7 სექტემბერს, შეკვეთილში, „ბლექსი არენას“ დარბაზში, ფოლკლორის საერთაშორისი ფესტივალი უკვე მესამედ გაიხსნა.
საქართველოს ფოლკლორის სახელმწიფო ცენტრის აღმასრულებელი დირექტორი, გიორგი დონაძე მაყურებელს მიესალმა და მადლობა გადაუხადა:
_ მადლობას გიხდით მობრძანებისთვის. უკვე მესამედ იხსნება ფოლკლორის საერთაშორისო ფესტივალი და თქვენი თანადგომით, ეს საქმე ემსახურება ჩვენი, მსოფლიოს ხალხთა ფოლკლორის პოპულარიზაციას. წინ ძალზე საინტერესო კონცერტი გელით, ხვალ კი რაჭაში გაგრძელდება ფესტივალი, – უთხრა მან კონცერტზე მისულ საზოგადოებას.
მაყურებლის წინაშე თანმიმდევრულად წარდგნენ: კახეთიდან „შილდა“ ულამაზესი მრავალჟამიერით, გურიიდან ცნობილი ტრიო _ „შალვა ჩემო“, რომლის შემადგენლობაში განუმეურებელმა ლევან ნინიძემ, ტრისტან სიხარულიძემ და მერაბ კალანდაძემ „სისონაი დარჩიაი“ ჩვეული მაღალი კლასით შეასრულეს.
„ბასიანის“ და „ ქართული ხმების“ გამოსვლა მაყურებლის ბჭობის საგანი გახდა _ ხანგრძლივ ტაშსა და ემოციას ურთიერთგადაძახილები და კომენტარები ახლდა, „ორი საოცარი ანსამბლი ერთმანეთს რომ ტოლს არ უდებს, ესაა ჩვენი უდიდესი ბედნიერება და სიმაყე“, _ ამბობდნენ კმაყოფილებით სავსე მაყურებლები.
მწვერვალების სიმაღლე და იდუმალება ჩამოიტანა თავისი შემოქმედებით სვანეთიდან, ფოლკლორულმა ანსამბლმა „რიჰომ“.
_ ქუთაისის სახელმწიფო ქორეოგრაფიული ანსამბლის მიერ შესრულებული „ხორუმი“, ეს არის პრომეთესეული ცეცხლი და იდუმალება. ბევრჯერ უნდა ვნახოთ ეს ვიდეო, შესრულების ახალი კლასი, ახალი სიმაღლე, სასწაული _ ასე შეაფასეს მაყურებლებმა, დიანა კვარაცხელიამ, ნინო გარაყანიძემ და ასმათ მელიავამ ანსამბლის მიერ შესრულებული ცეკვა.
_ „მიდი, ბაბუ, მიდი!“- წარმოუდგენელი აჟიოტაჟი და დაუსრულებელი ტაში მოჰყვა ბათუმის უხუცესთა ანსამბლ „ბერმუხას“ სოლისტის, 96 წლის ილჰამედ ირემაძის სცენაზე გამოჩენას. ფეხზე წამომდგარი დარბაზის წინაშე, ემოციით აზვირთებულ მაყურებელს, ირემაძესთან ერთად, მისი გუნდის წევრებმა, 80 წლის რეზო აბულაძემ, 80 წლის ოთო გაბოძემ და სხვებმა, აჩვენეს, თუ როგორ არის ფოლკლორი უძველესი დროიდან ქართველი კაცის სისხლხორცად ქცეული და მის სახეს წარმოადგენს.
უცხოელი მეგობრებიდან მაყურებლის წინაშე წარდგნენ სარდინიის (იტალია) კვარტეტი და კორსიკის (საფრანგეთი) ფოკლორული ჯგუფი, რომლის შესრულებულმა „თბილისომ“, როგორც ქართულ, ისე ფრანგულ ენაზე, უხუცესების გამოსვლის მსგავსად, მაყურებელი ისე აღაფრთოვანა, რომ სცენიდან დიდხანს არ გაუშვეს.
საღამო ყველა ფოლკლორული ანსამბლის მიერ, ერთად შესრულებული „ჩაკრულოს“ დაგუგუნებით დასრულდა.
8 სექტემბერს საერთასორისო ფესტივალი რაჭაში, ამბროლურში გრძელდება, სადაც უცხოური ანსამბლებიდან შეემატა პოლონეთის და და ლატვიის ფოლკლორული გუნდები.
ფოლკლორის საერთთაშორისო ფესტივალი, რაჭაშივე, ქალაქ ონში დაიხურება.
