ლანჩხუთის საკრებულოს ერთსულოვანი გადაწყვეტილებით, საფეხბურთო კლუბი „გურია“, პირობებიანი აუქციონის წესით მართვის უფლებით შპს „ლაიონს ბილდინგ დეველოპმენტს“ გადაეცემა, რომელმაც მუნიციპალიტეტის მერიას წერილობითი ფორმით მიმართა კლუბის მენეჯმენტის, მართვის, ინვესტიციებისა და სპონსორობის განხორციელების თაობაზე.
მანამდე კი საკრებულოს წევრებმა ხელშეკრულების პირობებსა და ვალდებულებებზე, კლუბთან მიმართებით გასახორციელებელ გეგმებზე საკრებულოში მოქმედი კომისიების გაფართოებულ სხდომაზე იმსჯელეს, სადაც კომპანიის მენეჯერი ზურაბ წილოსანიც იმყოფებოდა იურისტის თანხლებით.
როგორც გაირკვა, მენეჯმენტისა და მართვის უფლების გარდა, ხელშეკრულება მოიცავს საფინანსო, საბუღალტრო, შიდასამართლებრივი დოკუმენტაციის წარმოების უფლებას, საკადრო პოლიტიკის წარმოებას, სტრუქტურული ერთეულების შექმნას, თანამშრომლებთან შრომითი კონტრაქტების გაფორმებისა და შეწყვეტის უფლებას. საფეხბურთო სტაფის _ ტოპ-მენეჯერების, საწვრთნელი შტაბის, სამედიცინო პუნქტის-მედპერსონალის, მასაჟისტებისა და სხვა დამხმარე საშტატო განრიგის განსაზღვრას, ფეხბურთელების სელექციის, შერჩევის, მათ შორის უცხო ქვეყნის საფეხბურთო კლუბებიდან გუნდში აყვანის უფლებას და ასე შემდეგ.
კერძოდ, აუქციონის პირობის მიხედვით, მმართველი კომპანიის ვალდებულებაში შედის: საფეხბურთო კლუბის ინფრასრუქტურით (სათამაშო მოედნით, საწვრთნელი ბაზებით, სავარჯიშო მოედნებით, დამატებითი სპორტული ეკიპირებითა და ინვენტარით, დამხმარე ინფრასტრუქტურით, სასტუმროთი, კვებითი ბლოკით და ა.შ.) სარგებლობის უზრუნველყოფა; საფეხბურთო სეზონის განმავლობაში საფეხბურთო კლუბის სამწვრთნელო შტაბის, ფეხბურთელების, წვრთნის და ვარჯიშის პროგრამის დაგეგმვა; საფეხბურთო სეზონის განმავლობაში წვრთნის და ვარჯიშის პროგრამის ფარგლებში საფეხბურთო კლუბის სამწვრთნელო შტაბის, ფეხბურთელების, მედპერსონალის და მასაჟისტების და სხვა დამხმარე პერსონალის საქართველოში და მის ფარგლებს გარეთ (არანაკლებ წელიწადში ერთხელ) სამწვრთნელო/სავარჯიშო შეკრება; დამტკიცებული საშტატო განრიგის მიხედვით საფეხბურთო კლუბის სამწვრთნელო შტაბის, ფეხბურთელების, მედპერსონალის, მასაჟისტების და სხვა დამხმარე პერსონალისთვის სახელფასო დანამატის, პრემიალური სისტემის შემოღების, დამტკიცებისა და მათი ოდენობის განსაზღვრის შემთხვევაში, მისი ანაზღაურების ვალდებულება; ექსკლუზიური მართვისა და მენეჯმენტის განხორციელების მიზნით მისი მხრიდან დამატებით აყვანილი სხვა დამხმარე პერსონალის სახელფასო, ასევე მათთვის პრემიალური სისტემის (ჰონორარების) შემოღების, დამტკიცების და მათი ოდენობის განსაზღვრის შემთხვევაში, მისი ანაზღაურების ვალდებულება; საფეხბურთო კლუბში შესაბამისი ხელშეკრულების გაფორმებიდან ორი კვირის ვადაში არანაკლებ 40 ათასი ლარის ოდენობით ინვესტიციების განხორციელება და საფეხბურთო კლუბის სპონსორობა.
ამასთან, მმართველი კომპანია ექსკლუზიური მართვისა და მენეჯმენტის განხორციელების მიზნით, ვალდებულია ხელშეკრულების მოქმედების მთელი პერიოდის განმავლობაში, როგორც სპონსორმა, განახორციელოს საფეხბურთო კლუბის დაფინანსება და უზრუნველყოს:
საფეხბურთო სეზონის ბოლომდე კლუბის ფეხბურთელებით დაკომპლექტება, არანაკლებ 3-4 გამოცდილი ფეხბურთელის დამატება; სეზონის ბოლომდე ახლად დაკომპლექტებული გუნდის არანაკლებ ერთხელ საქართველოში და ერთხელ საქართველოს საზღვრებს გარეთ შეკრების მოწყობა; ფეხბურთელების სათამაშო ეკიპირებით უზრუნველყოფა.
კომპანიისთვის „გურიას“ ფინანსური მდგომარეობა და ვალდებულებები ცნობილია და მზადაა, პასუხისმგებლობა საკუთარ თავზე აიღოს. როგორც საკრებულოს სხდომაზე გაჟღერდა, მათი მიზანია, სამეწარმეო საქმიანობის ფარგლებში მაქსიმალური მოგების მიღება, კლუბის ცნობადობის გაზრდა, საერთაშორისო კავშირების გაფართოება და სპორტული შედეგების გაუმჯობესება.
აღმოჩნდა, რომ პირებს, რომლებსაც „გურიაში“ სპონსორად მოსვლა განუზრახავთ, ფოთის „კოლხეთის“ მესვეურობაც უკისრიათ. როგორც გარკვეული ინფორმაციები გაჟღერდა, კომპანია თანახმაა, გუნდის ყველა ვალი დაფაროს და მიმდინარე სეზონში სხვა ფინანსური დახმარებაც გასწიოს, მაგრამ ვალების დაფარვის ვალდებულებაზე სხდომაზე არავის არაფერი უთქვამს და ეს საკითხი კვლავაც ბურუსითაა მოცული. საუბარი იყო მხოლოდ 40 ათას ლარზე, რომელიც ფეხბურთის განვითარების ფონდში თუ კლუბი შემოწირულობის სახით შეიტანს, მაშინ აქამდე ამ სახით შეტანილ 60 ათას ლარს, ეს თანხა დაემატება და ფონდი სანაცვლოდ კიდევ 100 ათას ლარს გამოუყოფს კლუბს, რომელიც, სავარაუდოდ, მთლიანად მოხმარდება იმ დავალიანების გასტუმრებას, რომელიც „გურიას“ ფიფამ დააკისრა ბრაზილიური კლუბის სასარგებლოდ.
რაც შეეხება მიმდინარე ეტაპზე კლუბის მართვას, ეს პარალელურ რეჟიმში მოხდება, უფრო სწორად, ფეხბურთის განვითარების ფონდის ფინანსებს ისევ კლუბის მენეჯმენტი განკარგავს, შპს „ლაიონს ბილდინგ დეველოპმენტი“ კი ცალკე ბუღალტერიით მოახდენს კლუბში სხვა ფინანსების მობილიზებას.
