მართვის მოწმობის აღების წესში ცვლილებები შედის, ჩნდება სატრანსპორტო საშუალების მართვის ახალი კატეგორია და იცვლება, როგორც მართვის მოწმობის ასაღები გამოცდების საფასური, ასევე, მათი აღების ასაკიც.
რა არის ცვლილებების მიზანი, რა ცვლილებები იგეგმება შინაგან საქმეთა სამინისტროს კანონპროექტის მიხედვით მართვის მოწმობის აღებასთან დაკავშირებით და როდიდან შევა ძალაში _ ამ კითხვებით „გურია ნიუსმა“ შინაგან საქმეთა სამინისტროს მომსახურების სააგენტოს მიმართა.
როგორც უწყებაში ამბობენ, ევროკავშირთან ასოცირების ხელშეკრულების ფარგლებში საქართველომ აიღო ვალდებულება დაუახლოვოს თავისი კანონმდებლობა ევროკავშირის კანონმდებლობას. შეთანხმების მიხედვით საქართველოს აქვს ნაკისრი ვალდებულება, შეასრულოს მართვის მოწმობების თაობაზე ევროპარლამენტისა და ევროსაბჭოს დირექტივა, ასევე, სატრანსპორტო საშუალების კატეგორიების შესაბამისობაში მოყვანა და მძღოლების მინიმალური ასაკის დადგენა. ცვლილება, მიზნად ისახავს საქართველოს საერთაშორისო ვალდებულების შესრულებას, სატრანსპორტო საშუალების მართვის უფლების მისაღები გამოცდის სისტემის დახვეწას და საგზაო მოძრაობის უსაფრთხოების ამაღლებას.
შინაგან საქმეთა სამინისტროს კანონპროექტის მიხედვით კი მართვის მოწმობის აღებასთან დაკავშირებით შემდეგი ცვლილებები იგეგმება:
„კანონპროექტის მიხედვით, მართვის უფლების მისაღები გამოცდის პრაქტიკული ნაწილი ორეტაპიანი ხდება. პირველი ეტაპი ჩატარდება დახურულ საგამოცდო სივრცეში მოედანზე, ხოლო მეორე ეტაპი ჩატარდება ქალაქში რეალური საგზაო მოძრაობის პირობებში;
იცვლება მართვის მოწმობის გამოცდების საფასო პოლიტიკა, კერძოდ, მართვის მოწმობის თეორიული გამოცდა ნაცვლად 40 ლარისა ეღირება 20 ლარი. B კატეგორიის სატრანსპორტო საშუალების მართვის უფლების მისაღები პრაქტიკული გამოცდის პირველ ეტაპზე ერთჯერადად დაშვების საფასური განისაზღვრება 40 ლარი, მეორე ეტაპზე ერთჯერადად დაშვებისთვის 90 ლარი. ამასთან სხვა კატეგორიის სატრანსპორტო საშუალებებისთვის მეორე ეტაპზე ერთჯერადად დაშვების საფასური იქნება 150 ლარი;
მართვის მოწმობის მისაღები თეორიული გამოცდის მოქმედების ვადა 1 თვიდან იზრდება 1-წლამდე;
შემოდის სატრანსპორტო საშუალების ახალი კატეგორია AM, რომელიც აერთიანებს მოპედებსა და მსუბუქ კვადროციკლებს, რომელთა მინიმალური სიჩქარე აღემატება 25 კმ/სთ-ს და სავალდებულო ხდება მათი რეგისტრაცია.
საჭირო გახდება AM კატეგორიის მართვის მოწმობა, რომლის გაცემაც მოხდება გამარტივებულად, მხოლოდ თეორიული გამოცდის ჩაბარებით. AM კატეგორიის სატრანსპორტო საშუალებისთვის მართვის მოწმობის უფლების მინიჭება მოხდება 16 წლიდან.
B კატეგორიის სატრანსპორტო საშუალებების და A1 (მოტოციკლი) ქვეკატეგორიის მართვის უფლებისთვის დადგენილი მინიმალური ასაკი იცვლება და ნაცვლად 17 წლისა, ხდება 18 წელი“, _ ამბობენ შინაგან საქმეთა სამინისტროს მომსახურების სააგენტოში.
რაც შეეხება აღნიშული ცვლილებების ძალაში შესვლას, კანონპროექტი ამ ეტაპზე განიხილება საკანონმდებლო ორგანოს საპარლამენტო კომიტეტებში.
