„ქართულ ოცნებას“ დაპირება, რომელიც მართლმსაჯულების სისტემის არასასურველი კადრებისგან გაწმენდას გულისხმობდა, ჰქონდა მაშინ, როცა ხელისუფლებაში კოალიციურად ვიყავით. ამის შემდეგ, სასამართლო სისტემაში სამართლიანობის აღდგენასთან დაკავშირებით, ბიძინა ივანიშვილის განწყობა შეიცვალა. როცა დღის წესრიგში მურუსიძის ყოფნა არ ყოფნის საკითხი დადგა, მაშინ მინისტრი ვიყავი და სამართლიანობის აღდგენის მიზნით, არც ერთი ნაბიჯით უკან არ დამიხევია“,_ აღნიშნა „გურია ნიუსთან“ თავდაცვის ყოფილმა მინისტრმა თინათინ ხიდაშელმა.
მისივე თქმით, პარლამენტის თავმჯდომარე ირაკლი კობახიძეს ლევან მურუსიძის მსგავსი მოსამართლეების მიმართ უარყოფითი დამოკიდებულება არასდროს ჰქონია.
_ ქალბატონო თინათინ, საქართველოს პარლამენტში იუსტიციის უმაღლესი საბჭოს მიერ წარდგენილ მოსამართლეთა სიას „ქართულ ოცნებაში“ რამდენიმე ლობისტი გამოუჩნდა და ალბათობა იმისა, რომ მიხეილ სააკაშვილის მსახურობაში ეჭვმიტანილი მოსამართლეები კვლავ უვადოდ გასამწესებელ მოსამართლეთა სიაში ვიხილოთ, საკმაოდ მაღალია. აღნიშნულ საკითხთან დაკავშირებით, როგორია თქვენი მოლოდინი?
_ პარლამენტმა მოსამართლეთა სიის განხილვა იმ იმედით შეაჩერა, რომ ეგონათ, ამ დროის განმავლობაში, გუნდის შიგნით გაუგებრობებს მოაგვარებდნენ, რის შემდეგ ყველაფერი ჩვეულ კალაპოტში ჩადგებოდა. ბიძინა ივანიშვილმა ორი წლის წინ გვითხრა, ლევან მურუსიძე და მისნაირი მოსამართლეები სისტემის მსხვერპლები არიან და მათ რეაბილიტაცია სჭირდებათო. ერთადერთი სწორი გადაწყვეტილება იქნებოდა, იურიდიულ საკითხთა კომიტეტსა და პარლამენტს კენჭის ყრის შედეგად ჩაეგდოთ მოსამართლეთა სია, რაც იუსტიციის უმაღლესი საბჭოსთვის პირდაპირი პოლიტიკური გზავნილი იქნებოდა. ასე არ მოხდა და მერე დღეს ლევან მურუსიძე თანამდებობაზე უვადოდ დანიშნულ მოსამართლედ ვიხილეთ.
_“ქართულ ოცნებაში“ არ მალავენ, რომ იუსტიციის უმაღლესი საბჭოს მიერ წარდგენილი მოსამართლეების უვადოდ განმწესებას პარლამენტის თავმჯდომარეც ლობირებს. რამდენიმე დღის წინ ირაკლი კობახიძეს არ მორიდებია ეთქვა: “როცა პოლიტიკურმა ოპონენტებმა დაინახეს, რომ მურუსიძე დამოუკიდებელი გახდა, მაშინვე დაიწყო პოლიტიკური შეტევა მის წინააღმდეგო“. როგორ ფიქრობთ, „ქართული ოცნების“ ახალ გვარდიას ნამდვილად სჯერა მოსამართლეთა ნაწილის ტრანსფორმაციის?
_ ირაკლი კობახიძეს არასდროს ჰქონია პრობლემა ლევან მურუსიძესთან და მისნაირ მოსამართლეებთან. მას პრობლემა არ ჰქონია არც მაშინ, როცა ეს ადამიანები „ნაციონალური მოძრაობის“ დროს მორჩილი მართლმსაჯულებით იყვნენ დაკავებულები და იმავეს აკეთებენ „ქართული ოცნების“ პირობებში. როცა პოლიტიკოსი გულწრფელია, ცუდი არ არის. თუკი ირაკლი კობახიძე პირდაპირ ამბობს, რომ პრობლემას ვერ ხედავს მორჩილ და დამონებულ მოსამართლეებში, რომლებიც უკვე გასვრილები არიან, ვუწონებ ასეთ გულღიაობას.
_ საზოგადოებას ახსოვს, რომ მმართველი პარტიის ერთ-ერთი მთავარი დაპირება მართლმსაჯულების სისტემიდან არასასურველი კადრების ჩამოცილებაც იყო. სასამართლო სისტემაში სამართლიანობის აღდგენის პერსპექტივა, ჯერჯერობით, არ ჩანს. როგორ ფიქრობთ, რატომ?
_ „ქართული ოცნებას“ აღნიშნული დაპირება ჰქონდა მაშინ, როცა ხელისუფლებაში კოალიციურად ვიყავით. ამის შემდეგ, სამართლიანობის აღდგენასთან დაკავშირებით, ბიძინა ივანიშვილის განწყობა შეიცვალა. როცა მურუსიძის ყოფნა-არყოფნის საკითხი დღის წესრიგში დადგა, მაშინ მინისტრი ვიყავი და არც ერთი ნაბიჯით უკან არ დამიხევია. პირველი საჯაროდ გამოხატული დიდი კონფლიქტი ჩვენსა და ბიძინა ივანიშვილს შორის, სწორედ ლევან მურუსიძის გამო მოხდა. ბიძინა ივანიშვილმა საკუთარი არჩევანი 2016 წელს კოლექტიური მურუსიძეების სასარგებლოდ უკვე გააკეთა.
_ „ქართულ ოცნებაში“ ძველსა და ახალ გვარდიას შორის სასამართლო სისტემასთან დაკავშირებული შეუთანხმებლობა როგორ დასრულდება?
_იმავე თემასთან დაკავშირებით, 2016 წელს გუნდი ერთხელ უკვე გაიყო. მაშინ პარტიიდან წავიდა ყველა, ვინც მანკიერ სასამართლო სისტემას ეწინააღმდეგებოდა. ახლა ხელისუფლებაში ერთმანეთთან ბრძოლის მეორე სერია დაიწყო. იმ ადამიანებმა, რომლებმაც მაშინ „ქართულ ოცნებაში“ მურუსიძის გვერდით დარჩენა ამჯობინეს, დღეს აღნიშნულს აპროტესტებენ, რადგან 2020 წლისთვის იმავეს გაკეთება მოუწევდათ, ამიტომ წინასწარ თადარიგი დაიჭირეს. “ქართული ოცნების“ დეპუტატებს პარლამენტში ყოფნა ორი წლით აქვთ გარანტირებული, ამიტომ ორი წლით ადრე თუ ჩამოაყალიბებენ საპროტესტო მოძრაობას, შესაძლოა, ხელისუფლებაში დარჩენის მეტი შესაძლებლობა მიეცეთ, რაც მეეჭვება, მაგრამ მათი ხედვა, როგორც ჩანს, ასეთია.
