„კონსტიტუციის განხილვების პროცესში, მმართველი პოლიტიკური ძალა ყველას გაემიჯნა და საკუთარ პოლიტიკურ გემოვნებას მოარგო კონსტიტუცია, მაშინ რატომ არ იფიქრა მოსალოდნელ შედეგებზე?! “_ აღნიშნა „გურია ნიუსთან“ იურისტმა ლევან ალაფიშვილმა, რომელიც პარლამენტის თავმჯდომარის ირაკლი კობახიძის განცხადებას გამოეხმაურა, რომლის მიხედვით, პარლამენტმა უზენაესი სასამართლოს მოსამართლეების საკითხის განხილვა საგაზაფხულო სესიამდე შეაჩერა.
ალაფიშვილის თქმით, პარლამენტმა სასამართლო სისტემაში მყოფ გავლენიან ჯგუფს განუსაზღვრელი უფლებამოსილება მიანიჭა, რაც შესაძლოა, ქართული სახელმწიფოებრიობის წინააღმდეგ იყოს გამოყენებული.
„საპრეზიდენტო არჩევნების ნებისმიერი შედეგით დასრულებას, მათ შორის, გრიგოლ ვაშაძის გამარჯვებას, სასამართლო სისტემაში მოკალათებული ჯგუფი ყველზე მეტად ელოდებოდა, რომელსაც კონსტიტუციამ განუსაზღვრელი ძალაუფლება და გავლენები მიანიჭა, როგორც მართლმსაჯულების სისტემაში, ასევე მართლმსაჯულების სისტემის მიღმა.
ალბათობა იმისა, რომ ამ ჯგუფს სხვადასხვა მიმართულებით, მათ შორის, პოლიტიკაზე გავლენის მოხდენის ამბიცია გაუჩნდეს, მაღალია. ეს ჯგუფი მიზანს მიაღწევს. მაქვს მოლოდინი იმისა, რომ ამ ჯგუფთან ურთიერთობაში, ეს პროცესი იქნება, ე.წ. პოლიტიკური გარიგების საგანი, რაც გრძელვადიან პოლიტიკურ პერსპექტივაში, ქართული დემოკრატიისა და სახელმწიფოებრივი სისტემის განვითარებას დიდ ზიანს მიაყენებს“,_ აღნიშნა ალაფიშვილმა.
