ალექსანდრე წუწუნავას სახელობის ოზურგეთის სახელმწიფო თეატრში წლის ბოლომდე სამი სპექტაკლის პრემიერა შედგება.
თეატრის სამხატვრო ხელმძღვანელის ვასილ ჩიგოგიძის თქმით, ეს დადგმებია: ჰოფმანის მიხედვით „მარი და ჰარის თავგადასავალი“ (რეჟისორი ვასილ ჩიგოგიძე), ასევე, რეჟისორი გოჩა კაპანაძე უკვე მუშაობს სპექტაკლზე „გურიის უკანასკნელი დედოფალი სოფია“, ხოლო რეჟისორი ნიკოლოზ საბაშვილი საავტორო სპექტაკლს _ „გურიის რესპუბლიკას“ დადგამს.
“ჩემი ინიციატივით იგეგმება გურიის წარსულის გაცოცხლება სცენაზე. ივლისის ბოლოსკენ იქნება “გურიის უკანასკნელი დედოფალი სოფიას“ პრემიერა, ნოემბერში კი, მაყურებელს ექნება საშუალება იხილონ “გურიის რესპუბლიკა“.
დედოფალ სოფიას შესახებ ფაქტების მოძიებაში ძალიან დაგვეხმარა ოზურგეთის ისტორიული მუზეუმი, კონკრეტულად მანანა ლომაძე და ასევე, პროფესორ ქველი ჩხატარაშვილის ოჯახი“, _ აღნიშნა ვასილ ჩიგოგიძემ ჟურნალისტებთან შეხვედრის დროს.
ცნობილი რეჟისორი გოჩა კაპანაძე უკვე ოზურგეთშია და დაიწყო მუშაობა მის ახალ სპექტაკლზე. მისი თქმით, სოფია გურიელის ისტორია გულგრილს არავის დატოვებს. მანვე „გურია ნიუსთან საუბრისას აღნიშნა, რომ სოფია არის ქალი, რომელსაც უყვარდა თავისი რეგიონი და სამშობლო.
“პირველ რიგში, მინდა ვთქვა, რომ ოზურგეთის თეატრში სპექტაკლის დადგმა ძალიან საპატივცემულოა. საოცარი გარემოა, შესანიშნავი სამსახიობო გუნდია, როგორც ყველამ ვიცით, თეატრი ახალგარემონტებულია.
ბატონი ვასილ ჩიგოგიძე დიდი ხანია მთავაზობდა, რომ დამედგა სპექტაკლი ოზურგეთის თეატრში და როგორც იქნა, დადგა ამის დრო.
პირველად გვინდოდა ექვთიმე თაყაიშვილზე დაგვედგა სპექტაკლი, მაგრამ ეს თემა სხვა სიღრმეებს ითხოვდა, სხვა ძალები იყო საჭირო, როგორც შემოქმედებითი, ისე ტექნიკური… ამ ეტაპზე მივიჩნიეთ ძნელად გასაკეთებლად, მაგრამ ძალაში რჩება ამ სპექტაკლის დადგმა.
საინტერესოა სოფიო გურიელის ისტორია. ჩემთვის ეს არის ქალი, რომელმაც იმ პერიოდში ბევრი მამაკაცის საქმე გააკეთა და ღირსება შეუნარჩუნა ქვეყანას, თავის რეგიონს. ასევე, ღირსება შეუნარჩუნა საკუთარ ქმარს და წარმომავლობას. ეს ქალი არის უშიშარი და სამშობლოზე შეყვარებული. ვფიქრობ, რომ სოფიო გურიელის შესახებ ამ სპექტაკლიდან მაყურებელი ბევრ საინტერესო და მნიშვნელოვან ფაქტს გაეცნობა.
ერთ–ერთი ბრძოლის წაგების დროს მას მოუწია ლიხაურიდან თურქეთში წასვლა. ძალიან მძიმე რეალობის წინაშე დადგა, მას უნდა გადაეწყვიტა უმოკლეს დროში ხუთი შვილიდან რომელი გადაეყვანა მეზობელ ქვეყანაში. ეს ამბავი ჩემთვის გაიგივებული არის მედეას თემასთან. იმიტომ, რომ დედამ არჩევანი უნდა გააკეთოს, რომელი შვილი უნდა წაიყვანოს თან. მას უფლისწული დავითი და უფლისწული ეკატერინე მიყავს, რადგან იცის, რომ უფლისწულებს უფრო მეტი პრობლემები შეექმნებოდათ დარჩენის დროს“, _ გვითხრა გოჩა კაპანაძემ.
როგორც მედიის წარმომადგენლებისთვის გახდა ცნობილი, სოფიოს როლში მაყურებელი თამარ მდინარაძეს იხილავს.
ავტორი: გიორგი გირკელიძე
