ოზურგეთის საკრებულოს გადაწყვეტილება _ “ეარნეტი” ელქტრობოძებზე კაბელს ათი წლის ვადით მიამაგრებს

ოზურგეთის მუნიციპალიტეტის საკრებულომ, შპს „ეარნეტისთვის“ გარე განათების ბოძებზე ფართის გადაცემაზე (10 სმ სიგრძის კაბელის სამყოფი) იმსჯელა, რასაც სერიოზული დავა მოჰყვა _ დეპუტატები ვერ შეთანხმდნენ საიჯარო ფართის ღირებულებაზე, რაც ორ ლარს შეადგენს და 336 ბოძზე წელიწადში გადასახადი მხოლოდ 672 ლარი იქნება.

_ ჩვენ მოგვმართა შპს „ეარნეტმა“, რომლიც ითხოვს ქალაქ ოზურგეთში 336 ერთეულ გარე განათების ბოძზე ბოჭკოვანი ინტერნეტის კაბელის განთავსებას. ვიხელმძღვანელეთ 2018 წელს მაგთიკომთან გაფორმებული ხელშეკრულებით, რა დროსაც ჩვენ აუდიტის შესაბამისი დასკვნა გვქონდა საიჯარო ქირის ოდენობის დადგენით. ისევე, როგორც მაგთისთან გვქონდა ხელშეკრულება, ერთი წერტილი 2 ლარის ოდენობით. „მაგთის“ 1 700 ბოძი ჰქონდა მთელ მუნიციპალიტეტში. „ეარნეტი“ კი მხოლოდ ოზურგეთში ითხოვს 336 ბოძს. ვისარგებლეთ იგივე ტარიფით და შესაბამისად 672 ლარით არის წარმოდგენილი შესაბამისი წლიური ქირა, _ განაცხადა ეკონომიკის სამსახურის უფროსმა, ალეკო მამეშვილმა საკითხის წარმოდგენისას.

დეპუტატი ლავრენტი ბიგვავა კატეგორიულად არ ეთანხმებოდა ასეთ ხელშეკრულებას.

 _ ადრინდელი ფასი არ არის დოგმა. იმის შემდეგ შეიცვალა რეალობები. სულ სხვა ფასებია დღეს. ის მეთოდიკა, რითაც ის ორი ლარი დათვალეს, არასწორია. ერთი შემთხვევა არაა, როცა აუდიტორის დასკვნა არ შეესაბამება არსებულ საბაზრო წონასწორობის ფასებს. საბაზრო ეკონომიკის პირობებში ეს არის მორიგების საგანი და არა 10 სმ-იანი ჭრილი. მე შემიძლია, ეს 10 სმ ხუთ ლარად გავაქირავო. ჩვენ უნდა ვიზრუნოთ შემოსავლებზე, რითაც ბიუჯეტი უნდა შეივსოს, _ თქვა ბიგვავამ. ასეთივე აზრზე იყო დეპუტატი გელა აროშიძე, რომელმაც საკითხის განხილვის ერთი თვით გადაწევა ითხოვა.

დეპუტატმა ლევან მგელაძემ მხარი დაუჭირა „ეარნეტს“ და თქვა, რომ მაგთის მომსახურეობა გაუარესებულია, არის მონოპოლისტური და კონკურენცია გააუმჯობესებს მომსახურების ხარისხს:

_ რაც უფრო მეტი „ეარნეტი“ შემოვა, მით უკეთესი. სამი „ეარნეტი“ მოვიდეს, მხარს დავუჭერ. ეს კომპანია გამოირჩევა კარგი მომსახურებით და ფასიც ხელმისაწვდომია, _ განაცხადა დეპუტატმა თამაზ ტუღუშმა.

ასევე მხარდაჭერა გამოხატეს „ეარნეტის“ მიმართ დეპუტატებმა: შოთა გოგიბერიძემ, ლევან ნინიძემ და სხვებმა.

დეპუტატებმა დიდხანს იდავეს იმის გამო, რომ ათწილანი ხელშეკრულების ნაცვლად, სამი წლით გაეფორმებინათ, თან ფასის აუცილებელი გადახედვით. პოლემიკა ისე გაცხარდა, რომ შესვენება გამოაცხადეს.

საბოლოოდ, შესვენებიდან დაბრუნებულმა დეპუტატებმა, მოთათბირების შემდეგ, გადაწყვიტეს „ეარნეტს“ ხელშეკრულება ათი წლის ვადით გაუფორმონ, ორ წელში ფასის აუცილებელი გადახედვის პირობით და ასეთი ფორმით თანხმობა განუცხადეს ოზურგეთის მერს.