ლანჩხუთში, სოფელ ნიგვზიანში მცხოვრებ ავთანდილ ჩხაიძის სახლ-კარი 11 ნოემბერს მომხდარი ხანძრის შედეგად განადგურდა. ოჯახი, ორ მცირეწლოვან ბავშვთან ერთად ფაქტობრივად, ღია ცის ქვეშ დარჩა და ახლა მხოლოდ კეთილი ადამიანების გვერდში დგომის იმედად არიან დარჩენილები. ერთ თვეში მესამე პატარასაც ელოდებიან, ყველაფერი შეგროვილ-ნაყიდი ქონდათ, რომ ამ დღეს ღირსეულად დახვედროდნენ, თუმცა, ცეცხლს არაფერი გადაურჩა და აქედან გამომდინარე, საჭიროებენ როგორც ფულად, ისე საოჯახო თუ საყოფაცხოვრებო ნივთებით დახმარებას.
„სამი წლის აშენებული გვქონდა ეს სახლი, გვიხაროდა, რომ ჩვენი კერა გვქონდა. რაც ოჯახს სჭირდებოდა ყველაფერი შევიძინეთ-ტელევიზორი, მაცივარი, სარეცხი მანქანა, მაგრამ ერთ დღეს ნაცრად იქცა ყველაფერი და დავრჩით ღია ცის ქვეშ, უსახლკაროდ. ყველაფერი დაიწვა, არაფერი გადარჩენილი, თუნუქის ფურცლების გარდა, მეუღლემაც ძვლივს გამოასწრო ცოცხლად. უფლის მადლობელი ვარ, რომ ბავშვები არ დამიობლა და უმამოდ არ დამიტოვა. თუმცა, რომ დავფიქრდები, როგორ წამიერად დაიფერფლა ჩვენი ნაწვალები, გული მიკვდება. ძალიან ბევრს შრომობდა ჩემი მეუღლე, რომ ოჯახისთვის საჭირო და აუცილებელი რაც იყო, გვქონოდა. სოციალუირად დაუცველები კი ვიყავით, მაგრამ წყალწაღებულები და ულუკმაპუროები არ ვყოფილვართ, ვშრომობდით და ოჯახს ვამატებდით,“- გვიყვება დარინე დუმბაძე, რომელიც მალე მესამე პატარას ელოდება.
ხანძრისას დარინე და მისი პატარები სახლში არ იმყოფებოდნენ. რთული ორსულობა აქვს და ამიტომ მშობლებთან იყო. ახლაც მათთანაა და ამბობს, რომ შვილები ხშირად ეკითხებიან, როდის დაბრუნდებიან მშობლიურ სახლში.
„როცა ინტერნეტის საშუალებით ბავშვებმა ნახეს როგორ იწვოდა და ნადგურდებოდა ჩვენი სახლი, ძალიან განიცადეს-მართლა აღარ გვაქ სახლიო?! ჯერ პატარაა, სამი წლის და ხშირად კითხულობს როდის დავბრუნდებით ჩვენს სახლში. ახლა მამაჩემთან ვარ, საკმაოდ რთული ორსულობა მაქვს, წოლითი რეჟიმი და ექიმის მეთვალყურეობა მესაჭიროება. მშობიარობა 15 იანვრისთვისაა დაგეგმილი, ჩემი ჯანმრთელობის მდგომარეობიდან გამომდინარე მშობიარობისას პირადი ექიმის აყვანა მესაჭიროება, რომ ჩემსა და ბავშვის სიცოცლხეს საფრთხე არ შეექმნას. ყველაფერი, რაც მშობიარობისთვის იყო საჭირო, მომზადებული და დალაგებული მქონდა, 1000 ლარიც მქონდა შეგროვილი ამ დღისთვის, მაგრამ ხანძარმა არაფერი არ დაგვიტოვა, ყველაფერი დაიწვა და მხოლოდ ის დაგვრჩა, რაც ტანთ გვეცვა. სოციალური ქსელით იყო ჩვენს დასახმარებლად აქტივობები, ზოგი ფულით დაგვეხმარა, ტანსაცმელებიც მოგროვდა ბავშვებისა და ჩემთვის, კომპიუტერი, ტელევიზორიც გვაჩუქეს და ამისთვის ყველასთან მადლობელი ვარ. ლანჩხუთის მერიაც დაგვეხმარა, როგორც ხანძრის შედეგად დაზარალებულებს ორი ათასი ლარი უნდა ჩაგვერიცხოს“, -ყვება „გურია ნიუსთან“ საუბარში დარინე დუმბაძე და საზოგადოებას მოკრძალებული თხოვნით მიმართავს, რომ შესაძლებლობის ფარგლებში დაუდგნენ გვერდით ამ მისთვის რთულ მომენტში.
„როგორც გითხარით, რთული ორსულობა მაქვს და მშობიარობისას გართულებები რომ არ მოხდეს, პირადი ექიმის აყვანა მესაჭიროება, ეს კი დამატებით თანხებთანაა დაკავშირებული, თუმცა, შექმნილი მდგომარეობიდან გამომდინარე ამის საშუალება არ გამაჩნია. ფული, რომელიც საამისოდ მქონდა გადადებული ცეცხლში დაიწვა. ჩემი თხოვნაა, ვისაც შესაძლებლობა აქვს დამეხმაროს, არაფერი არ დაგვრჩა, ყველაფერი განადგურდა. ტექნიკა, ავეჯი, ფული, ტანსაცმელი, ყველაფერი დაგვეწვა. ჩემი თხოვნაა, დამეხმაროთ ჩემი ოჯახისთვის ამ მძიმე პერიოდში, ყველაფერი გვჭირდება, არაფერი არ გვაქვს“- ამბობს დარინა, რომელსაც კეთილი და გულისხმიერი ადამიანების იმედი აქვს.
მოკლედ, ჩვენი თხოვნაა, რომ იქნებ შევძლოთ და უსახლკაროდ დარჩენილ ოჯახს, რომელიც მალე პატარა გოგონას ელოდება, დავეხმაროთ. ყველაფერი, რაც ქონდათ ცეცხლმა გაანადგურა და ახლა მართლაც მნიშვნელოვანია მათთვის ჩვენი გვერდში დგომა, ვისაც რით შეუძლია.
ჩხაიძეების ოჯახის დასახმარებლად ნებისმიერ მსურველს შეუძლია სასურველი თანხა ჩარიცხოს ანგარიშის ნომერზე GE05LB0711128267869000, მიმღები ომარ დუმბაძე.
