარკორეალიზატორია.
“სულ ამოღებულია: 2750 აბი „ექსტაზი“, დაახლოებით, 1 კილოგრამი „მდმა“, 1 კილოგრამამდე ნარკოტიკული საშუალება კოკაინი, 530 აბი „სუბუტექსი“, 100 აბი „სუბოქსინი“, 200 გრამი ამფეტამინის ჯგუფის ნარკოტიკი, 13,6827 გრამი ჰეროინი, მეტადონის მარილის 94 აბი, 10 აბი „მეტადონი“, 5,1432 გრამი მეტამფეტამინის ფხვნილი, 3,5765 გრამი კოდეინის მარილი, 2,9731 გრამი მორფინის მარილი, 1,1514 გრამი „თებაინი“, 1 შეკვრად დაფასოებული ე.წ. „სირეცი“ და სხვა ნარკოტიკი”-განაცხადეს შსს-ში.
