საქართველოს პარლამენტის თავმჯდომარე არჩილ თალაკვაძე Edison Research-ის კვლევას გამოეხმაურა. მისი თქმით, ამ კვლევის შედეგები არის იმდენად სანდო, რამდენადაც სანდოა მისი დამკვეთი ბატონი კეზერაშვილი.
„როგორც გითხარით ჩვენ დემოკრატიული განვითარებისთვის გვჭირდება ობიექტური კვლევები. ამ კვლევაში როგორც ჩანს, „ქართულ ოცნებას“ აწევს ხელოვნურად ჩამოყალიბებული რეიტინგი, თუმცა მეორე მხრივ ჩვენ ვნახეთ ოპოზიციის წარმომადგენელთა შეშფოთებული კომენტარები მათ რეიტინგებთან დაკავშირებით. ისინი ენდობიან ამ კვლევას და შესაბამისად ალბათ შეშფოთებულებიც ამიტომ არიან. ჩვენ ყოველთვის ვეუბნებოდით ოპოზიციის ნაწილს, გნებავთ ძველ ოპოზიციას, რომ ნუ ხართ ვირუსის მხარეს როცა ქვეყანა ებრძვის პანდემიას. ვეუბნებოდით, რომ მიიღეთ მონაწილეობა საკონსტიტუციო პროცესში. მხარი დაუჭირეთ ცვლილებებს, რომელიც დემოკრატიის ინტერესებშია. ვეუბნებოდით ნუ ესხმით თავს ინსტიტუტებს, ნუ ესხმით თავს ეკლესიას. ვეუბნებოდით, რომ ნუ გიხარიათ, როდესაც კრიტიკული შენიშვნები ისმის ამერიკის შეერთებული შტატებიდან საქართველოს მისამართით. მათ ეს რჩევები არ გაითვალისწინეს და საბოლოო ჯამში, როგორც ხედავთ მიიღეს ძალიან დაბალი საზოგადოებრივი ნდობა, რომელიც მათივე ჩატარებულ კვლევებში ჩანს. სინამდვილეში თუ რამდენი ჩამოაკლეს ამ კვლევით „ქართულ ოცნებას“ ამას ჩვენ ვაჩვენებთ ოპოზიციას ოქტომბრის არჩევნებში“, – აცხადებს თალაკვაძე.
ტელეკომპანია „ფორმულას” დაკვეთით, Edison Research-ის მიერ ჩატარებული კვლევის მიხედვით, პოლიტიკური რეიტინგები ასეთია: “ქართული ოცნება” – 39%; “ერთიანი ნაციონალური მოძრაობა” – 16%; “ევროპული საქართველო-თავისუფალი დემოკრატები”- 5%, „ახალი საქართველო“ – 3%, მოსახლეობის 20% კი ამბობს, რომ არ გადაუწყვეტია, ვის მისცემს ხმას.
