კურორტ ბახმაროს ელექტრომომარაგების ქსელის მოწყობისა და ინდივიდუალური გამრიცხველიანებისთვის საქართველოს მუნიციპალური განვითარების ფონდმა ტენდერი გამოაცხადა.
ტექნიკურ პირობაში აღნიშნულია, რომ სს „ენერგო პრო-ჯორჯია“ ტენდერში გამარჯვებულს სამშენებლო მოედანზე მიაწვდის აღრიცხვის კარადებს; მრიცხველებსა და მიწისქვეშა ელექტრო სადენებს, ასევე პროექტს, რომლის მიხედვითაც უნდა შესრულდეს სამუშაოები.
მუნიციპალური განვითარების ფონდის ინფორმაციით, კურორტ ბახმაროს ელექტრომომარაგება პირველი ეტაპის პროექტის ფარგლებში განხორციელებულია ქვესადგურ „ნაბეღლავი“-დან გამომავალი, 35 კვ ძაბვის გაბარიტებში აშენებული, 10 კვ ძაბვაზე ჩართული საჰაერო ელექტროგადამცემი ხაზით, სიგრძით 15 კმ. პროექტის მეორე ეტაპი კი ითვალისწინებს ბახმაროს ტერიტორიაზე 0.4 კვ. მომხმარებლებისთვის მიწისქვეშა კაბელების და მრიცხველის კარადების) თითო კარადა გათვლილია 12 აბონენტზე) მოწყობას.
პროექტის მიხედვით ბახმაროში უნდა აშენდეს 9 სატრანსფორმატორო ქვესადგური; მომხმარებლების სიახლოვეს დამონტაჟდება 12-მრიცხველიანი ჯგუფური ძალოვანი კარადები [საერთო ჯამში 345 კარადა], საიდანაც სპილენძის მრავალძარღვა მიწისქვეშა კაბელით მოხდება აბონენტების ელექტრომომარაგება; თითოეულ აბონენტთან კი დამონტაჟდება ავტომატური ამომრთველი გარე დადგმულობის ინდივიდუალურ კოლოფში, რომელზეც მიერთდება აბონენტის შიდა ქსელი.
9 ივნისს ბახმაროში პრემიერ-მინისტრის მრჩეველი რეგიონულ საკითხებში სოზარ სუბარი იმყოფებოდა, რომელიც ადგილზე გაეცნო ინფრასტრუქტურული სამუშაოების მიმდინარეობის პროცესს.
როგორც „გურია ნიუსთან“ პრემიერის მრჩეველმა აღნიშნა, ბახმაროში საუკუნის პრობლემა გვარდება და სამუშაოების დასრულების შემდეგ ბახმაროს მთელი წლის განმავლობაში უწყვეტად ექნება მაღალი ხარისხის ელექტროენერგია და წყალი.
რა ეტაპზეა დღეისთვის ბახმაროში მიმდინარე სამუშაოები და როდის გავა ექსპლოატაციაში, ამაზე „გურია ნიუსთან“ ჩოხატაურის მუნიციპალიტეტის მერიის პირველი კატეგორიის უფროსმა სპეციალისტმა ეკონომიკური დაგეგმვის საკითხებში ნოდარ ჟღენტმა ისაუბრა.
„ბახმაროში მიმდინარე სამუშაოებისთვის გამოყოფილია 2 849 000 ლარი. სამუშაოებს ტენდერში გამარჯვებული კომპანია შპს „აპექსი-2009“ ასრულებს. ამჟამად შესრულებულია სამუშაოების, დაახლოებით, 55-60%-მდე. გრაფიკით, 15 ივნისს სამუშაოს დასრულების ვადა იწურებოდა, მაგრამ კორონავირუსიის პანდემიის გამო, შეფერხება იყო. ამ კვირაში გადაწყდება რამდენი ხნით გახანგრძლივდება სამუშაოები, თუმცა, ეს აუცილებლად წლის ბოლომდე დასრულდება“, _
როდესაც ეს კომპანია შეასრულებს ნაკისრ ვალდებულებას, შემდეგ უნდა ჩაიბაროს ენერგოპრომ, რომელსაც წვრილმანი სამუშაოები ექნება შესასრულებელი.
საუბარი გვქონდა კომპანიის ხელმძღვანელობასთან, რომ იქნებ, ნაწილ-ნაწილ ჩავრთოთ, ანუ ქსელში ჩაირთოს უბნები, სადაც სამუშაოები დასრულდება. მაგალითად, ახლა სრულდება სამუშაოები მერვე და მეცხრე უბანი და ჩავაბაროთ ენერგოპროს, თუმცა ეს სურვილია და პრაქტიკაში რამდენად იქნება შესაძლებელი, ზუსტად ვერ გეტყვით“, _ გვითხრა ნოდარ ჟღენტმა.
