„საგანგებო მდგომარეობაზე მთავრობის დასაბუთებულ მოთხოვნას, რა თქმა უნდა, პარლამენტის მხარდაჭერა ექნება“, – ამის შესახებ პარლამენტის თავმჯდომარე არჩილ თალაკვაძემ ბიუროს სხდომაზე განაცხადა, სადაც საგანგებო მდგომარეობის გამოცხადების ინიციატივით პარლამენტის წევრი ლევან გოგიჩაიშვილი გამოვიდა.
არჩილ თალაკვაძის განმარტებით, ამ მომენტისთვის საქართველო ეფექტურად უმკლავდება ვირუსის გავრცელების შეკავებას, ქვეყანამ სწორი პრევენციული ნაბიჯები გადადგა, მათ შორის რეაგირების კუთხით, გამოვლენილ შემთხვევებზე.
პარლამენტის თავმჯდომარის განცხადებით, ყველა მიმართულება კოორდინაციის ქვეშ არის და ყველა ზომა, რაც აუცილებელია თითოეული მოქალაქის ჯანმრთელობის დასაცავად, დაგვიანების გარეშე იქნება მიღებული.
მისივე განმარტებით, ახლა არის პროფესიონალური, გამბედავი გადაწყვეტილების დრო, რასაც ხელისუფლება აკეთებს და ამიტომაც არის, რომ საქართველო გავრცელების შეკავებას ახერხებს.
„თუმცა მოქალაქეებს უნდა ვუთხრათ, რომ გავრცელების ნულამდე დაყვანას საქართველო დამოუკიდებლად ვერ შეძლებს. ჩვენ ველოდებით მედიკამენტებს, რომლების კვლევებიც სრულდება, ასევე ველოდებით, როდის ჩაეშვება ვაქცინა მოხმარებაში და იმას, რომ გავრცელების პიკმა გადაიაროს. საქართველო არის გლობალური ჯანდაცვის კონტექსტში, ის იზოლირებულად ვერ შეძლებს ვირუსის დამარცხებას, მაგრამ ვახერხებთ ვირუსის შეკავებას, შემთხვევების მატება მომავალში შესაძლოა, გაგრძელდეს, ვინაიდან ნულამდე დაყვანას დამოუკიდებლად ერთი ქვეყანა ვერ შეძლებს“, – განაცხადა არჩილ თალაკვაძემ.
მისივე თქმით, საზოგადოების და თოთოეული ადამიანის პასუხისმგებლობა ამ პროცესში მნიშვნელოვანია, რადგან ერთი, ორი, ან სამი მოქალაქის სარისკო და უპასუხისმგებლო ქცევამ შესაძლოა, ჩვენი ექიმების და ჯანდაცვის სამსახურების ძალისხმევას საფრთხე შეუქმნას.
აქედან გამომდინარე, არჩილ თალაკვაძის განმარტებით, მისაღებ ზომებზე მუშაობა მიმდინარეობს და რაც იქნება საჭირო, ის გადაწყვეტილება იქნება მიღებული.
