ცოტა ხნის წინ ამერიკელმა მეცნიერებმა დაამტკიცეს, რომ სამხრეთ ამერიკის უდიდესი მდინარე ამაზონი არა მარტო დასავლეთიდან აღმოსავლეთისკენ მიედინებოდა, როგორც ახლა, არამედ საწინააღმდეგოდაც – კონტინენტის ცენტრისკენ.
ამაზონი აღმოსავლეთის მიმართულებით მიედინება, კვეთს კონტინენტს და ატლანტიკის ოკეანეში ჩაედინება. 100 მილიონი წლის წინათ როდესაც დედამიწაზე ჯერ კიდევ დინოზავრები ბინადრობდნენ, სამხრეთ ამერიკისა და აფრიკის კონტინენტის გახლეჩვის შედეგად წარმოიშვა ნაპრალი, რის გამოც ამერიკის აღმოსავლეთი ნაპირი ცოტათი ამაღლდა. ამან მდინარე ამაზონი ოკეანიდან კონტინენტის ცენტრისკენ შეაბრუნა. გარკვეული დროის შემდეგ კონტინენტის შუა ნაწილმა ამოიწია და ამაზონის ნაკადის ერთმა შტომ ატლანტიკის ოკეანისკენ დაიწყო დინება, მეორემ – წარმოქმნის სტადიაში მყოფი ანდებისკენ.
ეს უნიკალური აღმოჩენა სრულიად შემთხვევით მოხდა. მეცნიერები მდინარის სიჩქარის გამოკვლევის მიზნით, ატლანტის ოკეანეში ჩამავალი წყლის მინერალურ შემცველობას იკვლევდნენ. ექსპერიმენტებმა გამოავლინა, რომ სამხრეთ ამერიკის ცენტრალურ ნაწილში აღმოჩნდა ისეთი ნივთიერებები, რომლებიც აქამდე მხოლოდ კონტინენტის აღმოსავლეთი ნაწილისთვის იყო დამახასიათებელი.
„ახალმა აღმოჩენამ დაადასტურა თუ რამდენად განიცადა ცვლილება დედამიწის ქერქმა. აჩვენა რომ წარსულ პერიოდში ამაზონმა სამჯერ შეიცვალა მიმართულება, ანუ გეოლოგიური ენით რომ ვთქვათ, ძალიან მცირე დროში დრენაჟის სამი სტადია გაიარა“ – განაცხადა ამერიკის გეოლოგიური საზოგადოების ყრილობაზე ჩრდილოეთ კაროლინის უნივერსიტეტის წარმომადგენელმა რუსელ მაპსმა.
კვლევები გრძელდება და მეცნიერები იმედოვნებენ, რომ დედამიწის განვითარების სხვა საიდუმლოებების ახსნასაც შეძლებენ.
