62 წლის ქეთევან ძიმისტარიშვილი ლანჩხუთის მუნიციპალიტეტის სოფელ აკეთში ცხოვრობს. ის მეორე ჯგუფის შშმ პირია, მას შაქრიანი დიაბეტი აქვს. ქეთევან ძიმისტარიშვილს ორი წლის წინ უმძიმესი ოპერაცია დასჭირდა _ მას ფეხის ამპუტაცია ჩაუტარდა.
როგორც თავად რუსუდან ძიმისტარაშვილი ამბობს, სოციალური დახმარების სააგენტო მას დროულად დაეხმარა. ოპერაციის შემდეგ დაპირდნენ და მალევე უზრუნველყვეს ფეხის პროთეზით, თუმცა მისი მოხმარება ვერ შეძლო.
_ უკმაყოფილო არ ვარ, ოპერაციაც კარგად ჩატარდა, უბრალოდ, ვერ მოვიხმარე ეს პროთეზი. მოხერხებული და უფრო კომფორტული იქნება ეტლი. ესეც დამპირდნენ, თუმცა, მერე მითხრეს, რომ ახლა საშუალება არ არის და ცოტა ლოდინი მოგიწევსო. ალბათ, პანდემიის გამო შექმნილი მდგომარეობა ამუხრუჭებს საქმეს. თუ თქვეს და შემპირდნენ, იქნებ, დროულად მომეშველონ. აბსოლუტურად უძრავად ვარ. ოდნავადაც ვერ გადავაადგილდები.
როგორც დამეხმარნენ, უკმაყოფილო არაფერზე ვარ, მაგრამ ხედავთ _ კიდური აღარ მაქვს. ამასთან, საკმაოდ მძიმე წონის ვარ. ესაა ჩემი გასაჭირი და თუ დროულად არ დამეხმარნენ, მერე აზრი აღარ ექნება, _ გვითხრა ქალბატონმა ქეთევანმა.
ქეთევან ძიმისტარიშვილის ოჯახში სულ სამი წევრი ცხოვრობს. მისი ვაჟიშვილი სრულწლოვანია, თუმცა, უმუშევარია; 66 წლის მული, ასევე, შშმ პირია და ამ მხრივაც მძიმეა ოჯახის მდგომარეობა.
_ მართალია, ჩემი მული შშმ პირია, მეორე ჯგუფი აქვს, თუმცა, შეუძლებელს აკეთებს, რომ როგორმე მე მდგომარეობა შემიმსუბუქოს. თავადაც დასახმარებელია, მაგრამ კიდური როცა არ მაქვს, ხომ გასაგებია, რა მდგომარეობაში ვიქნები? პენსია მაქვს და სოციალურ დახმარებასაც ვიღებ, თუმცა, ფიზიკურად რომ ვერ გაინძრევი, ხომ წარმოგიდგენიათ, რა დღეში ვიქნები? _ გვეუბნება ქალბატონი.
“გურია ნიუსი” ლანჩხუთის მუნიციპალიტეტის მერიის პრესსამსახურს დაუკავშირდა. ჩვენს კითხვაზე, ცნობილია თუ არა მათთვის ქეთევან ძიმისტარიშვილის მძიმე მდგომარეობის შესახებ და რამდენად მალე მოხერხდება ამ ქალბატონისთვის დახმარება, ასეთი პასუხი გაგვცეს:
_ ქეთევან ძიმისტარიშვილის შესახებ მერია ინფორმირებულია. ჩვენ დავუკავშირდით სოციალურ სამსახურს და გვითხრეს, რომ ამ ქალბატონის განცხადება უკვე იყო სააგენტოში შესული და შესაბამისად, მოთხოვნა უკვე გადაგზავნილია. ასევე, გეტყვით, რომ მოთხოვნა მალე დაკმაყოფილდება.
როგორც მერიის პრესსამსახურში გვითხრეს, ქეთევან ძიმისტარიშვილს ეტლს თვის ბოლომდე გადასცემენ:
_ მალე, ივნისის ბოლომდე, ძიმისტარიშვილი აუცილებლად მიიღებს შშმ პირისთვის განკუთვნილ ეტლს, _ გვითხრეს სატელეფონო საუბრისას.
“გურია ნიუსი” თვალს მიადევნებს ქეთევან ძიმისტარიშვილის მდგომარეობას.
