ლანჩხუთში, მგელაძის ქუჩაზე, ე. წ. “მეურნეობის ბინებში” მძიმე სოციალურ პირობებში ია მეგრელიშვილი მეუღლესთან და ორ შვილთან _ 13 წლის ლუკასთან და 10 წლის ბესოსთან ერთად ერთ ოთახში წლებია ცხოვრობს.
მიუხედავად იმისა, რომ ოჯახი რამდენიმე წელია სოციალურ შემწეობას იღებს, მაინც ძალიან უჭირთ თვიდან თვემდე თავის გატანა. ყველაფერ ამას ემატება პატარა ბესოს ავადმყოფობა _ ის ცერებრალური დამბლითაა დაავადებული და დამოუკიდებლად ვერ გადაადგილდება. მას გასულ წელს ოპერაცია გაუკეთეს, მაგრამ შემდგომი რეაბილიტაციის კურსი ოჯახმა უსახსრობის გამო ვეღარ ჩაუტარა და შესაბამისად, ბავშვის ჯანმრთელობის მდგომარეობაც არ გაუმჯობესებულა. ლუკას, როცა მშობლები სამუშაოდ არიან წასულები, ძმის მოვლა უწევს. იგი ოჯახის საქმეებშიც ხშირად ეხმარება მშობლებს.
ბავშვების დედა “გურია ნიუსთან” საუბარში ამბობს, რომ თვიდან თვემდე ძალიან უჭირთ თავის გატანა და შვილებისთვის ლუკმა-პურის შოვნა, ახლა კი უფასო სასადილოს ბენეფიციართა სიიდანაც ამოიღეს:
“ისედაც მძიმე ყოფაში ვართ _ ერთ ოთახში ვცხოვრობთ. 8 წელია უფასო სასადილოში დავდიოდი და ახლა მითხრეს, რომ, თურმე, არ ვყოფილვარ შეჭირვებული. სახელმწიფო ფულს მიხდის, როგორც შეჭირვებულ ადამიანს და სასადილოში მეუბნებიან, მარტო ერთის ულუფას მოგცემთ, მეორე კი არ გეკუთვნისო. ეს ნამდვილად სიურპრიზი იყო ჩემთვის. აღდგომის წინა დღეს მივედი, რათა კუთვნილი საჭმელი წამომეღო სახლში. მე და ჩემს ბესოს გვაძლევდნენ, რომელსაც მერე ქმარს და მეორე შვილს ვუნაწილებდი. საჩუქარი გადმომცეს სააღდგომოდ, ძალიან გამიხარდა და იქვე მომიგეს, ხვალიდან ორის ულუფას ვერ მოგცემთ, ვინაიდან შენ არ გიჭირსო. საიდან მოიტანეს, რომ გავმდიდრებულვარ, არ ვიცი. იქნებ, მითხრას ვინმემ, რა მომემატა?! არსად ვმუშაობ, სახლში ვარ და ვუვლი ჩემს ავადმყოფ შვილს. არ ვჭირდები ეტყობა არავის. ჩემს თავს არ ვამბობ, მაგრამ შვილებს რა ვუყო, რითი გამოვკვებო?!” _ ამბობს სოციალურად დაუცველი ია მეგრელიშვილი.
ლანჩხუთის მერიაში ია მეგრელიშვილის უფასო კვების სიიდან ამოღების ფაქტს არ ადასტურებენ და ამბობენ, რომ სასადილოს მომსახურებით მხოლოდ მისი შშმ შვილი, ბესო მოსწრაფეშვილი სარგებლობდა, თავად არც არასდროს ყოფილა სასადილოს ბენეფიციარი:
“ლანჩხუთის მუნიციპალიტეტის “სოციალური და ჯანდაცვის” სამსახურის მიერ ჩატარდა მონიტორინგი და ამ დროისთვის პროგრამით _ “უფასო სასადილო მზრუნველობამოკლებულთათვის” 98 ბენეფიციარი სარგებლობს. აღნიშნული პროგრამა გათვალისწინებულია სოციალურად დაუცველ მოხუცებსა და შეზღუდული შესაძლებლობის მქონე პირებზე. აქედან გამომდინარე, ქალბატონია ია მეგრელიშვილი ბენეფიციართა სიაში არ ყოფილა, საკვებს მისი შვილი იღებდა, რომელიც შშმ პირია”, _ გვითხრეს მერიაში და აქვე ისიც დასძინეს, რომ ხშირ შემთხვევაში, სასადილოს მესვეურები კეთილ ნებას იჩენდნენ და როცა საკვები ზედმეტი რჩებოდათ, მას ია მეგრელიშვილს უწილადებდნენ.
