„ოპოზიცია, საკუთარი ბელადის თამადობით, მხოლოდ დესტრუქციის მოწყობაზეა ორიენტირებული. „ქართული ოცნების“ ადვოკატად ნამდვილად არ გამოვდგები, მაგრამ ხელისუფლება მათ მიერ გაკეთებულ განცხადებებზე მკაცრ რეაგირებას უნდა ახდენდეს“,_ აღნიშნა „გურია ნიუსთან“ დეპუტატმა დავით ჭიჭინაძემ.
მისივე თქმით, „შემოდგომამდე ქუჩაში იმ მოთხოვნით ყოფნა, რომ რიგგარეშე საპარლამენტო არჩევნები დაინიშნოს, არასწორია“.
როგორც ჭიჭინაძემ გვითხრა „პატრიოთა ალიანსის“ ფრაქციას გაზაფხულზე დატოვებს და იმ შემთხვევაში, თუ ხელისუფლება რადიკალურ ცვლილებებს არ განახორციელებს, მათ შორის, რიგგარეშე საპარლამენტო არჩევნების დანიშვნაზე უარს იტყვის, საკუთარ გუნდთან ერთად, რომლის შექმნას დეპუტატი თავად აპირებს, ცვლილებების განსახორციელებლად იბრძოლებს.
„ამ პარლამენტის მომავალს ვერ ვხედავ, რომელიც თავმჯდომარისა და დეპუტატის მიერ, ფაქტობრივად, გამოფიტულია. უპასუხისმგებლო ხალხის გვერდით ყოფნა მოსაბეზრებელია. მათ ყურებას გვერდიდან აღარ ვაპირებ.
ხალხი იმაზეა გადასული, 2020 წელს საკუთარი თავი როგორ დაიბინაონ. მაქსიმალურად ვცდილობ, თუ გარკვეული ტიპის ცვლილებები არ განხორციელდება, საპროტესტო მოძრაობა შევქმნა, რომელიც პოლიტიკური ძალის ჩამოყალიბებასა და ვადამდელი საპარლამენტო არჩევნების დანიშვნას შეუწყობს ხელს“,_ აღნიშნა ჭიჭინაძემ.
