თბილისში, წიგნის ფესტივალზე, უდროოდ გარდაცვლილი ჩოხატაურელი ახალგაზრდა, ბეგი მამალაძე გაიხსენეს და ბეგის რიგით მეორე წიგნი, „მე ვხედავ“ წარადგინეს.
ნოდარ დუმბაძის გამომცემლობა და ლიტერატურული სააგენტოს ხელმძღვანელმა, ქეთევან დუმბაძემ წიგნის შესახებ საუბრისას გაიხსენა, რომ ბეგის ბავშვობიდან იცნობდა.
„ის იყო საოცარი ადამიანი, ვისაც უყვარდა ნოდარ ბიძია და მზიურში ხშირად დადიოდა. როდესაც შევნატროდით მის გაზრდას, დაკაცებას, მოხდა საშინელება. ეს წიგნი გამოცემულია ამ საოცარი ბიჭის ნაფიქრალის გამო“,_ აღნიშნა დუმბაძემ.
წიგნის რედაქტორმა, ნინო ზედელაშვილმა აღნიშნა, რომ პატარა ბეგიმ შეძლო თანატოლებისთვის კუმირი გამხდარიყო.
„ბეგიმ მოახერხა და გამონახა საერთო ენა თავის თანატოლებთან. მოახერხა და თქვა სათქმელი, რომელიც აღმოჩნდა ყველა მისი თანატოლის სათქმელი, ტკივილი. ის იყო რეპერი და ამ რეპის საშუალებით ცდილობდა ადამიანებისთვის დაენახვებინა სიკეთე, სიყვარული. შეცდომებიც დაუშვა და ლექსებით, თავის ტოლებს სთხოვს, სანამ შეცდომას დაუშვებენ, წინ გაიხედონ“,_ აღნიშნა ზედელაშვილმა.
ქალბატონმა ნინომ, რომელიც ასევე ბეგის დეიდაა, გაიხსენა დღე, როცა ბეგის დაბადებას ელოდებოდა.
„სიყვარულის ბიჭი იყო. სანამ გაჩნდებოდა სამშობიაროს ეზოში მომლოდინე მე და ჩემ შვილთან ექიმი მოვიდა და სისხლის ჩაბარება მთხოვა. მარიკას საკეისრო კვეთას უკეთებდნენ. ძალიან ვნერიულობდი. სისხლი გავიღე თუმცა არც მარიკას და არც ბეგის არ დასჭირვებიათ, მაგრამ იმავე დღეს სხვას დასჭირდა და გადაუსხეს კიდეც ბეგისთვის დაუშურვებლად გაღებული სისხლი. მთელი ცხოვრებაც ასე გაატარა. დაუღალავად შეეძლო სიკეთის კეთება, ადამიანების გვერდში დგომა და დახმარება. პატარაობიდან უცნაური იყო ბეგი. განსხვავებული თავისი დამოკიდებულებებით. აღქმის და ფანტაზიის საოცარი უნარით დაჯილდოებული“,_ იხსენებს ქალბატონი ნინო.
მისი თქმითვე, დიდი იყო მოთხოვნა ახალგაზრდების მხრიდან, რომ ბეგის ლექსები ხელმისაწვდომი ყოფილიყო, რამაც გამოიწვია წიგნის გამოცემა, რომელიც ლექსებს და რეპის ტექსტებს აერთიანებს.
ცნობისთვის, გაბრიელ ბეგი მამალაძე 18 წლის ასაკში, 2015 წლის 25 მაისს სისასტიკემ, გაუტანლობამ, გულქვაობამ და გულგრილობამ შეიწირა, თუმცა, მან მისი შემოქმედების ირგვლივ არაერთი ახალგაზრდის გაერთიანება და საზოგადოების მახსოვრობასა და გულში ადგილის დამკვიდრება გარდაცვალების შემდეგაც შეძლო.
რაც შეეხება წიგნის ფესტივალის ფარგლებში გამომცემლობის მიერ წარდგენილ სხვა 5 წიგნს, ესენია: თათია მთვარელიძის პოეტური კრებული, თინათინ ხუტურიძის „ლიტკარანტინი“, „ნოდარ ბაბუს ლექსები“, კატო ჯავახიშვილის „სად არის ანდრეიკა“, ალბერ კამიუ, რენე შარი „მიმოწერა“, „უსაზღვროდ“ პროზა და პოეზია.
ფესტივალზე პანდემიის პერიოდში გამოცემული 6 წიგნი წარადგინა ნოდარ დუმბაძის გამომცემლობამ და ლიტერატურულმა სააგენტომ.
„წარდგენილი წიგნები ბოლო გამოცემებია. იმ ავტორების ნამუშევრები, რისი გამოცემაც ამ პანდემიის პერიოდში მოახერხა გამომცემლობამ. ჩვენს დახლზე დაახლოებით 100 წიგნია წარმოდგენილი, მაგრამ ეს 6 წიგნი ბოლოგამოცემებია“,_ გვითხრა ქეთევან დუმბაძემ.
ავტორი: რუსა ოქრუაშვილი
