31 დეკემბერს, ახალი წლის ღამეს “გურია ნიუსი“ სსიპ საგანგებო სიტუაციების კოორდინაციისა და გადაუდებელი დახმარების ცენტრის ოზურგეთის რაიონული სამსახურს სტუმრობდა.
ოთხი ჯგუფიდან ადგილზე არცერთი არ დაგვხვდა.
აღნიშნული სამსახურის უფროსის ნანა გოლიაძის თქმით, ახალი წლის დღეებში უფრო მეტი გამოძახებაა.
“ჩვენი მთავარი მიზანი გამოძახების ადგილზე სწრაფად მისვლა და ადამიანის გადარჩენაა. მთელი დღის განმავლობაში არაერთი გამოძახება იყო“, _ გვითხრა ნანა გოლიაძემ.
მისივე თქმით, წელს იგეგმება სსიპ საგანგებო სიტუაციების კოორდინაციისა და გადაუდებელი დახმარების ცენტრის ახალი შენობის გახსნა.
ამავე დღეს მოვახერხეთ სასწრაფო დახმარების ექიმის სოფო კალანდაძის ჩაწერა, რომელიც ოთხი შვილის დედაა.
სასწრაფო სამედიცინო დახმარების ცენტრის ექიმი, 4 შვილის დედა სოფო კალანდაძე „გურია ნიუსთან“ საუბრისას ამბობს, რომ სადღესასწაულო დღეები უფრო მეტად საყურადღებოა.
_ მეოთხე წელია, რაც პროფესიით ვმუშაობ, მანამდე ოჯახის საქმეებით ვიყავი დაკავებული. მყავს ოთხი შვილი და მეუღლე _ ამირან მეგრელიძე. ბოლო დროს გაჩნდა შანსი, რომ დამეწყო მუშაობა და ეს შანსი ხელიდან არ გავუშვი. ოჯახის წევრები და სამსახურის მეგობრები, კოლეგები ძალიან მეხმარებიან.
31დეკემბერი და 1-ლი იანვრის დილა ჩვეულებრივი დაძაბული დღე იყო ჩვენთვის, როგორც სხვა დღე და უფრო მეტად საყურადღებო, ვინაიდან არის მაშხალებთან და ალკოჰოლთან დაკავშირებული პრობლემები. თქვენც ნახეთ, როდესაც მოხვედით, ჩვენს სამსახურში არცერთი ბრიგადა არ იმყოფებოდა ადგილზე. 12 საათზე, მორიგეების ჯგუფი წამიერად ერთად შევხვდით ახალ წელს და შემდეგ, მთელი ღამის განმავლობაში, არაერთი ადამიანის სიცოცხლე ვიხსენით“.
ახალი წლის ღამეს მორიგეობდნენ ექიმები: სოფო კალანდაძე, ქეთინო ცირეკიძე, მარინა მჟავია, ნანა ქვილორია, ექთნები: იზო გულბიანი, მადონა ქარჩილაძე, ნინო გუჯაბიძე, ირმა ვასაძე; მძღოლები: კასციანე ჭანუყვაძე, გია პერანიძე, ია აბაშმაძე, თამაზ კვაჭაძე.
