“სანამ თავზე დაგვმხობია, ვინმემ მიხედოს ამ შენობას! მეტი თუ არაფერი, სირცხვილია ქალაქის ცენტრში დაბონძღილი და ჩამოფოფხილი ნაგებობა. ხელ-პირ დაუბანელ ფერუმარილიან ქალივითაა ჩვენი ქალაქი”, _ ასეთია ლანჩხუთელთა პოზიცია ქალაქის ცენტრში არსებულ კიდევ ერთ მიტოვებულ შენობასთან მიმართებაში, სადაც, წლების წინ, რესტორანი ფუნქციონირებდა. 
ის, რომ შენობა საფრთხის შემცველია და ფაქტობრივად, აღდგენას აღარ ექვემდებარება, ამაზე ლანჩხუთში ყველა თანხმდება, მათ შორის, ხელისუფლების წარმომადგენლებიც. თუმცა, მასთან დაკავშირებით მარტივად რაიმე სახის გადაწყვეტილების მიღება შეუძლებელი იყო, რადგან ის რამდენიმე სუბიექტს შორის დავის საგანს წარმოადგენდა.
ცნობისთვის _ აღნიშნული შენობის აუქციონის წესით გაყიდვა წლების წინ იყო დაგეგმილი. მაშინ მუნიციპალიტეტის ხელმძღვანელობა პირობითი აუქციონის სახით 60 ათას ლარად ითხოვდა შენობის გაყიდვას, თუმცა, ეს წინადადება არ გაითვალისწინეს და ეკონომიკის სამინისტრომ შენობა 200 ათას ლარად შეაფასა, ამ ფასად შენობის მყიდველი კი არავინ გამოჩნდა. შესაბამისად, აუქციონიც ჩაიშალა. სწორედ ამის შემდეგ გაუჩნდათ გარკვეულ სუბიექტებს მასზე პრეტენზია და საქმეს სასამართლო არა ერთი წლის განმავლობაში იხილავდა.
როგორც მერიის ქონების სამსახურში გავარკვიეთ, აღნიშნულ შენობასთან დაკავშირებით სასამართლომ გადაწყვეტილება უკვე გამოიტანა და მესაკუთრედ ლანჩხუთის ჩაის ფაბრიკის ყოფილი დირექტორის ანზორ კილაძის მემკვიდრეები ცნო. თუმცა, ახლა სხვა ტიპის პრობლემამ იჩინა თავი _ სამსახურის უფროსთან გიორგი ნაჭყებიასთან საუბრისას აღმოჩნდა, საქმე მარტივად არც ამჯერადაა _ სასამართლომ შენობის მესაკუთრეებად ანზორ კილაძის მემკვიდრეები კი აღიარა, თუმცა, მიწა, სადაც ნაგებობაა განთავსებული, სახელმწიფო საკუთრებას წარმოადგენს და ახლა შენობის ბედის განსასაზღვრად შეთანხმება სახელმწიფოსა და ფართის მესაკუთრეებს მართებთ.
გარდა ზემოთ ნახსენები ნაგებობისა, მსგავსი ტიპის შენობები კი საკმაოდ მრავლადაა მუნიციპალიტეტის მასშტაბით და ისინი, ხშირ შემთხვევაში, ეკონომიკის სამინისტროს კუთვნილებას წარმოადგენს. მათ ნუსხაშია ქალაქის ცენტრში, თავისუფლების ქუჩაზე მდებარე კინოს ყოფილი შენობაც, რომელიც ადრე “ქართული კინოს” საკუთრება იყო. რამდენიმე ათეული წელია ლანჩხუთში კინო აღარ ფუნქციონირებს და ახლა აქაურობა ნანგრევებისა და ანტისანიტარიის ბუდეს წარმოადგენს.
“საშინელებაა, რაც აქ ხდება. მართალია, ქუჩაში ბუნკერების დადგმამ მცირე შეღავათი მოგვცა, თუმცა, ყოვლად დაუშვებელია ასეთი შენობის არსებობა. მით უმეტეს, ქალაქის ცენტრში. თუ აღდგენას არ ექვემდებარება, კეთილი ინებონ და დაანგრიონ. რა გახდა ასეთი უსაშველო. ჩვენთვის არანაირი მნიშვნელობა არ აქვს, ვისაც უნდა იმას ეკუთვნოდეს ეს შენობა, ოღონდ საქმეს მიხედონ, რამე მოუხერხონ აქაურობას”, _ ასეთია ადგილობრივთა პოზიცია კინოს ყოფილ შენობაზე.
უკმაყოფილების მიზეზია ყოფილი ინტერნატის შენობა-ნაგებობაც, რომლის დროულ დემონტაჟს ითხოვენ მიმდებარე ტერიტორიაზე მცხოვრებლებიც: “საჭიროა დროულად მოხდეს აქაურობის დემონტაჟი, სანამ რაიმე უბედურება მომხდარა. ბავშვები შედიან ამ ნანგრევებში. საშიშია, არ ჩამოენგრეს ვინმეს თავზე კედელი და ნანგრევებში არ მოჰყვეს”.
ის, რომ როგორც კინოს, ასევე, ინტერნატის შენობა ეკონომიკის სამინისტროს საკუთრებას წარმოადგენს “გურია ნიუსთან” საუბარში ადასტურებს გია ნაჭყებიაც, თუმცა, ვერ ამბობს კიდევ რამდენი წელი იდგება ქალაქის არც მთლად პერიფერიულ ნაწილში ეს ნახევრად დანგრეული ნაგებობები, მით უმეტეს, რომ ინტერნატისგან განსხვავებით, კინოს ყოფილი შენობა ეკონომიკის სამინისტროს გასაყიდადაც არ აქვს გამოტანილი.
