\ჩოხატაურის მუნიციპალიტეტის სოფელ ჭაჭიეთში სვანიშვილების ოჯახი პოლიეთილენში შეხვეულ სახლში ცხოვრობს, რომელსაც გარედან მხოლოდ “შიფერი” აქვს აკრული, იმისთვის, რომ ქარმა “ცელოფანი” არ გახიოს და ავარიული ჭერი მძინარე ადამიანებს თავზე არ დაეცეს.
ნაგებობა, რომელსაც სოციალურად დაუცველი ოჯახი 30 წელზე მეტია, საცხოვრებლად იყენებს, ძველი “კუხნაა”.
როგორც ქეთევან სვანიშვილი ამბობს, “მიუხედავად იმისა, რომ მან ადგილობრივ ხელისუფლებას დახმარების თხოვნით რამდენჯერმე მიმართა, ერთადერთი დახმარება, რაც მიიღო, სახლის გადასახური მასალაა, მაგრამ სახურავის ხის მასალა დამპალია და გადახურვას აზრი არ აქვს, ამიტომ ხელისუფლების მოწყალება ნალიის გადასახურად გამოიყენა.
“სახლი გვქონდა, მაგრამ გავყიდეთ, ძველი იყო. ახლის აშენება გვინდოდა. სანამ ავაშენებდით, ფული ბანკში შევიტანეთ, მაგრამ გაუფასურდა და ის ფული დარჩა ბანკში _ დაიკარგა. ვერაფერი გავაკეთეთ. დავრჩით ამ “კუხნაში”. შვილები აქ გავზარდე. 30 წელზე მეტია აქ ვცხოვრობთ. ინგრევა, ვერაფერს ვამატებთ. კარზე “ადიალები” ჩამოვაფარეთ, ქარი რომ არ შემოვიდეს.
ოთხი განცხადება მაქვს შეტანილი ადგილობრივ ხელისუფლებაში. მერიამ სახურავი მომცა, მაგრამ მარტო სახურავი რად მინდა? დამპალია ხე, რომელზეც უნდა დავახურო სახურავი, სახურავის მიცემა ამ შემთხვევაში ისეთივეა, კაცი შიშველი რომ იყოს და მარტო ქუდი აჩუქო. ამიტომ, იმ მასალით ნალია გადავხურე. ამ დამპალ სახლს შემოვაკარი “შილოპკა”, რომ ქარს არ გავეტანე. ყველა წელიწადს “ცელოფნების” ყიდვას ვერ ავუდივარ. რა ვქნა? სახლი ვერ გავაკეთე. დამპირდნენ, მოვა ახალი წელი და მოდიო, მაგრამ ვეღარ მივედი. ალბათ, მეტყვიან, სახურავი ხომ მოგეცით და რატომღა მოხვედიო. რად მინდა, ტყუილად ვიარო?! მრცხვენია მეც _ ერთხელ, ორჯერ, სამჯერ მივედი. ხალხის შეწუხება არ მიყვარს. შემოწმებაზეც რამდენჯერმე მოვიდნენ, სახლს სურათები გადაუღეს, მაგრამ არაფრით დამხმარებიან.
ამ სახლს აღარაფერი ეშველება. სამშენებლო მასალით თუ დამეხმარებიან, რომ ახალი ავაშენო”.
არსებობს შემთხვევები, როცა ხელისუფლებას დანგრევის პირას მყოფი სახლებიდან, ოჯახები გრძელვადიანი ქირით საცხოვრებლად გაჰყავს. ჩვენ ვკითხეთ ქალბატონ ქეთევანს, მსგავს შემთხვევაში დათანხმდებოდა თუ არა ქირით ცხოვრებას:
“ქირით გასვლა არ მინდა _ მე აქედან არსად არ წავალ. შემოსავლიანი ეზო გვაქვს, ვმუშაობთ ეზოში და ვართ. თუ ჩამოვარდება სახურავი, მერე კი მომხედავს, ალბათ, მთავრობა. თუ შემეძლება, გავაკეთებ, თუ არადა, სოციალური დახმარებით სახლს ვერ გავაკეთებ”, _ გვიპასუხა მან.
სვანიშვილების ოჯახში ვიზიტის შემდეგ ჩოხატაურის მუნიციპალიტეტის მერიის პრესსამსახურს დავუკავშირდით, სადაც ვცადეთ გარკვევა, დაეხმარება თუ არა ადგილობრივი ხელისუფლება სვანიშვილების ოჯახს:
“ასეთი ოჯახები, სამწუხაროდ, ჯერ კიდევ ბევრია. ამას ემატება სტიქიით დაზარალებული ოჯახები _ ხანძარი, მეწყერი…
კომისია აღნიშნულ ოჯახში ნამყოფია და მძიმე საცხოვრებელ პირობებში მყოფი ოჯახების დახმარების მუხლიდან, მერია შესაძლებლობის ფარგლებში დაეხმარება და სამშენებლო მასალის შესაძენად თანხას გამოუყოფს”, _ გვითხრეს პრესსამსახურში.
ჩვენ ვცადეთ გაგვერკვია, დაახლოებით რა თანხაზეა საუბარი და, სავარაუდოდ, როდის მოხერხდება სვანიშვილების ოჯახისთვის ამ თანხის გადაცემა, თუმცა, ჯეჯერობით, კონკრეტული პასუხი ვერ მივიღეთ:
“ამაზე კომისია იმსჯელებს. ზუსტი რაოდენობა ჯერ არ ვიცით”, _ გვითხრეს მერიის პრესსამსახურში.
“გურია ნიუსი” აღნიშნული კომისიის შეხვედრის შედეგებს აუცილებლად შეგატყობინებთ.
