თხილის კულტურის მასობრივად დაავადების შემდეგ, რაც სიდამპლით გამოიხატა ყველაზე მეტად, დღის წესრიგში ამ კულტურის გადარჩენის საკითხი დადგა.
ბოლო სამი წელია, მოსახლეობა, ასე თუ ისე, თანდათან ჩაება თხილის გადარჩენის პროცესში, რასაც აუცილებელი, არაერთი შეწამვლა სჭირდება.
როგორც გამოცდილებამ დაადასტურა, თხილის კულტურის მდგომარეობა თითქმის სრულად გაუმჯობესდა იმ მესაკუთრეთა პლანტაციებში, ვინც, მოსავლის აღებამდე, სულ ცოტა, ხუთჯერ მაინც შეწამლა თხილი.
ნაწილობრივ შეწამლულ პლანტაციებში სრულფასოვნად არ ხდება ნაყოფის და მცენარის მდგომარეობის გაუმჯობესება, რაც თავს იჩენს კონკრეტულ შემთხვევაში _ შენახვის შემდეგ, თხილის გული მაინც იწყებს ლპობას.
ჩვენი მკითხველები ხშირად გვიკავშირდებიან და გვთხოვენ, კონკრეტულად ვუთხრათ, როდის და რით შეწამლონ პლანტაციები.
ჩვენ გვაქვს ერთი შენიშვნა _ შეწამვლის საჭიროება, სოკოვანი დაავადებების თუ მავნებლების არსებობის გარდა, მკვეთრად არის დამოკიდებული იმაზე, როგორი ამინდები ჭარბობს მოცემულ სეზონზე და როგორია მსხმოიარობა.
ამიტომ ჩვენს მკითხველ მეურნეებს ვურჩევთ, როგორ იმოქმედონ კონკრეტულად ივლისში.
ვხედავთ, რომ ამ სეზონზე თხილის კულტურის მსხმოიარობა უჩვეულოდ მაღალია. ამიტომ, აუცილებელია, რომ წელს განსაკუთრებით შეაშველოთ მცენარეს ფოთლების მკვებავი, კალიუმის შემცველი პრეპარატი.
რა თქმა უნდა, მკვებავ პრეპარატს უნდა შევურიოთ სისტემური პრეპარატები. ასევე, თუ ფაროსანა დიდი რაოდენობითაა, მისი საწინააღმდეგო პრეპარატებიც. ასეთი კომბინირებული ნაზავით უნდა შეიწამლოს თხილი ივლისში.
რატომ არის საჭირო სისტემური პრეპარატები და არა კონტაქტური? იმიტომ, რომ წლევანდელი ამინდები უმეტესად წვიმიანია. ამასთანავე, მსხმოიარობა საკმაოდ მაღალია. ნაყოფმა რომ მოასწროს “დამდიდრება”, როგორც გურიაში სრულფასოვან ნაყოფს ეძახიან, აუცილებელია მკვებავი _ კალიუმიანი პრეპარატის შეშველება.
შეგახსენებთ, თუ ფაროსანა დიდი რაოდენობით არ არის და თხილის პლანტაციის დათვალიერებისას სამი-ოთხი მწერი ნახეთ, არ არის აუცილებელი მისი საწინააღმდეგო პრეპარატის გამოყენება.
