ევროპარლამენტის საგარეო საქმეთა კომიტეტზე, პარლამენტის თავმჯდომარის მოადგილის, კახა კუჭავას და შერიგებისა და სამოქალაქო თანასწორობის საკითხებში სახელწიფო მინისტრის, ქეთევან ციხელაშვილის სიტყვის გამოსვლის შემდგომ, ევროპარლამენტარებმა ქართული ოცნების ხელისუფლება გააკრიტიკეს.
,,გურია ნიუსი“ გთავაზობთ ევროპარლამენტარების განცხადებებს, რომელიც ქართულ დელეგაციასთან შეხვედრისას გაკეთდა.
ევროპარლამენტარ მარკ გალერის განცხადებით, საქართველოს ხელისუფლება ცდილობს საარჩევნო სისტემის ჩავარდნის შემოსაღებას და დელეგაციის წევრებს მოუწოდა გულახდილად აღიარონ, რომ ბიძინა ივანიშვილი კულისებს მიღმა აწყობდა მისი ჩავარდნის სცენარს.
„საქართველოს ევროპული ინტეგრაციისადმი ყოველთვის ურყევი მხარდაჭერა იქნება, მაგრამ ვფიქრობ, ეს მხარდაჭერა თქვენს ვალდებულებების შესრულებასთან ერთად უნდა ხდებოდეს. ვფიქრობ, დღეს ცდილობთ შემოგვასაღოთ საარჩევნო სისტემის ჩავარდნა, როგორც შიდაპარტიული დემოკრატიის მაღალი დონე „ქართულ ოცნებაში“. როგორც ცნობილია, რამდენიმე წევრმა „ქართლი ოცნება“ დატოვა. გულახდილად თქვით, არ იყო ისე, რომ ბატონი ივანიშვილი ამბობდა, მოდით შეცვალეთ, მაგრამ სინამდვილეში, კულისებს მიღმა აწყობდა მისი ჩავარდნის სცენარს? თუ თქვენ რეალურად ევროპელები ხართ, აღიარეთ ეს“, – განაცხადა გალერიმ.
მარია გრიგოროვას თქმით, ჩორჩანაში მიმდინარეობს ბორდერიზაცია. იქ კი არ უშვებენ ჟურნალსტებს და აქტივისტებს და დაინტერესდა, თუ რატომ ხდება ესე, რადგან ხელისუფლებამ არსებულ მდგომარეობაზე ინფორმაცია თავის მოქალაქეებს უნდა მიაწოდოს
„მინისტრმა, ქეთევან ციხელაშვილმა ახსენა ჩორჩანაში არსებული ვითარება; ასევე, ექიმი ვაჟა გაფრინდაშვილი. მინდა ორი კითხვა დავსვა, რომელიც ამას უკავშირდება. ჩორჩანაში სრულიად ახალი სიტუაციაა, მიმდინარეობს ხეების მონიშვნა, კვლავ მიმდინარეობს ბორდერიზაციაც, სრულიად განსხვავებული მასშტაბებით, თუმცა, ჩემი ინფორმაციით, იქ არ უშვებენ ჟურნალისტებს და აქტივისტებს და ჩემი კითხვა იქნება – რატომ ? რადგან მივიჩნევ, რომ ხელისუფლებამ ინფორმაცია უნდა მიაწოდოს თავის მოქალაქეებს თუ რა ხდება“,- განაცხადა მარია გრიგოროვამ.
ევროპარლამენტარმა ასევე განაცხადა, როდესაც ხელისუფლება საუბრობს ,,საქართველო ისე ახლოსაა ევროპასთან და ევროკავშირთან, როგორც არასდროს“, ფიქრობენ თუ არა იმაზე, რომ ქვეყანაში არსებული პოლიტიკური პატიმრები ამას თუ ეთანხმებიან.
„იმედი მაქვს, რომ ჩემს კითხვასა და მოსაზრებას ობიექტურად შეაფასებთ იმიტომ, რომ იქ ვიყავი და ვესაუბრე პროსახელისუფლებო, არასამთავრობო მხარეს და პროტესტის მონაწილეებსაც პირადად და მე არ მაქვს ინფორმაცია მათ მიერ პარლამენტის ბლოკირებასთან დაკავშირებით. პარლამენტმა თვითონ დაბლოკა პარლამენტი თავისი სამარცხვინო „თბილისის კედლით“, თუმცა ეს მხოლოდ შენიშვნაა. მინდა გკითხოთ: როდესაც თქვენ საუბრობთ, რომ საქართველო ისე ახლოსაა ევროპასთან და ევროკავშირთან როგორც არასდროს, ფიქრობთ, რომ ქვეყანაში არსებული პოლიტიკური პატიმრები გეთანხმებიან ამაში ?“– განაცხადა ევროპარლამენტარმა მარია გრიგოროვამ.
ის ასევე დაინტერესდა ექიმ ვაჟა გაფრინდაშვილის გათავისუფლების საკითხით, უფრო კონკრეტულად კი იმით, თუ ვინ გადაიხადა ჯარიმა ექიმის გათავისუფლებისთვის, ხელისუფლებამ, არასამთავრობო სექტორმა თუ კონკრეტულმა ინდივიდმა.
ევროპარლამენტის წევრის ანდრიუს კუბილიუსის თქმით, „ქართული ოცნების“ ლიდერები დაპირდნენ, რომ დიალოგს შედეგი ექნებოდა და საარჩევნო სისტემაში პროპორციული ელემენტები იქნებოდა და ქართულ დელეგაციას მიმართა, რომ გადაეცათ მისი სურვილი პარტიის ლიდერებისთვის , რადგან ის კვლავ ელოდებიან, როდის დადგება ეს შედეგი, რადგან ამ შედეგის გარეშე არჩევნების მიმართ საერთაშორისო ნდობა ძალიან ლიმიტირებული იქნება.
„ბევრი შეხვედრა მქონდა, როგორც ოპოზიციის წარმომადგენლებთან, ასევე, მმართველ პარტიასთან, პარტიის ლიდერისა და პარლამენტის თავმჯდომარის ჩათვლით. ასე რომ, მინდა, გთხოვოთ, რომ თქვენი პარტიების ლიდერებს ჩემგან ერთი ძალიან მარტივი გზავნილი გადასცეთ. ისინი დამპირდნენ, რომ დიალოგს შედეგი ექნებოდა და საარჩევნო სისტემაში პროპორციული ელემენტები იქნებოდა. ასე რომ, გადაეცით ჩემი სურვილი – მე კვლავ ველოდები, როდის დადგება ეს შედეგი, რადგან ამ შედეგის გარეშე თქვენი არჩევნების მიმართ საერთაშორისო ნდობა ძალიან ლიმიტირებული იქნება. დაბოლოს, შეგიძლიათ, მითხრათ, არის საქართველოში ოპოზიციის რომელიმე ლიდერი, რომელიც პროკურატურაში არაა გამოძახებული?“ – აღნიშნა კუბილიუსმა.
რასა იუნკიავიჩენსმა კი მწუხარებას გამოხატა, იმის გამო რომ მართველი პარტიის წარმომადგენლები საუბრობენ ცუდი ოპოზიციის შესახებ, რადგან ეს არ არის დემოკრატიის წესები, მან ასევე აღნიშნა, რომ ეს წელი საქართველოსთვის იქნება დემოკრატიის ტესტი.
„ეს წელი საქართველოსთვის იქნება დემოკრატიის ტესტი. ჩვენ ყურადღებით გაკვირდებით. თქვენ გყავთ ბევრი ევროპელი მეგობარი ევროპარლამენტში, არა ერთი, ან მეორე პოლიტიკური პარტიის მეგობრები არამედ საქართველოს მეგობრები. ჩვენი შეშფოთება კვლავ ეხება ჩააბარებს, თუ არა მმართველი პარტია დემოკრატიის გამოცდას. ვწუხვარ, რომ ვამბობ, მაგრამ ჩემთვის იყო ცუდი მოსასმენია, როცა მმართველი პარტიის წარმომადგენელი საუბრობს, ან ჩივის ცუდი ოპოზიციის შესახებ. ეს არ არის დემოკრატიის წესები. როცა, ჩვენ ვხედავთ თავდასხმას ოპოზიციაზე, არასამთავრობოებზე, მედიაზე, მოწინააღმდეგეებზე, ეს თქვენ, საქართველოს არ დაგეხმარებათ ახალი მეგობრები იპოვოთ ევროპარლამენტში. ვერ დაარწმუნებთ მეტ ხალხს, რომ მხარი დაგიჭირონ“,– განაცხადა ევროპარლამენტარმა.
ანა ფოტიგას განცხადებით კი კარგი იქნებოდა ევროპარლამენტს ცოდნოდა საქართველოში პატიმრების და დაკავებების საერთო რიცხვი საპროტესტო აქციების შემდგომ, მისი აზრით საქართველოს რაც უფრო მეტი პატიმარი ეყოლება, რუსეთს მით უფრო მტკიცეს გახდის.
„ვფიქრობ, რომ ქართველი საზოგადოება საკმაოდ ფხიზლადაა და კარგად ესმის სიტუაცია. ასე რომ, მოსკოვის იდეოლოგიის მიმდევრებს საშუალება მიეცათ, საქართველოს პარლამენტში ესაუბრათ, რამაც გამოიწვია დიდი პროტესტი და რისხვა. ამას გარდა, ვფიქრობ, რაც უფრო მეტი პატიმარი იქნება, რუსეთი მით უფრო მტკიცე გახდება, ამიტომ მინდა მოვისმინო, როგორია სიტუაციის დეესკალაციის თქვენი სცენარი. სხვათა შორის, კარგი იქნებოდა, გვცოდნოდა პატიმრების და დაკავებების საერთო რიცხვი ყველა ამ საპროტესტო აქციის შემდეგ“, – აღნიშნა ფოტიგამ.
ცნობისთვის, ბრიუსელს, საქართველოს პარლამენტის თავმჯდომარის მოადგილე, კახაბერ კუჭავა და საგარეო ურთიერთობათა კომიტეტის თავმჯდომარე, ირაკლი ბერაია და შერიგებისა და სამოქალაქო თანასწორობის საკითხებში სახელწიფო მინისტრის ქეთევან ციხელაშვილი 20 იანვარს ეწვივნენ. ისინი ევროპარლამენტის საგარეო საქმეთა კომიტეტის (AFET) მუშაობაში ღებულობენ მონაწილეობას.
დელეგაციის ვიზიტი 24 იანვარს დასრულდება.
