2021 წლის 4 ივნისს, ოზურგეთის მერთან, ბატონ კონსტანტინე შარაშენიძესთან და რაიონში მოქმედ არასამთავრობო ორგანიზაციების წარმომადგენლებთან კომპანია სი-სი-ი-ეიჩ-ის მენეჯმენტის შეხვედრა გაიმართა. 2021 წლის 5 ივნისს კი, კომპანიის მენეჯმენტის წარმომადგენლები კურორტ ბახმაროში, ადგილობრივ მაცხოვრებლებს შეხვდნენ. მდინარე ბახვისწყალზე დაგეგმილი, და ამჟამად კვლევის ეტაპზე არსებული მცირე ზომის ჰიდროელექტროსადგურის, ბახვი 1 ჰესის, პროექტი კომპანიის დირექტორმა, მიხეილ ნიბლაძემ წარუდგინა საზოგადოებას. პროექტის განხილვა კითხვა – პასუხის რეჟიმში მიმდინარეობდა. დაინტერესებული მხარეების კითხვებს, კომპანიის დირექტორთან ერთად, პასუხობდნენ პროექტის მენეჯერი, გიგლა სიხარულიძე და გარემოს დაცვისა და სოციალური საკითხების მენეჯერი, ნანა ბერძენიშვილი.
აღსანიშნავია, რომ კომპანია ჩაღრმავებული კვლევების ეტაპზე გადავიდა, რომლის ფარგლებშიც პროექტში აქტიურად ჩაერთვნენ ევროპელი ექსპერტები.
„ჩვენი მიზანია, განვახორციელოთ ბახვი 1 ჰესის პროექტი საერთაშორისო ფინანსური ინსტიტუტების IFC -ისა და EIB-ს გარემოსდაცვითი და სოციალური საკითხების მართვის სტანდარტების სრული დაცვით, ასევე, საქართველოს კანონმდებლობისა და რეგულაციების შესაბამისად. კომპანიას შექმნილი აქვს დამოუკიდებელი გარემოსდაცვითი და სოციალური საკითხების მართვის სისტემა და ყოველ ჯერზე უზრუნველყოფს აღნიშნული სისტემით განსაზღვრული წესების დაცვას, რაც გულისხმობს არა მარტო ადგილობრივი კანონმდებლობის შესაბამისი კვლევების ჩატარებას და განხორციელებას ადგილზე, არამედ უფრო მეტიც, საერთაშორისო და ადგილობრივი მაღალი კვალიფიკაციის ექსპერტების მოწვევას და მათ მიერ კონკრეტული კვლევების განხორციელებას. ეს სტანდარტები ფაქტიურად გზამკვლევია კომპანიისათვის, თუ რა ტიპის კვლევები და შემარბილებელი ღონისძიებები უნდა გატარდეს, გარემოზე და ადამიანებზე ზემოქმედების მინიმუმამდე დაყვანის მიზნით. ჩვენ გვსურს, დავამტკიცოთ და შევქმნათ პრეცედენტი იმისა, რომ მცირე ჰესების მშენებლობა საქართველოში შესაძლებელია ისეთი შემარბილებელი ღონისძიებების დაგეგმარებითა და განხორციელებით, რომლებსაც მინიმუმზე დაჰყავთ გარემოზე ზემოქმედება“, _ განაცხადა სი-სი-ი-ეიჩ ჰაიდრო VI – ის დირექტორმა, მიხეილ ნიბლაძემ.
ამ ეტაპზე, მიმდინარეობს ბახვი 1 ჰესის სრული ტექნიკურ-ეკონომიკური დასაბუთება (ე.წ. “ფიზიბილითი”), რომელიც მზადდება საერთაშორისო გამოცდილების მქონე ევროპული საკონსულტაციო კომპანია “აფრის” მიერ. კომპანია 1895 წლიდან არსებობს და მსოფლიო ლიდერია ინჟინერიის, დიზაინისა და საკონსულტაციო მომსახურების სფეროში. “ფიზიბილითის” დასრულების შემდეგ, პროექტის ტექნიკური პარამეტრები დაზუსტდება და გარემოს დაცვის კუთხით ზეგავლენა აისახება გზშ-ს დოკუმენტში.
კომპანიამ უკვე დაიწყო მუშაობა ბახვი 1 ჰესისთვის კლიმატის ცვლილების რისკის შეფასების კვლევის ჩატარების მიმართულებით. ანგარიშის მომზადების პროცესში ჩაერთო ფონდის ექსპერტი ბატონი პიერ ბიდერმანი, რომელიც კარგად იცნობს საერთაშორისოს აღიარებულ მიდგომებსა და მეთოდოლოგიებს მსგავსი სახის კვლევების მომზადების კუთხით. 2020 და 2021 წლებში პიერ ბიდერმანი გურიას სტუმრობდა, სიტუაციის ზოგადი ანალიზისათვის. ის ასევე, კომპანიის მრჩეველია ბიომრავალფეროვნების და სოციალური საკითხების მიმართულებით.
სი-სი-ი-ეიჩ ჰაიდრო VI ასევე გეგმავს, საერთაშორისო კომპანიის მოწვევას, რომელიც გამოიყენებს IHA (International Hydropower Association)-ის მიერ შემუშავებულ მეთოდოლოგიას. IHA -იმ (International Hydropower Association) შეიმუშავა კლიმატის მდგრადობის სახელმძღვანელო, სადაც მოცემულია მეთოდოლოგია ყველა ტიპის (განახლება, გრინფილდი), მასშტაბისა და გეოგრაფიის ჰიდროენერგეტიკული პროექტისთვის. მეთოდოლოგია, განიხილავს კლიმატის რისკის სკრინინგს, მონაცემთა ანალიზს, კლიმატის მდგრადობის ტესტირებას, კლიმატის რისკის მართვას და მონიტორინგს, შეფასებას და ანგარიშგებას.
ბიომრავალფეროვნების კვლევაში უკვე ჩაერთო მსოფლიოში აღიარებული საკონსულტაციო კომპანია SLR-ის ბრიტანეთის ოფისი. ის 1994 წლიდან გლობალური ლიდერია გარემოსდაცვითი და საკონსულტაციო გადაწყვეტილებების მიმართულებით და მსოფლიოს მასშტაბით თავის კლიენტებს ეხმარება მიაღწიონ მდგრადობის მიზნებს.
კომპანიისთვის უმნიშვნელოვანესია დაცულ სახეობებზე ზრუნვა. დაცულ სახეობებში იგულისხმება, როგორც საქართველოს წითელი ნუსხის სახეობები, ასევე IUCN (International Union for Conservation of Nature) მიერ დაცული სახეობები. ადგილზე, 2021 წლის მაისის ბოლო კვირაში უკვე იყვნენ ჩასულები იხტიოლოგი, ზოოლოგი და ორნიტოლოგი. 12 ივნისიდან საქართველოში ჩამოვა SLR -ის წარმომადგენელი ნიკოლა ფაუკსი, რომელიც ჩაატარებს ღამურების კვლევას, ასევე 12 ივნისის კვირაში იგეგმება ამფიბიების და რეფტილიების კვლევა, ხოლო ივნისის ბოლოს იგეგმება კვლევა ბოტანიკოსის მიერ, ფლორის შესასწავალდ.
„ჩვენ გვაქვს მზაობა და დიდი სურვილი კვლევების ეტაპზე ვითანამშრომლოთ ყველა დაინტერესებულ ჯგუფთან. კომპანია ღიად და გამჭირვალედ ახორციელებს ყველა სამუშაოს და ადგილობრივ გარემოსდამცველებს მივცემთ საშუალებას დააკვირდნენ მკვლევარების მუშაობას. ვფიქრობ, ეს საინტერესო შეთავაზებაა და უნიკალური შესაძლებლობა ადგილობრივი გარემოსდამცველებისთვის მონაწილეობა მიიღონ კვლევებში საერთაშორისო რანგის და ადგილობრივ ექსპერტებთან ერთად“, _ განაცხადა მიხეილ ნიბლაძემ.
მსოფლიოში აღიარებული კომპეტენტური საკონსულტაციო და კვლევითი ორგანიზაციების და ექსპერტების მიერ ჩატარებული კვლევების შედეგები დაემატება გზშ-ს ანგარიშს და განხილვისთვის გადაეცემა საქართველოს გარემოს დაცვისა და სოფლის მეურნეობის სამინისტროს.
2021 წლის 5 მაისს, ბახვი 1 ჰესის პროექტის განხილვა გაიმართა ჩოხატაურის მუნიციპალიტეტის საკრებულოში. განხილვას ესწრებოდნენ პროექტის განმავითარებელი კომპანიის შპს სი-სი-ი-ეიჩ ჰაიდრო VI-ის მენეჯმენტის წარმომადგენლები, ჩოხატაურს საკრებულოს წევრები, არასამთავრობო ორგანიზაციების, სამოქალაქო საზოგადოების და მედიის წარმომადგენლები.
(R)
