ქობულეთში გამართულ თეატრალურ ფესტივალზე, „მზიანი საქართველო“, ოზურგეთის მუნიციპალიტეტის თოჯინების და მოზარდ მაყურებელთა პროფესიულმა თეატრმა პირველი ადგილი დაიკავა.
როგორც მაყურებლის, ისე ჟიურის რჩეული გახდა ნინო ანთიძის პიესა „მუჭანახევარა“. სპექტაკლის რეჟისორი აჭარის ავტონომიური რესპუბლიკის დამსახურებული მოღვაწე რევაზ ბაინაზიშვილია.
_ეს ფესტივალი წელიწადში ერთხელ იმართება. კონკურსში საქართველოს სხვადასხვა ქალაქის ცხრა თეატრი მონაწილეობდა. სპექტაკლი მარიონეტული იყო და მონაწილეობდა მთელი დასი. ჩვენმა, გურამ კეკელიძემ ასევე დაიმსახურა პრიზი მამაკაცის როლის საუკეთესო შესრულებისთვის. საუკეთესო მუსიკალური გაფორმებისთვის დაჯილდოვდა დავით მეგრელიძე. გეტყვით ასევე, რომ ოზურგეთის მუნიციპალიტეტის მერმა კოტე შარაშენიძემ თეატრს დაუმზადა თეჯირი, რომელიც ფესტივალს საჩუქრად გადაეცა. დაჯილდოების დროს, ჟიურიმ ასევე, როგორც საუკეთესო მერი, კოტე შარაშენიძე „ოქროს დიპლომით“ დააჯილდოვა. ჩვენ გადმოგვცეს და ჩამოვიტანეთ ოზურგეთში, – გვითხრა თეატრის სამხატვრო ხელმძღვანელმა, ლაშა კუტალაძემ.
ამ გამარჯვების ნიშნად, ოზურგეთის მოზარდ მაყურებელთა თეატრი შემოდგომაზე, ოქტომბერში, თოჯინების სახელმწიფო თეატრში წარსდგება თბილისელი მაყურებლის წინაშე.
ლაშა კუტალაძემ „გურია ნიუსთან“ ისაუბრა იმ ქველმოქმედებაზე, რასაც თეატრი მრავალი წელია ეწევა _ გურული მოზარდ მაყურებლებისთვის მართავენ უფასო სპექტაკლებს.
_განსაკუთრებით მობილიზებული ვიყავით და ვართ პანდემიის პირობებში. ჩვენი ხელფასით მოვახერხეთ, დავხმარებოდით 12 გაჭირვებულ ოჯახს. ვაგრძელებთ უფასო სპექტაკლების ჩვენებას ჩვენი ბავშვებისთვის, მოზარდებისთვის. გვეწვიონ, ნახონ, ჩვენ მათთვის ვმუშაობთ, _ გვითხრა ლაშა კუტალაძემ.
