“მორალის გარეშე”_ასე ეწოდება თარხან გასვიანის სადებიუტო წიგნს, რომლის პრეზენტაციაც საქართველოს პარლამენტის ეროვნულ ბიბლიოთეკაში შედგა.
როგორც ავტორი ამბობს, წიგნის დაწერის იდეა მას შემდეგ წარმოიშვა, რაც ალბერ კამიუს “დაცემა” წაიკითხა და აღსარების თქმის სურვილი გაუჩნდა.
“მორალის გარეშე” თარხან გასვიანის შესახებ ავტობიოგრაფიულ შტრიხებს შეიცავს, გარდა ამისა, მასში ვაკის პარკში, 9 მაისს, ფაშიზმზე გამარჯვების დღეს განვითარებული მოვლენებია აღწერილი და შესულია მოთხრობები, რომლებიც ავტორმა ციხეში ყოფნის დროს დაწერა.
“ერთ დღეს ვაკის პარკში გავედი და აღვწერე იქაური სიტუაცია. ხალხის ნაწილი ერთმანეთს მედლებს კიდებდა, ნაწილი მათ აგინებდა, ნაწილი კიდევ “პუტინ ხუილოს” იძახდა. ვერ გავიგე, რა ხდებოდა და ამბის აღწერა დავიწყე იმით, რომ პარადოქსია ეს ყველაფერი. ეს არ არის რუსეთის გამარჯვება, ჩვენი ხალხიც იბრძოდა და დაიღუპა. ვფიქრობ, ფაშიზმზე გამარჯვების დღე _ ფაშიზმზე გამარჯვების დღეა და არა, რუსეთის გამარჯვების დღე. წავიკითხე ალბერ კამიუს “დაცემა” და გამიჩინა აღსარების თქმის სურვილი. ეს წიგნი ასე ვთქვათ არის აღსარება, ამბობს იმ ცუდ მხარეებს, რაც მაქვს. ჩემს თავზე ისეთი რაღაცები მიწერია, რასაც ბევრი ადამიანი სარკეში ჩახედვისასაც არ იძახის. ასევე მივუთითებ ხალხს, რომ სანამ მე გამკიცხავენ, ჯერ საკუთარი შეცდომები აღიარონ”,_ამბობს გასვიანი.
წიგნის პრეზენტაციაზე მწერალმა ალექსანდრე ლორთქიფანიძემ აღნიშნა, რომ წიგნში ავტორის შინაგანი სამყარო ჩანს და მას აქვს უნარი ჩაახედოს მკითხველი საკუთარ ცხოვრებაში.
ლორთქიფანიძემ ასევე განაცხადა, რომ “მორალის გარეშე” არის იმ სახის წიგნი, რაც თანამედროვე ქართულ ლიტერატურაში იშვიათობაა.
“დიდი ხანია თანამედროვე ქართულ ლიტერატურაში ასეთი გულწრფელი და გაბედული ტექსტი არ წამიკითხავს. სტრუქტურულად ეს წიგნი არის საინტერესო ნიმუში იმისა, რაც იშვიათად გვხვდება თანამედროვე ქართულ ლიტერატურაში. ეს არის ერთის მხრივ ცნობიერების ნაკადი, როგორც ლიტერატურული ჟანრი და მეორე მხრივ, თანამედროვე ლიტერატურათმცოდნეები გონზოს ჟურნალისტიკას უწოდებენ ამას. ეს არის დოკუმენტური, საკუთარ გამოცდილებაზე დაყრდნობით შექმნილი, ხან არის დღიურების ფორმით, ხან მემუარების ფორმით, ამ წიგნში კი ეს ყველაფერი გაერთიანებულია. წიგნის კითხვისას არაერთხელ დამეუფლა შეგრძნება იმისა, რომ თავად გავხდი თვითმხილველი იმ შემზარავი მოვლენებისა, რაც გადაუტანია ასევე თარხან გასვიანს. ეს არის ავტორის უნარი ჩაგახედოს საკუთარ ცხოვრებაში, მოგონებებში, ეს ძალიან ძვირფასი უნარია და ყველა მწერალს არ აქვს. წიგნში ჩანს ავტორის შინაგანი სამყარო, წარსული, აწყო და მომავალიც”,_აღნიშნა ლორთქიფანიძემ.
ავტორის თქმით, წიგნი 15 წლის ზემოთ მკითხველისთვის არის განკუთვნილი და მისი შეძენა მალე წიგნის ყველა მაღაზიაში იქნება შესაძლებელი.
