პოლიტოლოგი და კონსტიტუციონალისტი ვახტანგ ძაბირაძე ,,გურია ნიუსთან“ პრემიერ-მინისტრის იმ განცხადებას ეხმაურება, სადაც ბახტაძე აცხადებს, რომ ეკონომიკის სამინისტრო მინისტრის, გიორგი ქობულიას გარეშეც სრულფასოვნად მუშაობს.
როგორც ძაბირაძე ამბობს, პრემიერის განცხადება, სულ მცირე, უხერხულობას ქმნის. მისი თქმით, ისეთ ქვეყანაში, როგორიც საქართველოა, მინისტრები შვებულებებში წასვლის მაგივრად, დღე და ღამე სამინისტროში უნდა მუშაობდნენ.
,,თუ სამინისტრო გამართულად მუშაობს, მაშინ მინისტრი რაღა საჭიროა? მინისტრი საჭიროა იმისთვის, რომ სამინისტრომ გამართულად იმუშაოს და ის პოლიტიკა გაატაროს, რასაც მთავრობა გეგმავს. ასე რომ, პრემიერის მხრიდან ცოტა უხერხული გამართლებაა.
ანეკდოტური სიტუაციაა, საქართველოში თუ ეკონომიკის მინისტრს საქმე არ აქვს და სამინისტრო კარგად მუშაობს, მაშინ ცუდად მუშაობა რას ჰქვია. მსოფლიოში არსებობს ადამიანი, რომელიც იტყვის, რომ მას ფული იმდენი აქვს, რომ აღარ სჭირდება? ეს მასხრად აგდებას უფრო ჰგავს, ვიდრე სერიოზულ განცხადებას.
თუ სურვილი აქვს, რომ დიდი გამოცდილება ქვეყანას მოახმაროს , შვებულებაში კი არ უნდა წავიდეს, ოცდაოთხი საათი სამინისტროში უნდა იჯდეს. მინისტრად წარდგენისას მის მიერ გაკეთებული განცხადებები და შვებულებები და ლოგიკაში ჯდება? აბსურდის თეატრიაა“, _გვითხრა ძაბირაძემ.
ქობულია თანამდებობაზე 12 ივლისს დაინიშნა და ამ დროს განმავლობაში ის შვებულებაში სამჯერ გავიდა.
თავად ქობულია ადასტურებს, რომ თანამდებობაზე დანიშვნის შემდეგ ნახევარი დრო შვებულებაში აქვს გატარებული. როგორც ქობულია აცხადებს, ხშირი შვებულების მიზეზი წინა სამსახურსა და ჯანმრთელობასთან დაკავშირებულ პრობლემებს უკავშირდება.
როგორც ,,გურია ნიუსს“ ეკონომიკის სამინისტროდან აცნობეს, ქობულია უფლებამოსილების განხორციელებას 10 სექტემბრიდან შეუდგება.
