რა აკავშირებს პროკურატურის ყოფილ მაღალჩინოსანს მირზა სუბელიანს მთავრობის ადმინისტრაციის რეგიონული განვითარების სამსახურის უფროს სოზარ სუბართან?_ სკანდალურ ჩანაწერებში, რომელიც მედიის საშუალებით გავრცელდა, მირზა სუბელიანი ამბობს, რომ ხელისუფლების წინააღმდეგ კომპრომატების გასაჯაროვებისგან თავს სოზარ სუბარის გამო იკავებს.
,,ნაციონალური მოძრაობის“ დროს გახმაურებული საქმეების პროკურორი მირზა სუბელიანი, 2013 წელს სასჯელაღსრულების დაწესებულებაში გენინსპექციის უფროსის თანამდებობაზე, სავარაუდოდ, ამჟამინდელი რეგიონული განვითარების სამსახურის უფროსის, სოზარ სუბარის ხელდასმით დაინიშნა.
ლალი მოროშკინამ, რომელიც იმ პერიოდში სასჯელაღსრულების სამინისტროს მრჩევლის თანამდებობას იკავებდა, გუშინ დაადასტურა, რომ სამინისტროში მირზა სუბელიანი სოზარ სუბარის მიერ ლობირებული კადრი იყო.
ლალი მოროშკინა იმასაც ამბობს, რომ მირზა სუბელიანი სოზარ სუბარის ნათესავია. „ეს არის რაღაც სვანური კლანი“, _აღნიშნავს მოროშკინა.
სოზარ სუბარს მირზა სუბელიანთან შესაძლო ნათესაურ კავშირთან დაკავშირებით განმარტების გაკეთება ჯერ კიდევ 2013 წელს მოუწია. მაშინ, როცა, სავარაუდოდ, მისი მეშვეობით საპასუხისმგებლო თანამდებობაზე ,,ნაციონალური მოძრაობის“ დროს გახმაურებული საქმეების, მათ შორის, 26 მაისის საქმის პროკურორი მირზა სუბელიანი დაინიშნა:
_ მირზა სუბელიანი არ არის არც ჩემი ბიძაშვილი, არც ნათესავი. სუბარი არის სხვა გვარი, ეს არ არის ჩემი ფსევდონიმი, ეს არის ჩემი უძველესი გვარი, რომელიც დავიბრუნე. სვანეთში არის სოფელი, სადაც ცხოვრობენ სუბელიანები და არის სოფელი, სადაც ცხოვრობენ სუბარები“, _ აცხადებდა სოზარ სუბარი.
როგორც ხედავთ, სოზარ სუბარი მირზა სუბელიანთან ნათესაურ კავშირს გამორიცხავს, თუმცა გაურკვეველია: როგორ ხსნის რეგიონული განვითარების სამსახურის მოქმედი უფროსი ფაქტს იმის შესახებ, რომ მისი ძმა გვარად სუბელიანია?
საუბარია სოზარ სუბარის ძმაზე, ვახტანგ სუბელიანზე, რომელიც დღემდე ამ გვარს ატარებს.
აღნიშნულზე განმარტებები ამ დრომდე არ გაუკეთებია რეგიონული განვითარების სამსახურის უფროსს.
კრიტიკულ შეკითხვებზე პასუხების მოსმენა ,,გურია ნიუსს“ სოზარ სუბარისგან სურდა, თუმცა, ჯერჯერობით, პასუხები ვერ მივიღეთ, რადგან, როგორც მთავრობის ადმიანისტრაციაში განგვიცხადებს, სუბარი ამჟამად ოფიციალური ვიზიტით ჩინეთში იმყოფება.
