საქართველოს პარლამენტის თავმჯდომარე ირაკლი კობახიძე ამბობს, რომ მისთვის გაუგებარია რატომ დაუკავშირა ეკა ბესელიამ იურიდიულ საკითხთა კომიტეტის თავმჯდომარეობის თანამდებობიდან გადადგომა უზენაესი სასამართლოს მოსამართლეების საკითხს.
კობახიძის თქმით, მოსამართლეობის კანდიდატების საკითხზე პარტიის თავმჯდომარის მონაწილეობითაც გაიმართა შეხვედრა, სადაც ითქვა, რომ თითოეული კანდიდატი უნდა განხილულიყო ინდივიდუალურად და დეპუტატებს გადაწყვეტილების მიღების დროს საკუთარი რწმენით უნდა ემოქმედათ.
„ჩემთვის ცოტა გაუგებარია, ამ შემთხვევაში, ეკა ბესელიას განცხადების შინაარსი, რატომ დაუკავშირა მან თავისი გადადგომა ამ ყველაფერს. ანუ ლოგიკური საფუძველი აქ რეალურად არ ჩანს“, – განაცხადა ირაკლი კობახიძემ.
პარლამენტის თავმჯდომარე ამბობს, რომ ბესელიას გადადდგომის სხვა მიზეზი არსებობს, თუმცა, კობახიძემ ეს სხვა მიზეზი არ დაასახელა.
შეგახსენებთ, რომე ეკა ბესელიამ იურიდიული კომიტეტის თავმჯდომარის თანამდებობა დღეს დატოვა. იგი თანამდებობიდან წასვლას მოსამართლეების უვადოდ გამწესების საკითხს უკავშირდებს და ამბობს, რომ განსახილველად წარდგენილ სიაში არიან მოსამართლეები, რომლებიც მისი შვილის და ძმის საკითხებს განიხილავდნენ.
„ფიქრის შემდეგ მივიღე გადაწყვეტილება, დავტოვე იურიდიული კომიტეტის თავმჯდომარის თანამდებობა და ამ გადაწყვეტილებით გუშინ შევაჩერეთ პროცესი, რომელიც მიმაჩნია, იყო ძალიან საზიანო, ეხება უზენაესი სასამართლოს მოსამართლეების უვადოდ დანიშვნის ნაჩქარევ და გაუმართლებელ პროცესს. მივიღე ეს გადაწყვეტილება იმიტომ, რომ საზოგადოებას მიეცეს საშუალება პროცესი იხილოს გამჭვირვალე. სია უნდა იყოს გამჭვირვალე და არა შეჩერებული, უნდა იყოს ყველა პროცედურა გაწერილი.
სიაში არიან ადამიანები, რომლებიც არა მხოლოდ ჩემი შვილის და ძმის პოლიტიკური საქმის მოსამართლეები იყვნენ, სიაში არიან ადამიანები, რომლებიც ჩემი თანამებრძოლების პოლიტიკურად მოტივირებულ საქმეებზე იყვნენ მოსამართლეები. მიმაჩნია, მიმაჩნდა და ყოველთვის ეს განწყობა მექნება, რომ უზენაეს სასამართლოს უნდა ჰყავდეს ის მოსამართლეები, ის მაღალი კვალიფიკაციის და ისეთი რეპუტაციის მქონე იურისტები, რომლებიც არ ემსახურებოდნენ სააკაშვილის ძალადობრივ რეჟიმს. ჩემი მთავარი იდეალი ყოველთვის იყო, ყოველთვის იქნება სამართლიანობისთვის ბრძოლა,”- განაცხადა ეკა ბესელიამ.
