უზენაეს სასამართლოში მოქალაქე როლანდ ბლადაძის საკასაციო საჩივრის განხილვა მედიისა და პროცესზე დასწრების მსურველი საზოგადოებისთვის დახურულ კარს მიღმა ჩატარდა.
როგორც „გურია ნიუსს“ ბლადაძის ადვოკატმა, არჩილ კაიკაციშვილმა სხდომის დასრულების შემდეგ განუცხადა, პროცესზე მხარემ ჩამორთმეული ქონების საბაზრო ღირებულების შესახებ ლევან სამხარაულის სახელობის ექსპერტიზის ბიუროს დასკვნა წარადგინა.
„ჩვენ გვსურდა დღევანდელ სასამართლო სხდომაზე მედიის და დამსწრე საზოგადოების გარეშე საბოლოოდ გაგვევლო მორიგების არსებული წინაპირობების შედეგები. ვადასტურებ, რომ ეკონომიკისა და მდგრადი განვითარების სამინისტროსთან ბოლო დღეების განმავლობაში მიმდინარეობდა ინტენსიური მოლაპარაკებები საქმის მორიგებით დასრულებასთან დაკავშირებით. დღევანდელ სხდომაზე სიახლეს წარმოადგენდა ის გარემოება, რომ ლევან სამხარაულის სახელობის ექსპერტიზის ბიუროს დასკვნა წარადგინა როლანდ ბლადაძემ. ექსპერტიზის ბიურომ ჩამორთმეული ქონება ქალაქ ბათუმში ნახევარ მილიონ ლარად შეაფასა“, _ აცხადებს კაიკაციშვილი.
მისივე თქმით, მხარემ დააყენა საკითხი, რომ ეკონომიკის სამინისტროს მიერ შეთავაზებული ალტერნატიული ფართი ჩამორთმეული ქონების ტოლფასი უნდა იყოს.
„დაზარალებულმა დააყენა საკითხი, რომ ალტერნატიული ფართი უნდა ყოფილიყო ჩამორთმეული ფართის 277, 91 კვ.მ-ის ფართობის ტოლფასი, სხვა შემთხვევაში, მხარეს მორიგების იურიდიული ინტერესი არ ექნებოდა. მოვისმინეთ, ეკონომიკის სამინისტროს საბოლოო პოზიციები, რაც როლანდ ბლადაძის პოზიციებს არ დაემთხვა. საბოლოოდ, შევთანხმდით იმ გარემოებაზე, რომ როლანდ ბლადაძე თანახმაა დავა დაასრულოს მორიგებით, იმ შემთხვევაში, თუკი საქართველოს ეკონომიკის სამინისტრო, მას ყოველგვარი პირობების გარეშე, სახელმწიფოს მიერ უკვე დადგენილი ნახევარ მილიონიანი ზარალის გათვალისწინებით, საკუთრებაში გადასცემს ქალაქ თბილისში ჟვანიას ქუჩაზე მდებარე 2 საცხოვრებელ ბინას, რომელიც შავ კარკასს წარმოადგენს. აღნიშნული ბინების საერთო ფართი 416 კვ.მ-ია, საბაზრო ღირებულება კი ნახევარ მილიონ ლარს შეადგენს. აღნიშნულ პირობას სასამართლოც დაეთანხმა“,_ამბობს კაიკაციშვილი.
მისივე თქმით, როლანდ ბლადაძის საკასაციო საჩივრის განხილვა 4 მაისს, 14:00 საათზე განახლდება, სადაც ცნობილი გახდება დავა დასრულდება მორიგებით, თუ სასამართლო საქმეს არსებითად განიხილავს და გადაწყვეტილებას ისე გამოაცხადებს.
შეგახსენებთ, რომ გასულ სხდომაზე, მორიგების პროცესის გასაგრძელებლად ეკონომიკის სამინისტრომ მოითხოვა პროცესის გადადება, რადგან საკითხის შეთანხმება ეკონომიკის მინისტრთან, დიმიტრი ქუმსიშვილთან ვერ მოხერხდა, რის გამოც, სხდომა დღეისთვის ჩაინიშნა.
კაიკაციშვილის თქმით, ეკონომიკის სამინისტროს იურიდიული სამსახურის თანამშრომლებმა მინისტრთან კომუნიკაცია ამჟამად შეძლეს.
„მინისტრთან შედგა ეკონომიკის სამინისტროს იურიდიული სამსახურის თანამშრომლების კომუნიკაცია. მინისტრს და მთავრობას აქვს პოლიტიკური გადაწყვეტილება მიღებული, რომ აღნიშნული რეზონანსული დავა სამართლიანად და ობიექტურად, მორიგებით დასრულდეს. ალტერნატიული ფართების წარმოდგენა სწორედ ამ მიზანს ემსახურებოდა. თუმცა, პირობების ნაწილი სამინისტროს იურიდიული სამსახურის ნაწილია და მინისტრი თავის კომპეტენციით ვერ შემოვა. ამიტომ ჩვენ ვკარნახობთ სამინისტროს, რომ ის პირობები, რომლებიც მათ დააყენეს ჩვენთვის მიუღებელია. მაგალითად, შემოგვთავაზეს, რომ სამინისტრო თავად მოახდენდა თბილისში მდებარე ალტერნატიული საცხოვრებელი სახლების გაყიდვას და მიღებული თანხით ბლადაძის ფინანსურად უზრუნველყოფას, რასაც ბლადაძე არ დაეთანხმა. ეს წინადადება დაკავშირებულია რისკებთან. რისკები შეიცავს ქონების გასხვისების დროში გახანგრძლივების საკითხს. არავინ იცის დადასტურებულად რა დროში შეიძლება გაიყიდოს ან არ გაიყიდოს სამინისტროს ბალანსზე არსებული ქონებები. ჩვენი პირობა არის რომ მე-12 სართულზე არსებული 2 საცხოვრებელი ფართი მივიღოთ და დავა დავასრულოთ მორიგებით. რამდენად გონივრული დამოკიდებულება ექნება სახელმწიფოს ამ პირობის მიმართ ეს გახდება 4 მაისს ცნობილი. თუ ეკონომიკის სამინისტრო აღნიშნულ პირობას არ დათანხმდება ამ შემთხვევაში სასამართლო არსებითად განიხილავს საქმეს და გამოიტანს იმ გადაწყვეტილებას, რაც დადგენილი მტკიცებულებების საფუძველზე დაზარალებული როლანდ ბლადაძის ინტერესების შესაბამისი უნდა იყოს“,_ამბობს კაიკაციშვილი.
შეგახსენებთ, რომ სარფის საბაჟო-გამშვები პუნქტის დირექტორის ყოფილი მოადგილე, როლანდ ბლადაძე, საკონსტიტუციო სასამართლოს ყოფილი თავმჯდომარე გიორგი პაპუაშვილს და ეკონომიკის სამინისტროს უკანონოდ ჩამორთმეული ქონების ანაზღაურებას ალტერნატიული ფართით სთხოვს.
აღნიშნულ საქმეზე თბილისის საქალაქო სასამართლომ 2016 წელს, ხოლო სააპელაციო სასამართლომ 2017 წელს ბლადაძის მხარის სარჩელი არ დააკმაყოფილა.
