წინასაარჩევნოდ ,,ქართული ოცნება“ შიდაპარტიული კვლევის შედეგებს ასაჯაროვებს, რომლის მიხედვით, მმართველი პარტიის მხარდაჭერილი საპრეზიდენტო კანდიდატი სალომე ზურაბიშვილი 53%-ით პირველივე ტურში იმარჯვებს. მეორე და მესამე ადგილებს კი „ძალა ერთობაშიას“ საპრეზიდენტო კანდიდატი გრიგოლ ვაშაძე (19 %) და ,,ევროპული საქართველოდან“ დავით ბაქრაძე (11%) ინაწილებენ.
,,ქართული ოცნების“ კვლევა შიდაპარტიულია, თუმცა რომელ კომპანიას დაუკვეთა მმართველმა პარტიამ აღნიშნული კვლევის ჩატარება საზოგადოებისთვის უცნობია.
სოციოლოგიური კვლევის შედეგებს უნდობლობას უცხადებს პოლიტიკის ექსპერტი ვაჟა ბერიძე.
ბერიძე არა მარტო ,,ქართული ოცნების“ კვლევის უნდობლობაზე, არამედ საქართველოში არაკვალიფიციური, ობიექტური სიციოლოგიური კვლევის ორგანიზაციის არარსებობაზე მიანიშნებს.
პოლიტოლოგი ,,ქართულ ოცნებას“ მოუწოდებს, შეეგუონ აზრს იმის შესახებ, რომ მეორე ტური გარდაუვალი იქნება.
_ ქართული საზოგადოებისთვის მიუღებელია, რომ საქართველოში არ არსებობენ კომპეტენტური, კვალიფიციური, ავტორიტეტული, სოციოლოგიური კვლევის კომპანიები, რომელთა შედების მიმართ საზოგადოებას ნდობა ექნება.
ყველა პარტიული დაკვეთა, ბუნებრივია, უნდობლობას იწვევს. ამ პარტიული გამოკითხვების შედეგებზე ლაპარაკი არასერიოზულია.
ვხედავ მმართველი პარტიის სურვილს, რომ სალომე ზურაბიშვილმა გაიმარჯვოს პირველივე ტურში, მაგრამ ცოტა მაინც თუ დავფიქრდებით, ცხადი გახდება, რომ ადმინისტრაციული რესურსის გამოყენებითაც კი მმართველი პარტიის წარმომადგენელი პირველივე ტურში ვერ გაიმარჯვებს.
რეალურად მეორე ტური არის თვალნათელი. რეალობის ამსახველია ის, რომ მეორე ტურში გავა სალომე ზურაბიშვილი და გრიგოლ ვაშაძე, რომელთა შორის მოხდება დაპირისპირება, სჯობს, ,,ქართული ოცნება“ აზრს შეეგუოს“, _ აღნიშნა ბერიძემ.
საპრეზიდენტო არჩევნები 28 ოქტომბერს გაიმართება.
