ლანჩხუთში, გურიელის ქუჩაზე ინფრასტრუქტურული სამუშაოები გასული წლის ზაფხულში გახორციელდა და ადგილობრივი ხელისუფლების გადაწყვეტილებით, სანიაღვრე არხები მოეწყო. უფრო ზუსტად, უკვე არსებული არხის სარეაბილიტაციო სამუშაოები გახორციელდა. თუმცა, ირკვევა, რომ შესრულებული სამუშაოების ხარისხით მოსახლეობა უკმაყოფილოა.
“გურიელის ქუჩაზე სანიაღვრე არხი მარცხენა მხარეს რომ გაკეთდა, მარჯვენა მხარე დატოვეს და წვიმის დროს ცენტრალური მაგისტრალიდან წამოსული წყალი აწუხებს მოსახლეობას, ვინ უნდა მიხედოს?!
სამუშაოები რომ დაიწყეს, ვიკითხეთ და თქვეს, ასეთია პროექტიო. არადა, თავიდან იყო ნათქვამი, რომ ქუჩის ორივე მხარეს გაკეთდებოდა სანიაღვრე არხი, თუმცა, მერე შეიცვალა. ნეტავ, რომელმა გენიოსმა შეადგინა ეს პროექტი, რომ სანიაღვრე კვალი ქუჩის ერთ მხარეს გაკეთებულიყო, ან რა გახდა ასეთი პატარა ქუჩის მოწესრიგება?!” _ ინტერესდება მოსახლეობა.
როგორც ადგილობრივი მოსახლეობა განმარტავს, გურიელის ქუჩაზე სამუშაოები ისეა შესრულებული, რომ ავდარში ეზოების დატბორვის საშიშროება იქმნება:
“ყველამ იცის, რომ ქალაქის ტერიტორიაზე არსებული ხიდი იჭედებოდა და ქუჩებში მოედინებოდა მთიდან მოვარდნილი ღვარცოფი. წყალი აღარ ეტეოდა კალაპოტში და რკინიგზის გასწვრივ მოსახლეობას უქმნიდა საშიშროებას. წლებია, ამ პრობლემას არავინ მიხედა. პირიქით _ წყალი, რომელიც ქალაქს აწუხებდა, გურიელის ქუჩის სანიაღვრეს შემოუერთეს. შარშან ზაფხულში კი ამ ქუჩის რეაბილიტაცია ჩატარდა _ აამაღლეს ქუჩა, ჩამოასხეს სანიაღვრე არხი მარჯვენა მხარეს _ ნახევარზე, მარცხენა მხარეს _ 1,2 მ სიგანისა და 80 სმ სიმაღლის, ისიც ისე მაღლაა, რომ ეზოები დარჩა დაბალზე. აუცილებლად დაიტბორება აქაურობა. ყველა ქუჩიდან შემოსული არხებით წყალი ამ არხს უერთდება. ამავე დროს საგანგაშო ისაა, რომ არხის ბოლოს, რკინიგზის გასწვრივ, მორჩილაძის ქუჩაზე სანიაღვრე ჯერ არ გაკეთებულა და არც წყალს აქვს პირდაპირი გასასვლელი რკინიგზის ქვეშ. აღმაშენებლის ქუჩაც ისე აამაღლეს, რომ რკინიგზას გაუსწორეს. სად წავა მთელი ამ ქუჩების ნაწრეტი წყალი თქვენ განსაზღვრეთ”, _ ამბობენ ადგილობრივები.
მუნიციპალიტეტის მერიაში კი, მოსახლეობის მხრიდან გაჟღერებულ პრეტენზიებს არ იზიარებენ და საპასუხოდ განმარტავენ, რომ სანიაღვრე არხის რეაბილიტაცია გურიელის ქუჩის ორივე მხარეს, იმ მონაკვეთებში გახორციელდა, სადაც ამის საჭიროება იყო.
რაც შეეხება რკინიგზის გასწვრივ, მორჩილაძის ქუჩაზე არხის მოწყობას, რომლის მოუწესრიგებლობის გამოც, მოსახლეობის ინფორმაციით, პრობლემები მიმდებარე ქუჩებზე მცხოვრებთაც ექმნებათ, მერიისვე განმარტებით, აღნიშნულთან დაკავშირებით პროექტი უკვე არსებობს და სამუშაოების გახორციელება მიმდინარე წელსაა გათვალისწინებული.
