ივლისის ბოლოს და აგვისტოს პირველ ნახევართან შედარებით, ოზურგეთში თხილის ფასი დაეცა. თუ დასაწყისში, ცნობილი ჩაქუჩით გატეხვის მეთოდით, ვარგისი თუ უვარგისი ერთი ცალი თხილი 40-45 თეთრი ღირდა და ამის მიხედვით უმატებდნენ ან პირიქით, აკლებდნენ ფასს, ახლა ეს პროცესი მხოლოდ იმით შეიცვალა, რომ ერთი ცალის ფასი 25-30 თეთრამდე ჩამოსწიეს.
კითხვაზე, რატომ ღირდა ერთი თვის წინ უფრო ძვირი გაცილებით ნედლი თხილი, პასუხი ასეთია: “ხალხმა დამპალი თხილის შეგროვება დაიწყო”, “ხალხს ნარევი თხილი მოაქვს”, “არაა ფაბრიკებში ადგილი”, “წამღები არ მოვიდა”…
_ ადამიანის გაგიჟებას ცდილობენ! გამაგებინეთ, სადაური არითმეტიკაა, როცა ყველანაირი მეთოდით საცოდავი გლეხი ზარალდება? თუ კარგი, ხარისხიანი თხილი აგვისტოს დასაწყისში ერთი ცალი 40-45 თეთრად იანგარიშებოდა, ახლა იგივე 25-30 თეთრი რატომ ღირს? თუ ვიღაცამ დამპალი მოიტანა, იმის გამო საღი თხილის ფასს რატომ აგდებ? უვარგისი პროდუქციის მომტანს აჰკიდე ზურგზე და გაატანე უკან. მე რა დავაშავე, ხუთჯერ რომ შევწამლე?! კარგი თხილი მაქვს და ამ კარგის ფასიც, ამ “სამტეხლაოში” 30 თეთრია! როდის ეშველება ამ საქმეს?! _ გვეუბნება ოზურგეთელი კაკო ლომჯარია და გვთხოვს, იქნებ, ხმა მთავრობას როგორმე მივაწვდინოთ.
_ როგორმე, ეს ამბავი პრემიერ გახარიას ყურამდე მივიდეს, როცა ზემოთ ყველაფერი დალაგდება, _ გვეუბნება ლომჯარია.
_ მთხოვენ, “სოღო” (დიდი) თხილი მოიტანეო. მე არ გამომიგონებია თხილის ჯიშები, რაც მოვიტანე, კარგია. ისე, “სოღო” მე ვარ და რაიმე უპირატესობა სადმე მაქვს? სატირული, კომიკური და სატირალია დღეს ოზურგეთში თხილის ჩაბარების პროცესი. სანამ უნდა გაგრძელდეს ასე? კი, ცოტას გავიხუმრებთ, თავს ხომ არ მოვიკლავთ, მაგრამ ასე გაგრძელება რომ არ შეიძლება, ყველამ კარგად იცის. ერთი თვის მანძილზე 20-25 თეთრით იკლებს თხილის ფასი, ეს მაშინ, როცა ნაყოფი უკვე ხმელია. თან მიზეზი ძალზე პრიმიტიულია _ თითქოს ცუდი ხარისხის პროდუქცია მოაქვთ გლეხებს. ცუდში გადაუხადე ცუდი ფასი ან სულ არ მიიღო, კარგში კი, როგორც აგვისტოს დასაწყისში იძლეოდი კარგ ფასს, ახლაც ისე გადაიხადე. რა ცოდნა ამას უნდა? მაგრამ მეჩაქუჩეების “პარადია” და რაც უფრო ვაპროტესტებთ, უხილავი “შემოქმედი” უფრო დაგვცინის, _ ამბობს სოფელ ლიხაურის მკვიდრი ირმა გორდელაძე.
ჩოხატაურიდან ოზურგეთში ჩამოსული მეურნეები _ ნინო ხინთიბიძე და მაყვალა კუკულაძე “გურია ნიუსთან” საუბრისას ამბობენ, რომ თხილი ჩასაბარებლად ჩამოიტანეს და ისევ უკან მიაქვთ:
_ გვეგონა, აქ ცოტა უკეთესი ფასი ჰქონდა. “სოღო და კაი გვინდაო”, იძახიან. რას ქვია “სოღო”?! ხარისხიანი კია და ძალით ვერ გავბერავთ. ხომ ყველამ კარგად იცის, რომ იმ სრულიად დამპალ თხილსაც არ ზარალობენ და ზეთს და რაღაცეებს ამზადებენ. იქნება, გახარიამ გვიშველოსო, იძახის ხალხი. ჩვენ კიდევ გვეცინება ამაზე. ჩვენთვის ვის მოუცლია, გახარიამ რომ მოიცალოს?! ნეტავ, მასე იქნებოდეს, _ თქვეს მათ.
8 სექტემბერს, დილის საათებში, თხილის მიღება ოზურგეთში საერთოდ შეჩერებული იყო.
_ მალე დავიწყებთ მიღებას, მაგრამ ჯერ ფული არ არის, _ ამბობდნენ თხილის მიმღებ პუნქტებში.
კითხვაზე, თუ ვინ უნდა მოიტანოს ფული, ყველა დუმს.
ამ ერთი ფაქტითაც ნათელია, რომ თხილის მიღება-წაღების პროცესს ერთი უხილავი ხელი მართავს, რადგან, თითქმის ყველა მიმღებ პუნქტში ყველა ერთად ელოდება თანხას. თუმცა, თხილის წამღების ვინაობას, არც ერთი არ ასახელებს.
_ რა ვიცით, ვინ წაიღებს? საიდან გვეცოდინება მათი სახელი და გვარი? ხან ერთი მოდის, ხან _ მეორე. შეიძლება, სულაც არ მოვიდნენ, _ გვეუბნებიან თხილის მიმღებ პუნქტებში ფულის “უცნობ” მომტანებზე.
_ ცოტას დავიცდით. მერე ვეცდებით, თხილის დამცველი საზოგადოება შევქმნათ. გურიის სოფლებში წარმატებული მეურნეები უკვე აქტიურად სვამენ კითხვას _ სანამდე გაგრძელდება ოზურგეთში მეჩაქუჩე მეთხილეების მიერ თხილის ჩაბარების კომიკური პროცესი, რომელიც, ძირითადად, მხოლოდ მშრომელ, გაჭირვებულ ხალხს აზარალებს და დასაცინსაც კი ხდის?! _ კითხულობენ თხილის იმედად მყოფი, ოზურგეთის სოფლების მცხოვრები მოქალაქეები: ნინო სალუქვაძე, მაია ცხოიძე, ირმა გორდელაძე, ციალა ტყეშელაშვილი და მარინა ბოიაჯანი.
