„გურია ნიუსის“ მიერ მოპოვებული ინფორმაციით, ოზურგეთის მუნიციპალიტეტში, ქალაქის მესამე და სოფელ ბოხვაურის საბავშვო ბაღები სურსათის უვნებლობის რეგიონული სამსახურის წარმომადგენლებმა დააჯარიმეს.
როგორც წყარო გვეუბნება, სეს-ის რეგიონული სამსახურის ჯგუფის შესვლისას, ბაღებში აღმოჩნდა უხარისხო და და უეტიკეტო საკვები პროდუქტი, რაზეც, ძირითადად, ვადა არ იყო მითითებული. სამზარეულოებში იყო არეულობა.
ჩვენ მივმართეთ სეს-ის რეგიონულ სამსახურს, სადაც ფაქტის შესახებ დაგვიდასტურეს და განმარტეს, რომ ეს იყო გეგმიური მონიტორინგი.
_ ბაღებში შევიდნენ ინსპექტორები. ორი საბავშვო ბაღი, სადაც აღმოჩნდა უხარისხო და უეტიკეტო საკვები. შესაბამისად, ბოხვაურის საბავშვო ბაღი _ 500 ლარით, ქალაქ ოზურგეთის მესამე საბავშვო ბაღი კი 400 ლარით დაჯარიმდა, _ გვითხრეს სეს-ში.
„გურია ნიუსი“ ოზურგეთის მუნიციპალიტეტის სკოლამდელი აღზრდის ცენტრის ხელმძღვანელს, მაკა ჭყონიას დაუკავშირდა და თხოვა, კომენტარი გაეკეთებინა აღნიშნულ საკითხზე.
_დიახ, იყო ასეთი ფაქტი. სერტიფიკატი ყველანაირ პროდუქტს ახლდა. თუმცა, ეტიკეტირება არ ჰქონდა. მაგალითად, დიდი პაკეტიდან გადმოღებულ შაქარს თუ ბურღულს. ეს ხდება მაშინ, როცა მცირე რაოდენობით გჭირდება და ამიტომ გაქვს ცალკე. გარკვეულწილად, არ იკითხებოდა ვადები. მაგალითად, კვერცხზე, სადაც თარიღი აუცილებლად უნდა ჩანდეს გარკვევით. როცა არ იკითხება რიცხვი, უკან უნდა დაუბრუნდეს.
_ და რატომ არ დაუბრუნეს, როცა არ იკითხებოდა?
_ ეს არის მენეჯერის პასუხისმგებლობის საკითხი.
_ თუ დაეკისრათ პასუხისმგებლობა და რა ღონისძიება გაატარეთ ამ ფაქტის შემდეგ?
_ კი, დაჯარიმდა ეს ორი საბავშვო ბაღი, _ გვითხრა მაკა ჭყონიამ და განმარტა, რომ სასწრაფო ღონისძიებაც გატარდა, კერძოდ, დაურეკეს მომწოდებელს და უთხრეს, რომ მხოლოდ ისეთ პროდუქტს მიიღებენ, სადაც ვადები გარკვევით იქნება მითითებული.
