„სირცხვილია ხელისუფელბას საკუთარი კანდიდატი რომ არ ჰყავს“_ არველაძე „ოცნებას“ აკრიტიკებს

საპრეზიდენტო არჩევნების პირველი ტურის შედეგებზე _“გურია ნიუსს“ მმართველი პარტიის წევრი რევაზ არველაძე ესაუბრა.

_ დადებითად არ ვაფასებ იმ შედეგს, რომელიც მმართველმა პარტიამ პირველ ტურში მიიღო. ჩემი აზრით, გუნდმა კარგად ვერ იმუშავა, რაც კარგი გაკვეთილი უნდა იყოს „ქართული ოცნებისთვის. მოსახლეობას უკეთ უნდა გავაგებინოთ, რა არაჯანსაღი მდგომარეობა შეიქმნება, თუ პრეზიდენტის პოსტზე „ნაციონალური მოძრაობის“ წარმომადგენელი მოვა.

_ ბატონო რევაზ, როგორც ცნობილია, მმართველი პარტიის მხრიდან სალომე ზურაბიშვილის მხარდაჭერა ბიძინა ივანიშვილის იდეა იყო, რასაც  „ქართული ოცნების“ დეპუტატთა ნაწილი    არ იზიარებდა. ახლა როგორი განწყობაა გუნდში?

_ როცა საკითხი დადგა, მხარი დავუჭიროთ დამოუკიდებელ დეპუტატსო, ერთადერთი ვიყავი, რომელმაც ვთქვი, რომ მმართველი გუნდის მხრიდან სალომე ზურაბიშვილის მხარდაჭერა არ იქნებოდა სწორი გადაწყვეტილება. თითებზე ჩამოსათვლელია ისეთი ადამიანი, ვინც ჩემს აზრს იზიარებდა. ახლა შეიძლება ყველა ირტყამს გულზე ხელს წინააღმდეგი ვიყავითო, მაგრამ გვიანია.  

მე სალომეს საწინააღმდეგო კი არაფერი მაქვს, ვლაპარაკობ, რომ, როდესაც ხარ ხელისუფლება, სირცხვილიც კი არის, რომ შენი კანდიდატურა არ გყავდეს. სალომე ზურაბიშვილმა თუ წააგო, ეს სალომეს წაგება კი არ იქნება, „ქართული ოცნებისა“ და ბიძინა ივანიშვილის  წაგება იქნება.

_ კერძოდ, რომელი დეპუტატები იზიარებდნენ თქვენს პოზიციას?

_ ჩემ გარდა, ამაზე ლაპარაკობდა ზაქარია ქუცნაშვილი. სხვა არ მახსოვს, რომ ვინმეს ეთქვას.

_ გრიგოლ ვაშაძის გამარჯვების შემთხვევაში, რას ელოდება მმართველი პარტია? თქვენი თანაგუნდელის, გედევან ფოფხაძის მიერ დაანონსებულ სამოქალაქო ომს?

_  მაგდაგვარი არაფერი იქნება. კანონი იმოქმედებს, ვერავინ ვერაფერს გაბედავს. ლინჩის წესი აღარ მოქმედებს საქართველოში, აქედან გამომდინარე, სამოქალაქო ომის საშიშროებას არ ვხედავ.

სხვა საშიშროებას ვხედავ, რატომ არის ხალხი იმედგაცრუებული? იმიტომ, რომ „ქართულმა ოცნებამ“ გარკვეული დაპირებები ვერ შეასრულა. მმართველ პარტიას ისეთი დაპირებები არ უნდა გაეცა, რომლებიც ვერ შესრულდებოდა. მხედველობაში მაქვს გაზის, ელექტროენერგისა და სხვათა ტარიფები, მაშინ ასეთ დაპირებებს  იძლეოდა  ბატონი ბიძინა, როგორც ჩანს, ჭკვიანი მრჩევლები არ ჰყავდა.

მოსახლეობას ყველაზე მეტად სოციალური მდგომარეობა აწუხებს. ამ მიმართულებით, რა თქმა უნდა, ბევრია გასაკეთებელია. აქამდე პენსიონერებს ვერ გავუზარდეთ პენსია. სულ ვამბობდი და ვამბობ, რომ 20 ლარით ზრდა არ არის საკმარისი.

„ნაციონალური მოძრაობა“ ღიად აცხადებს, რომ მათი მიზანია ზიანი მიაყენონ ხელისუფლებას, ხელისუფლების ზიანი კი ქვეყნის ზიანია. გრიგოლ ვაშაძე ქვეყნის საზიანოდ იმუშავებს. მისი ნებისმიერი  სიტყვა, რა თქმა უნდა, საქართველოს საერთაშორისო ასპარესზე შეულახავს რეპუტაციას, რაც არასასიამოვნო იქნება.

_ რუსეთმა ჰააგის სასამართლოში წარდგენილ სარჩელში „ქართული ოცნების“ მხარდაჭერილი კანდიდატის, სალომე ზურაბიშვილის წიგნიდან ციტატები უკვე გამოიყენა, აღნიშნული ფაქტი საქართველოს საერთაშორისო ასპარესზზე  არ ულახავს იმიჯს?  

_ რა თქმა უნდა, მაგრამ ამის თაობაზე გააკეთა განმარტება ქალბატონმა სალომე ზურაბიშვილმა. როცა საუბარია აგვისტოს ომზე, ფაქტია, რომ რუსეთის ავანტიურაზე წამოეგო საქართველოს ხელისუფლება. ცხადია, მხოლოდ რუსეთსაც ვერ დავადანაშაულებთ, ქართული მხარე ცოტა ჭკვიანურად რომ მოქცეულიყო, ასეთ შედეგს  თავიდან ავირიდებდით.