მმართველი გუნდის წარმომადგენელი, კობა კობალაძე სამინისტროების სტრუქტურულ რეორგანიზაციასა და იუსტიციის მინისტრის, თეა წულუკიანის თანამდებობიდან შესძლო გადადგომას გამოეხმაურა. როგორც კობალაძე ,,გურია ნიუსთან“ საუბრისას აცხადებს, წულუკიანს პიროვნულად დიდ პატივს სცემს და მის პროფესიონალიზმში ეჭვი არ ეპარება, ამიტომ, მისი თქმით, იუსტიციის მინისტრის გადადგომა მიზანშეწონილად არ მიაჩნია.
,,ქალბატონ თეას, როგორც სახელმწიფო მოღვაწეს, პიროვნულად საკმაოდ დიდ პატივს ვცემ, აქედან გამომდინარე, მის პროფესიონალიზმში ეჭვი არ მეპარება და არ მაქვს საფუძველი, რომ ეჭვი შევიტანო. გამობრძანდა ქალბატონი თეა და განაცხადა, რომ როგორც არ უნდა განვითარდეს სიტუაცია, მაინც დარჩება ჩვენი გუნდის შემადგენელ ნაწილში. შემდეგი საკადრო ცვლილებები როგორი იქნება, ეს უკვე პრემიერ-მინისტრის გადასაწყვეტია. ჩემი პოზიცია არის ის, რომ ქალბატონმა თეამ უნდა შეასრულოს დაკისრებული ფუნქცია და დანარჩენი ახალი სამთავრობო გუნდის გადასაწყვეტია. რა შეეხება, სამინისტროების გაერთიანებას, ჩემი დამოკიდებულება ოპტიმიზაციის მიმართ არის დადებითი. ამ შემთხვევაშიც მოგახსენებთ, რომ უმთავრესი სიტყვა დავუტოვოთ პრემიერ-მინისტრს იმიტომ, რომ ზუსტად მისი პასუხისმგებლობაა ეფექტური გუნდის შექმნა, რომელიც მთავარი სახელმწიფო ამოცანების გადაწყვეტაზე იქნება ორიენტირებული“, _ განაცხადა კობალაძემ.
ცნობისთვის, დღეს მმართველი გუნდის წარმომადგენელმა, დავით ჭიჭინაძემ განაცხადა, რომ იუსტიციის მინისტრმა თანამდებობა უნდა დატოვოს. ამასთან, ამ დრომდე, თეა წულუკიანის გადადგომას ითხოვენ ოპოზიციისა და არასამთავრობო ორგანიზაციების წარმომადგენლები.
