საქართველოს პრემიერ მინისტრმა ირაკლი ღარიბაშვილმა გვიან ღამით, სოციალურ ქსელში პოსტი გამოაქვეყნა, რომელშიც წერს:
“დღეს გვქონდა ძალიან ნაყოფიერი შეხვედრა პრეზიდენტ შარლ მიშელთან.
მინდა, მას კიდევ ერთხელ მადლობა გადავუხადო იმისთვის, რომ უშუალოდ არის ჩართული მედიაციის პროცესში.
მისი წარმომადგენელი ამჟამად იმყოფება თბილისში და აგრძელებს მოლაპარაკებებს, როგორც ოპოზიციასთან, ისე _ ჩვენს პარტიასთან.
პროცესი გრძელდება. ჩვენ ხვალაც გვექნება დიალოგის შესაძლებლობა.
მინდა, ერთი რამ კიდევ ერთხელ ცხადად განვაცხადო _ ჩვენ ვართ მოწოდებული იმისთვის, რომ გამოსავალი ვიპოვოთ, მაგრამ ეს არც ერთ შემთხვევაში არ მოხდება ჩვენი სახელმწიფოს ინტერესების ხარჯზე.
ჩვენ რა თქმა უნდა, ვართ მზად, რომ სამართლიანი გადაწყვეტილება იყოს მიღებული. ეს უნდა იყოს ყველასთვის მეტ–ნაკლებად მისაღები კომპრომისი.
ღიად ვთქვით იმის თაობაზე, თუ რა არის ჩვენი პოზიცია. ბატონ შარლ მიშელს გავუზიარე ჩვენი პარტიის, მთავრობის პოზიცია და მან, ბუნებრივია, ყურადღებით მოისმინა ჩვენი შეთავაზებები.
ოპოზიცია ბოლო დღეების განმავლობაში განსაკუთრებული დესტრუქციული მანერით ცდილობს, ხელი არ შეუწყოს დიალოგის პროცესს, არამედ პირიქით, გააღრმავოს უფსკრული. ამის არაერთი მცდელობა, არაერთი პროვოკაცია ვნახეთ ბოლო დღეების განმავლობაში.
იმედი მაქვს, ოპოზიცია გააგრძელებს კონსტრუქციულ დიალოგს.
საბოლოო ჯამში, მთელი ცივილიზებული ევროპის და ამ შემთხვევაში, იგივე ბატონი შარლ მიშელის საბოლოო სურვილი და ამოცანაა, რომ ჩვენ, ხელისუფლებამ, ოპოზიციასთან ერთად, გავაგრძელოთ მუშაობა პარლამენტში.
ეს არის ჩვენი საბოლოო ამოცანა. ამას როგორ მივაღწევთ, გამოჩნდება მომდევნო დღეებში.
თავს შევიკავებ ჩვენი კონკრეტული პოზიციების გახმოვანებისგან, ვინაიდან შეთანხმება და მოლაპარაკებები დასრულებული არ არის. შარლ მიშელის პოზიციაა, რომ რაც შეიძლება მოკლე დროში, ჩვენ შევძლოთ საერთო ენის გამონახვა და კომპრომისი“, _ წერს ირაკლი ღარიბაშვილი.
მკითხველს შევახსენებთ, რომ დაიწყო საქართველოს პრემიერ-მინისტრ ირაკლი ღარიბაშვილის ძალიან მნიშვნელოვანი ვიზიტი ბრიუსელში.
ვიზიტის დღის წესრიგით გათვალისწინებული პირველი შეხვედრა პირისპირ ფორმატში გაიმართა ევროპული საბჭოს პრეზიდენტ შარლ მიშელთან.
ვინაიდან პირისპირ შეხვედრა პროტოკოლით გათვალისწინებულზე მეტხანს გაგრძელდა, ვერ მოესწრო გაფართოებული ფორმატის მოლაპარაკებების გამართვა.
პრემიერ-მინისტრი, სამთავრობო დელეგაციასთან ერთად, ევროპული საბჭოდან გაემგზავრა ბელგიის სამეფოს პრემიერ-მინისტრთან შეხვედრაზე, რომელიც შედგა დღის წესრიგით გათვალისწინებულ დროს.
ბელგიის სამეფოს პრემიერ-მინისტრთან შეხვედრის შემდეგ, პრემიერ-მინისტრი, ვიცე-პრემიერ ზალკალიანთან და ელჩ საბანაძესთან ერთად, დაბრუნდა ევროპულ საბჭოში, სადაც პრეზიდენტ მიშელთან გაფართოებული ფორმატის მოლაპარაკებები გაიმართა.
