რამდენიმე წუთის წინ დასრულდა ლანჩხუთში, ევგრაფ შევარდნაძის სახელობის ცენტრალურ სტადიონზე ლანჩხუთის „გურიას“ და ჩოხატაურის „ბახმაროს“ შეხვედრა.
ჩოხატაურელთა გუნდმა ლანჩხუთელები საკუთარ მოედანზე 0:1 დამარცხა.
მატჩი საკმაოდ დაძაბული გამოდგა. პირველი ტაიმი ფრედ, გოლის გარეშე დასრულდა. მეორე ტაიმის პირველივე წუთებში კი „გურიის“ კარი გიგა კვერენჩხილაძემ აიღო.
„ბახმაროელებმა“ მთელი 90 წუთის განმავლობაში მოახერხეს საკუთარი კარის დაცვა და ლანჩხუთში ჩასული გულშემატკივრების გახარებაც მოახერხეს. ისინი მოედნიდან დამსახურებული აპლოდისმენტების ფონზე გააცილეს.
აღსანიშნავია, რომ დღევანდელ თამაშში გამორჩეულად ითამაშა „ბახმაროელთა“ კაპიტანმა თეიმურაზ შარაშენიძემ. ასევე გამოირჩეოდნენ დიდია, წილოსანი, ჭკუასელი, ცინცაძე.
უნდა ითქვას ისიც, რომ ჩოხატაურელთა გუნდს დღევანდელ მატჩი ორი ძლიერი ფეხბურთელი აკლდა.
ლიგა 3-ში მოთამაშე „გურია“ და „ბახმარო“ დღეს მეორედ შეხვდნენ ერთმანეთს. პირველი შეხვედრა პირველ წრეში, ჩოხატაურში შედგა და მაშინაც „ბახმარომ“ მოიგო.
დღევანდელი თამაშის მოგებით ჩოხატაურის „ბახმარომ“ 3 ქულა დაიმსახურა და 72 ქულით გათამაშების ცხრილის მეორე ადგილს იკავებს.
მომდევნო თამაშს „ბახმარო“ ჩოხატაურში, ბორის პაიჭაძის სახელობის ცენტრალურ სტადიონზე ტყიბულის ‘მეშახტესთან“ 13 ნოემბერს, 14 საათზე გამართავს.
