“გურია ნიუსის” მიერ ექსკლუზიურად გასაჯაროებულ ინფორმაციას, რომლის თანახმადაც, ოზურგეთის მერი, კონსტანტინე შარაშენიძე ბიზნესმენ ზურაბ გობრონიძეზე ზეწოლას ახდენს და მას ბაზრის წართმევითაც დაემუქრა, ბევრი გამოხმაურება მოჰყვა.
“გურია ნიუსთან” არა, თუმცა, ტელეკომპანია “იმედთან” საუბრისას ოზურგეთის მერმა გობრონიძის მიერ გავრცელებული ინფორმაცია ნაწილობრივ დაადასტურა და აღნიშნა, რომ ბაზარი ხალხის იყო და ის ხალხს უნდა დაბრუნებოდა. ამავე დროს, შარაშენიძემ ხაზი გაუსვა იმას, რომ ზეწოლას ადგილი არ ჰქონია.
თავად გობრონიძემ ამ თემაზე გამოძიების დაწყების მოთხოვნით პროკურატურას მიმართა.
თემის შესწავლა დაიწყო ბიზნესომბუდსმენმა და როგორც “გურია ნიუსისთვის” ექსკლუზიურად გახდა ცნობილი, საკითხს ოზურგეთის მაჟორიტარი დეპუტატი არჩილ თალაკვაძეც აკვირდება:
_ პირად კონტროლზე მაქვს ეს საკითხი აყვანილი მას შემდეგ, რაც გასაჯაროვდა ინფორმაცია. ასევე, ჩემი ბიურო თვალს ადევნებს ამ საკითხის გარშემო განვითარებულ მოვლენებს. რაც შეეხება ბიზნესს, ცალსახად მინდა გითხრათ, რომ ბიზნესის თავისუფლება, ბიზნესის ხელშეუხებლობა არის ის წითელი ხაზი და საზღვარი, რომელიც დაადგინა ჩვენმა გუნდმა _ “ქართულმა ოცნებამ” 2012 წლის შემდეგ და, რა თქმა უნდა, ჩვენ არავის მივცემთ იმის უფლებას, რომ ეს მაღალი სტანდარტი ბიზნესთან მიმართებაში რამენაირად დაჩრდილოს ან დაარღვიოს. ბიზნესი დარჩება დაცული ჩვენს ქვეყანაში, მათ შორის, ოზურგეთშიც. მე მივიღებ ყველა ზომას იმისთვის, რომ არც ერთ ბიზნესმენს არ ჰქონდეს განცდა, რომ ხელისუფლების მხრიდან ხდება რაიმე უკანონო ჩარევა, _ აღნიშნა “გურია ნიუსთან” საუბრისას არჩილ თალაკვაძემ.
მისივე თქმით, ამ საკითხთან დაკავშირებით სრულად ეცნობა ინფორმაციას იმისთვის, რომ ობიექტური დასკვნები გამოიტანოს და მიიღოს ისეთი ზომები, რომელიც არ დაარღვევს ვინმეს უფლებებს.
ჩვენთან საუბრისას ოზურგეთის მაჟორიტარმა დეპუტატმა შარაშენიძის მიერ “ქართული ოცნების” წევრების სამსახურებიდან გათავისუფლებაზეც გააკეთა კომენტარი და აღნიშნა, რომ ოზურგეთში ადამიანების პოლიტიკური ნიშნით გათავისუფლების ტენდენციაც შეინიშნება:
_ 23 აპრილს, ჩვენს პარტიულ კონფერენციაზე, ბევრი ადამიანი იყო მოსული, რომლებმაც არჩევნების შემდეგ დატოვეს თანამდებობები და დარჩნენ უსამსახუროდ. მე ვიტყოდი, შეინიშნება ტენდენცია, რომ “ქართული ოცნების” წევრების მიმართ განსაკუთრებით იყო გამოყენებული საჯარო სამსახურის რეფორმის ის პროცესი, რომელიც მიმდინარეობს ჩვენ რაიონში, იმისთვის, რომ მათ აღარ გაეგრძელებინათ მუშაობა წამყვან თანამდებობებზე. ამ საკითხს ჩემი, მაჟორიტარის ბიურო სწავლობს და სასამართლო პროცესების შემდეგ ჩვენი მხრიდან ობიექტური შეფასებები იქნება გაკეთებული. სასამართლო პროცესების მიმდინარეობის დროს მე თავს შევიკავებ კონკრეტული შეფასებებისგან, ვინაიდან ეს შეიძლება ჩაითვალოს სასამართლოზე ზეგავლენის მოხდენის მცდელობად, _ ამბობს არჩილ თალაკვაძე.
დეპუტატის თქმით, კანონის წინაშე ყველა თანასწორია და ყველა შემთხვევაში საკითხი სამართლიანად გადაწყდება.
_ ბატონო არჩილ, კონსტანტინე შარაშენიძის მიერ სიძის ორგანიზაციისთვის გადარიცხული 30 000 ლარის საქმეზე, რომელიც იურისტებმა უკანონოდ შეაფასეს, სისხლის სამართლის საქმეა აღძრული. მეოთხე თვეა გამოძიება მომდინარეობს და ამ დრომდე საზოგადოებისთვის უცნობია შედეგი. ამბობენ, რომ თქვენ ხართ ის პირი, რომელიც შარაშენიძეს მფარველობს და პროცესიც ამიტომ იწელება…
_ კანონის უზენაესობა არის ის აუცილებელი პირობა, რომელიც ჩვენი ხელისუფლების პირობებში არის განუხრელად დაცული. შესაბამისად, არავითარი მნიშვნელობა არ აქვს, ვინ დაარღვევს კანონს. ასეთ შემთხვევაში, მიუხედავად მისი სტატუსისა, ნებისმიერ ადამიანს საქმე ექნება მართლმსაჯულების სისტემასთან. შესაბამისად, დაველოდოთ ამ საქმის წარმოების დასრულებას და შემდეგ შევძლებთ შეფასებების გაკეთებას.
_ კითხვაზე არ მპასუხობთ _ მფარველობთ თუ არა კონსტანტინე შარაშენიძეს?
_ ჩემთვის ყველაზე მნიშვნელოვანი რეგიონში ხალხთან კომუნიკაცია, საზოგადოება და საზოგადოების წევრები არიან. შესაბამისად, ყველა ჩემი გადაწყვეტილება და ყველა ჩემი მოქმედება ეფუძნება მხოლოდ და მხოლოდ საზოგადოების და მისი თითოეული წევრის ინტერესებს. მე ვიქნები ძალიან მომთხოვნი იმ საქმის მიმართ, რომელზეც პასუხისმგებლობა აქვს აღებული მუნიციპალიტეტს და ქალაქის არჩეულ მერს.
_ გარდა იმისა, რომ ოზურგეთის მაჟორიტარი დეპუტატი ხართ, უმრავლესობის ლიდერიც ბრძანდებით. საინტერესოა ხართ თუ არა მომთხოვნი უმრავლესობის დეპუტატების მიმართ და როგორ შეაფასებთ დეპუტატ ნინო წილოსანის განცხადებას, სადაც ის ამბობს, რომ მას, როგორც დეპუტატს, ოზურგეთთან შეხება არ აქვს…
_ ჩემს კოლეგასთან დაკავშირებით ვერანაირ დამატებით განცხადებას ვერ გავაკეთებ. კონკრეტულად თუ გამომიგზავნით, რაზეა საუბარი, მერე შემეძლება კომენტარის გაკეთება.
_ წილოსანმა თქვა, რომ, როგორც დეპუტატს, ოზურგეთთან შეხება არ აქვს, რამაც ოზურგეთის იმ 6 სოფლის მოსახლეობის გაღიზიანება გამოიწვია, რომლებიც სწორედ წილოსანის მაჟორიტარულ ოლქში შედიან და რომლებმაც მას დაუჭირეს მხარი…
_ არ მჯერა, რომ მას რაიმე არასწორი ინფორმაცია აქვს ოზურგეთთან დაკავშირებით, მიჭირს ამის დაჯერება, _ აღნიშნა არჩილ თალაკვაძემ.
