„მუსლიმთა ეროვნული მშვიდობის სიმპოზიუმი 2018“ Ahmadiyya Muslim Asociation Georgia-ს ორგანიზებით თბილისში ჩატარდა.
ღონისძიებაში სხვადასხვა რელიგიის ლიდერებმა მიიღეს მონაწილეობა და იმსჯელეს იმის შესახებ, თუ რა წვლილის შეტანა შეუძლია რელიგიას დედამიწაზე მშვიდობის დასამყარებლად.
როგორც „გურია ნიუსთან“ საუბარში Ahmadiyya Muslim Asociation Georgia-ს პრეზიდენტი, ჯავად აჰმედ ბატი აღნიშნავს, მშვიდობის სიმპოზიუმი სხვადასხვა ქვეყნებში ტარდება, საქართველოში კი პირველად ჩატარდა.
კითხვაზე:_ ექმნებათ თუ არა რაიმე სახის დაბრკოლება საქართველოში მაცხოვრებელ მუსლიმებს_ ჯავად აჰმედ ბატი გვპასუხობს, რომ ხელისუფლება ყველაფერს აკეთებს, რაც მათ რელიგიის თავისუფლებისთვის სჭირდებათ.
როგორც ღონისძიებაზე აფრიკის კავშირის ელჩმა აშშ-ში აღინიშნა, მშვიდობა დღეს მოჩვენებითია და სხვადასხვა ქვეყანაში ომი რელიგიური ფაქტორით მიმდინარეობს, ომის შესაჩერებლად კი გამოსავალი ყველა რელიგიის წარმომადგენლის გაერთიანებაა.
„ახლა არის ისეთი მიდგომა, რომ მსოფლიოში მშვიდობაა, მაგრამ ეს არასწორია. დღეს კონფლიქტია ყველგან და უმეტესის გამომწვევი მიზეზი არის რელიგიის ფაქტორი, იღებენ იარაღს, აძლევენ ფულს ახალგაზრდებს და ომის პოვოცირება ხდება“,_განაცხადა მან.
როგორც „გურია ნიუსთან“ საუბარში საქართველოს ევანგელისტურ-ბაპტისტური ეკლესიის ეპისკოპოსი, რუსუდან გოცირიძე ამბობს, ყველა რელიგიაში არის მშვიდობის პოტენციალი და რელიგიაც მშვიდობის დასამყარებელ ენად უნდა იქნეს გამოყენებული.
„საბჭოთა კავშირის დანგრევის შემდეგ ვერ წარმოიდგენდა სამყარო, რომ 2018 წელს იქნებოდა საკითხი, რომელსაც კონფლიქტების კონტექსტში განვიხილავდით. ჯერჯერობით რელიგია არის ენა, რომელიც გამოიყენება დღევანდელ ცივილიზაციაში. ეს ენა ხან გამოიყენება ნეგატიურად, მაგრამ რაკი არსებობს და ჩვენ კი ომის და კონფლიქტის კონტექსტში ვმუშაობთ, თუ კი არსებობს ყველა რელიგიაში მშვიდობის პოტენციალი, რატომ არ უნდა გამოვიყენოთ რელიგია მშვიდობისთვის.
მშვიდობაზე ლაპარაკობს ვისაც არ ეზარება ყველა და თუ რელიგიური თემის წარმომადგენელია მაშინ, მით უფრო ხმამაღლა საუბრობს.
ამიტომ, ჩვენ რომ ახლა დავიწყოთ ჩვენი საღმრთო წერილი ან ჩვენი რელიგია რამდენად ლაპარაკობს მშვიდობაზე, წყლის ნაყვა იქნება. ყველა რელიგიაში არის მშვიდობის მესიჯი და მთავარია, ჩვენ ამ მესიჯების გადმოთარგმნა ყოველდღიურობაში როგორ გვესახება“,_ამბობს გოცირიძე.
როგორც საქართველოს ევანგელისტურ-ბაპტისტური ეკლესიის ეპისკოპოსმა სიმპოზიუმზე სიტყვით გამოსვლისას განაცხადა, „დიდება მაღალთა შინა ღმერთსა, ქვეყანასა ზედა მშვიდობა და კაცთა შორის სათნოება“_ ეს იყო პირველი მესიჯი ანგელოზებისგან, იმის შესახებ თუ რას მოიტანდა ქრისტე დედამიწაზე. ქრისტეს იყო მესია, რომელმაც მშვიდობა მოიტანა, მაგრამ ეს არ ნიშნავს, რომ არ ხდებოდა უსამართლობა მუსლიმების მიმართ, ქვეყანაზე კი მშვიდობა არის მაშინ, როცა ადგილი აქვს სამართლიანობას.
„ვილოცოთ დევნილებისთვის სირიაში, ჩვენ არ უნდა ვილოცოთ მხოლოდ ქრისტიანებისთვის, თუკი არ გვესმის რა ცუდ პირობებში უხდებათ ცხოვრება მუსლიმ ოჯახებს, თუკი მათთვის არ გვილოცია, რას ნიშნავს ეს?
აქ სხვადასხვა რელიგიის წარმომადგენლები ვართ შეკრებილი, მთავარია როგორ გავავრცელებთ და დავიცავთ მშვიდობას“,_განაცხადა გოცირიძემ.
