დიდ დიღომში მომხდარ აფეთქებასთან დაკავშირებით, რის შედეგადაც 4 ადამიანი, მათ შორის მცირეწლოვანი დაიღუპა და რამდენიმე დაშავდა, კომპანია “ყაზტრანსგაზ-თბილისი” განცხადებას ავრცელებს.
„ყაზტრანსგაზ-თბილისი“ მუშაობს საგანგებო რეჟიმში. ამ დროისთვის მიმდინარეობს გამოძიება. კომპანიის ხელმძღვანელები პირველივე წუთებიდანვე იმყოფებიან შემთხვევის ადგილზე. დეტალების დაზუსტების შემდეგ გაკეთდება ოფიციალური განცხადება. კომპანია „ყაზტრანსგაზ-თბილისი“ უსამძიმრებს გარდაცვლილთა ოჯახის წევრებს”, – ნათქვამია განცხადებაში.
აფეთქება დიდ დიღომში წუხელ მოხდა. წინასწარი ინფორმაციით, მიზეზი გაზის გაჟონვაა. ადგილობრივები ჰყვებიან, რომ მთელი დღის განმავლობაში იგრძნობოდა გაზის სუნი, რის გამოც მათ „ყაზტრანსგაზის“ წარმომადგენლები გამოიძახეს, თუმცა მათ თქვეს რომ პრობლემა არ იყო და ტერიტორია დატოვეს.
