“ვაუქმებ ბრძანებას, საკრებულოს თავმჯდომარის საწვავის ლიმიტის დადგენის შესახებ, ასევე, უარს ვამბობ სამსახურებრივი ავტომობილით სარგებლობაზე”,- ამის შესახებ გადაწყვეტილება ქუთაისის საკრებულოს თავმჯდომარის მოვალეობის შემსრულებელმა, ირაკლი შენგელიამ გუშინ მიიღო.
“დღეს ჩვენი ქვეყანა და საზოგადოება დგას მნიშვნელოვანი გამოწვევების წინაშე, პირველ რიგში ეს არის მოქალაქეების ჯანმრთელობა და უსაფრთხოება, აგრეთვე, ქვეყნის ეკონომიკის მდგრადობის შენარჩუნება და მოწყვლადი ჯგუფებისთვის დახმარების უზრუნველყოფა. ამ მხრივ, ქუთაისის მუნიციპალიტეტის თვითმმართველობამ არაერთი ეფექტური ნაბიჯი გადადგა. იმისათვის, რომ ვირუსით გამოწვეული ზიანი და დანაკარგები იყოს მინიმალური, ჩვენ გვჭირდება ხელისუფლების, კერძო და არასამთავრობო სექტორების და საზოგადოების ერთიანობა!
ჩემი პირადი გადაწყვეტილებით, ადგილობრივი თვითმმართველობის ადმინისტრაციული დანახარჯების შემცირების მიზნით, ვაუქმებ ბრძანებას, საკრებულოს თავმჯდომარის საწვავის ლიმიტის დადგენის შესახებ, ასევე უარს ვამბობ სამსახურეობრივი ავტომობილით სარგებლობაზე.
მნიშვნელოვანია, ადგილობრივ ბიუჯეტში გამოთავისუფლებული თითოეული ლარი, მოხმარდეს სოციალურ პროგრამებს და მიიმართოს მოწყვლადი ჯგუფების დასახმარებლად”,- ამბობს შენგელია.
ცნობისთვის, ირაკლი შენგელია აღნიშნულ თანამდებობას 2019 წლის 10 დეკემბრიდან იკავებს.
