„არ ვიცი, როდის უნდა დავასრულო წერა ამ უნიათო ხელისუფლებაზე, დაპირება და მეტი არაფერი იციან“, _ წერს სოციალურ ქსელში ლანჩხუთის მუნიციპალიტეტის აკეთის ადმინისტრაციული ერთეულის მკვიდრი ვეკო წულაძე, რომელიც საკუთარ ფესბუქგვერდზე ხშირად აშუქებს სოფელში შექმნილ უგზოობის პრობლემას. ამჯერადაც იგი ადგილობრივ ხელისუფლებისგან სოფელში გზის პრობლემის დროულ მოგვარებას ითხოვს.
„სოფელს რომ გზა უნდა, ამას დიდი მსჯელობა რად უნდა? მალე სასწავლო წელი დაიწყება და სოფელ ჭანჭათში კი გზის გაკეთება კიდევ ვერ დაიწყეს, მართალია დააგეს ბეტონის საფარი, მაგრამ ის ორი მონაკვეთი, რომელიც სოფლის მოსახლეობისთვის პრობლემურია ჯერაც მოუწესრიგებელია, ეგრეთ წოდებული “გოგუაძეების უბანი”, სადაც ხაზის მარშუტკებიც აღარ ამოდის და ტვირთით ხელში გტოვებენ და მეორე მონაკვეთი არის “ფაცხასთან”.
მე ვარ ორი შვილის დედა, ერთი სკოლის მოსწავლეა და მეორე ბაღის. თუ ეს მონაკვეთები არ გაკეთდა სკოლის და ბაღის მარშუტკა ვერ ამოვა, სკოლაში კარგი წავა ბავშვი, თუმცა რატომ უნდა წავიდეს ფეხით, როდესაც მძღოლი მომსახურებაში ანაზღაურებას იღებს, მაშინ მუნიციპალიტეტი რატომ აფინანსებს სკოლის მარშუტკებს თუ ბავშვებს სრულფასოვნად არ მოემსახურებიან? თუმცა მარშუტკა რომ მოგემსახუროს გზა უნდა ქონდეს სოფელს, რაც პირდაპირი ვალდებულებაა მუნიციპალიტეტის რომ შიდა გზები მოაწესრიგოს. რაც შეეხება ბაღს, სადაც ჩემი შვილი ნინი დადის, ვერ ვატარებ გზის გამო, ალბათ ჩემი პოსტებიდან იცით კიდეც რომ ნინის დაუნის სინდრომი აქვს და მისთვის ბაღში სიარული განვითარებისკენ წინ გადადგმული ნაბიჯია და უგზოობის გამო ბავშვს განათლების უფლება ეზღუდება. ამ დროს ჩვენი მუნიციპალიტეტის მერი რას აკეთებს? როგორ აგვარებს პრობლემას? ან გამგებელი და დეპუტატი. მე როგორც დედას და ამ სოფლის მკვიდრს მინდა გზა და ვითხოვ აღებული პასუხისმგებლობა სოფლის პატრონობაზე შეასრულონ, დაპირება არა საქმე და გაკეთებული გზა!!!“- მიმართავს სოციალური ქსელის საშუალებით ორი შვილის დედა მუნიციპალიტეტისა და სოფლის ხელმძღვანელ პირებს.
ვეკო წულაძის პოსტს, რომლის ადრესატი მუნიციპალიტეტის მერია, სოფლის მაჟორიტარი და რწმუნებული არიან, სოციალური ქსელის კიდევ ერთი მომხმარებელი მარინა მახარაძე ეხმიანება: „კი გვპირდებიენ, მაგრამ არ აქვს დასასრული. როდემდე უნდა იწვალოს ამ გლეხმა ხალხმა? გამოდით ხალხო გარეთ!“
„გზის გამო გასულ წელს ბევრჯერ დაგვტოვა სკოლის მარშუტკამ გზაში, ხშირად ეს თავსხმა წვიმაში ხდებოდა და ამიტომაც მოვითხოვთ გზის გაკეთებას, რომ ამოვიდეს სკოლის მარშუტკა“, _ ვეკო წულაძის პოსტს ეხმიანება ნინო მახარაძე.
აღნიშნული პოსტის საპასუხოდ კომენტარისთვის „გურია ნიუსი“ მერიის პიარს დაუკავშირდა.
„აკეთში მერის წარმომადენლის მანუჩარ ღლონტის განცხადებით, ვეკო წულაძის სახლთან გზა მოიხრეშა რამდენიმე ხნის წინ. რაც შეეხება ე.წ „გოგუაძეების უბანს“ სტიქიის სალიკვიდაციო თანხაში გათვალისწინებულია ამ უბნის შეკეთება. სამუშაოები უახლოეს მომავალში დაიწყება“, _ წერია მერიიდან მიღებულ პასუხში.
