ვაზისუბანში, მეოთხე საოჯახო სამედიცინო ცენტრთან, რომლის თანამშრომლებიც დღეს დილიდან აქციას მართავენ, პროფკავშირის წარმომადგენლები მივიდნენ.
მათი ინიციატივით, შეიქმნა სამუშაო ჯგუფი და დამსაქმებელს შეხვდა.
შეხვედრის შედეგად შედგა შეთანხმება, რომლის მიხედვითაც, დამსაქმებელმა დასაქმებულებს დაგვიანებული ხელფასები 10 დღის ვადაში უნდა მისცეს.
გარდა ამისა, დასაქმებულსა და დამსაქმებელს შორის უნდა დაიდოს ხელშეკრულება, სადაც გათვალისწინებული იქნება შრომის პირობები, ხოლო ხელფასების დაგვიანების შემთხვევაში გაზრდილი ტარიფით უნდა ანაზღაურდეს.
მათი თქმით, ისინი სამედიცინო ცენტრში ხვალ, სმენის გადაბარების დროს მივლენ, რომ ჩამოყალიბდეს პირველადი პროფკავშირული ორგანიზაცია, რომელიც მდგომარეობას გააკონტროლებს.
რამდენიმე თვის განმავლობაში აუღებელი ხელფასები, უშუქობა, უწყლობა და გათბობის არ ქონა_ის მიზეზებია, რამაც სამედიცონო ცენტრის ექიმები ქუჩაში გამოიყვანა.
როგორც სამედიცინო ცენტრის ხელმძღვანელი ვახტანგ ჭედია ამბობს, ფინანსურ პრობლემებს მათ ჯანდაცვის სამინისტრო უქმნის.
მისი თქმით, კლინიკა საყოველთაო ჯანდაცვის პროგრამაშია ჩართული, თუმცა, მომსახურების ანაზღაურება სახელმწიფოს მხრიდან არასრულად ხდება.
„გურია ნიუსი“ აღნიშნულ საკითხთან დაკავშირებით საყოველთაო ჯანმრთელობის დაცვის მართვის დეპარტამენტის უფროსს, მაია ხომერიკს ესაუბრა.
როგორც ის ამბობს, სამედიცინო ცენტრი დაჯარიმებულია, თუმცა, ამ ეტაპზე დაჯარიმებულ სამედიცინო ცენტრებს მიღება-ჩაბარების აქტიდან თანხა არ ეჭრებათ. ის კლინიკის მიერ ხელფასების გაუცემლობას სამედიცინო ცენტრის შიდა მენეჯმენტის პრობლემას უკავშირებს.
„საყოველთაო ჯანდაცვის პროგრამის ფარგლებში ყოველწლიურად ხორციელდება გეგმიური კონტროლი და რევიზია. კონტროლის ეტაპზე მოხდა საჯარიმო სანქციის დაკისრება კლინიკაზე პროგრამით გათვალისწინებული პირობების დარღვევის გამო იყო. ამ ეტაპზე არცერთ დაჯარიმებულ ცენტრს მიღება-ჩაბარების აქტიდან არ უკავდება თანხა, რადგან საჯარიმო სანქციების ოდენობისა და ადმინისტრირების წესის გადახედვა მიმდინარეობს, რომლის განხილვაც, მთავრობის სხდომაზე 1 თებერვლის შემდეგ მოხდება. სამ თვეზე მეტია მონოტორიუმი გამოცხადდა და შესაბამისად, ამ ტიპის პრეტენზია გაუგებარია. ეს შიდა მენეჯმენტის პრობლემაა და არ არის საყოველთაო ჯანდაცვის პროგრამიდან გარკვეული შეფერხებებით განპირობებული, იმიტომ რომ კლინიკას წარმოდგენილი შესრულებული სამუშაოს კვალობაზე ერიცხება შესაბამისი თანხები“,_ამბობს ის.
