ოზურგეთის მუნიციპალიტეტის სოფელ ლიხაურში დიდი ხანია, სასმელი წყლის პრობლემა დგას. სოფელში, ათასამდე კომლი ფიქსირდება და მესამედს საკუთარ ეზოში ჭა აქვს, მდინარე აჭის სათავესთან არსებული ნაგებობა კი სოფელს, ე.წ. „ტექნიკურ წყლით“ ამარაგებს. ლიხაურელთა სრული უმრავლესობა მიიჩნევს, რომ 21-ე საუკუნეში ასეთი მომსახურება დიდი სოფლისთვის მხოლოდ მწყურვალისთვის სასწრაფოდ წყლის მიწოდებას ნიშნავს, რომ ადამიანი უცებ არ დაიხრჩვეს ან ელემენტარული ჰიგიენური პირობები მოიწესრიგოს და მეტს არაფერს.
„დიდი ხანია, უწყლობაზე ვსაუბრობთ, ძველისძველი წყალგაყვანილობის მილები წარამარა სკდება და ყოველ კვირაში ხან სად მოჩუხჩუხებს წყალი, ხან _ სად. გზისპირა არხები ისეა ამოვსებული და დანაგვიანებული, გენერალურად თუ არ გაიწმინდა, ამას მოსახლეობა საკუთარი ძალებით ვერ იზამს. არის აღმართები და უბნები, სადაც მისვლა შეუძლებელია და ისეა ნიაღვრისგან ჩარეცხილი, სასწრაფო შეკეთება აუცილებელია. ასევე, ხალხი ითხოვს ქუჩებში გარე განათებას, ნაწილობრივ მაინც“, _ ამბობენ ლიხაურელები.
როცა „გურია ნიუსი“ ლიხაურში ჩავიდა, ცენტრალურ გზაზე შპს „სატისის“ წარმომადგენლები, მუნიციპალიტეტის მერის წარმომადგენელთან, ვანო ვაშაყმაძესთან ერთად დაგვხვდნენ და დაზიანებული წყალსადენი მილის შეკეთებაზე სპეციალური ტექნიკით მუშაობდნენ.
_ თუჯის მილი სიძველისგან გასკდა. ასე ხშირად ხდება და რა ვქნათ? ოცდაათი დაზიანება დავთვალეთ და რიგრიგობით ვაკეთებთ. თქვენ ვინ მოგაწოდათ ინფორმაცია? _ სანამ ახალი სათავე ნაგებობა არ გაკეთდება მდინარე აჭის სათავესთან, მანამდე იქნება პრობლემა და მოსახლეობას ექნება ეს წყალი, რომელიც ტექნიკურად არის მიჩნეული. ჩვენზე რაც არის დამოკიდებული, ვაკეთებთ. ახლა დაგვრჩა შვიდი დაზიანებული ადგილი და ისიც შეკეთდება, _ გვითხრა ვაშაყმაძემ.
ლიხაურელები მანანა ცეცხლაძე და სიმონ ირემაძე „გურია ნიუსთან“ საუბრისას აღნიშნავენ, რომ უწყლობის და უგზოობის გამო განსაკუთრებით მძიმე მდგომარეობაშია ირემაძეების უბანი.
_ სოფელი დიდია, რელიეფიც მეტ-ნაკლებად ვაკე ან დამრეცი. ამიტომ პრობლემაც მეტ-ნაკლები სიმძიმით არის გამოხატული. ჩვენს უბანში აღმართიანი გზა მთლიანად ნიაღვრისგან არის ორმოებად ქცეული და მალე „ურალი“ ვერ გაივლის. წყალს რაც შეეხება, 11 ოჯახი ვცხოვრობთ აქ და განსაკუთრებით, ზაფხულში იწყება ჩვენი წამება, როცა მდინარე აჭი ძალიან იკლებს. ამ დროს ის ტექნიკური წყალიც არ გვაქვს, რომელიც ღელიდან პირდაპირ მილებში მიედინება. გავდივართ ტყიან ნაწილში, მაღლობებზე. ვთხრით ორმოებს, სადაც წყალი გამოედინება და ასე ვახერხებთ მილებით სახლამდე დროებით მივიყვანოთ. ხან წყლის ტუმბოებითაც ვქაჩავთ. ეს საქმეა? ვხუმრობ, რომ მოვკვდები, მართლა ონკანი დამიხატონ საფლავის ქვაზე, სურათის ნაცვლად, _ გვეუბნება მანანა ცეცხლაძე.
_ უმჯობესია, ვინმე ინვესტორი მოვიდეს, თუ მთავრობა ვერ ახერხებს სათავე ნაგებობის განახლებას. გვირჩევნია, ფული გადავიხადოთ, დაგვიდგან მრიცხველები. რას გადაგვახდევინებენ ამდენს, რასაც ჩვენ ყოველ წელს დაზიანებული მილების აღსადგენად ვხარჯავთ. ხან კიდევ ტყეში ვთხრით ორმოებს, რომ სადმე წყალი აღმოვაჩინოთ და მერე იქედან ვზიდოთ, ასე ვართ აქ, _ გვითხრა სიმონ ირემაძემ.
ლიხაურელები ცენტრალური და შიდა გზების გასწვრივ მთლიანად ამოვსებული არხების შესახებაც საუბრობენ. მათი თქმით, არხებიდან მცირე წვიმის დროსაც კი ნიაღვარი გზებზე მოედინება და ფეხით გავლა შეუძლებელია.
მერის წარმომადგენელი სოფელში ვანო ვაშაყმაძე განმარტავს, აღმართების მოსაწესრიგებლად მზადება დაწყებულია. მოტანილია სპეციალური მავთულბადეები.
_ აღმართებს რაც შეეხება, ჯერ სასაფლაოს აღმართის მოწესრიგებაა აუცილებელი. მავთულბადეები უკვე გადმოგვცა მუნიციპალიტეტმა. სადაც ყველაზე მეტად ზიანდება და ასვლა შეზღუდულია, ჯერ იქ გავაკეთებთ. ველოდებით ბეტონს. ეს უნდა გაკეთდეს მოსახლეობის თანამონაწილეობით. შესაძლოა, ეს სოფლის მხარდამჭერ პროექტშიც მოხვდეს. 13 მაისს დაგეგმილია სოფლის კრება და იქ კონკრეტულად იტყვიან, უმრავლესობა რას გადაწყვეტს. რაც შეეხება არხებს, ნაწილობრივ, მოსახლეობა ახერხებს გაწმენდას. შესაძლოა, სოფლის მხარდამჭერ პროექტში არხების გაწმენდაც დაიგეგმოს. ისე, ნახეთ, სანაგვე ურნა დგას და ირგვლივ რამდენი ნაგავი ყრია, _ გვითხრა ვაშაყმაძემ.
„გურია ნიუსმა“ მართლაც დაფიქსირა კადრები, სადაც ნაგვის ურნის გასწვრივ მდებარე არხი ავსებულია სხვადასხვა ნარჩენით.
ლიხაურელთა აზრით, არხები, რომლებიც კომუნისტების მმართველობის შემდეგ არ გაწმენდილა, საჭიროა, ერთხელ საფუძვლიანად გაიწმინდოს. შემდეგ კი თითოეულმა ოჯახმა იზრუნოს მის წესრიგში ყოფნაზე.
სოფლის მკვიდრი ნინო ვასაძე ამბობს, რომ სანიაღვრე არხების გაწმენდაზე მოსახლეობაც უნდა ზრუნავდეს.
_ ეს არის ჩემი პრობლემაც. მამაჩემმა ერთხელ ტრაქტორით ამოწმინდა საკუთარი ინიციატივით. ოჯახებმაც თუ არ იზრუნეს საკუთარ ეზოსთან არხის გაწმენდაზე, მთავრობა მოვა და გაასუფთავებს? სხვის იმედად არ უნდა იყოს ადამიანი, როცა თავისი გასაკეთებელია საქმე. ისე, კარგია თუ ერთხელ კაპიტალურად გაიწმინდება და მერე გარკვეულ მონაკვეთებზე, საცხოვრებელი სახლების მიხედვით, თითოეული ოჯახი აიღებს პასუხისმგებლობას, ეს იქნება სწორი მიდგომა, _ ამბობს ის.
ვანო ვაშაყმაძემ „გურია ნიუსთან“ გარე განათების საკითხზეც ისაუბრა.
_ ცენტრალურ გზაზე არის განათება. რაც შეეხება შიდა გზებს, ლიხაური ძალიან დიდი სოფელია და ამ ეტაპზე უფრო პრიორიტეტული საქმეებია საკეთებელი. კონკრეტულად, თუნდაც წყლის, გზის, სანიაღვრე არების პრობლემები. რა თქმა უნდა, გარე განათებაც აუცილებელია და ერთბაშად არ მოგვარდება. ეტაპობრივად კი, დარწმუნებული ვარ, ესეც გაკეთდება, _ გვითხრა მუნიციპალიტეტის მერის წარმომადგენელმა.
ლიხაურელთა პრობლემის თემაზე ოზურგეთის მუნიციპალიტეტის მერიის პრესსამსახურიდან მოწოდებული ინფორმაციიდან ირკვევა, რომ იმ შემთხვევაში, თუ სამინისტრო ობიექტს მუნიციპალიტეტს გადასცემს, დაიგეგმება მისი რეაბილიტაცია.
„აჭის სათავე ნაგებობა მუნიციპალიტეტის ბაზაზე არ ირიცხება. მიმდინარეობს ამ მიმართულებით მუშაობა. იმ შემთხვევაში, თუ სამინისტრო ობიექტს მუნიციპალიტეტს გადმოსცემს, დაიგეგმება მისი რეაბილიტაცია. ლიხაურის ადმინისტრაციულ ერთეულში რთულ საგზაო მონაკვეთებზე ბეტონის საფარის მოსაწყობად მუნიციპალიტეტის მერიამ 500მ სიგრძის მავთულბადე და სხვა საჭირო მასალა შეიძინა. მათ შორის იგეგმება დობორჯგინიძეების აღმართის რეაბილიტაცია. ხოლო დანარჩენი საგზაო მონაკვეთები ეტაპობრივად მოწესრიგდება. სოფლის მხარდაჭერის პროგრამა ითვალისწინებს სანიაღვრე არხების წმენდა-დასუფთავებას. იმ შემთხვევაში თუ ეს იქნება ადგილობრივი მოსახლეობის პრიორიტეტი, მათ ეს საკითხი უნდა დასვან სოფლის კრება-კონსულტაციაზე, რომელიც ლიხაურის ადმინისტრაციულ ერთეულში გაიმართება 13 თებერვალს, 11 საათზე.“
