კენკროვანი კულტურების ფორუმი გურიაში, სოფელ ნარუჯაში წელს პირველად ჩატარდა.
როგორც წესი, ღონისძიებას ახლდა საზეიმო განწყობა, ფერადი და რა თქმა უნდა, მწიფე მოცვის გარემო, სადაც აშშ ელჩმა კელი დეგნანმა და სოფლის მეურნეობის მინისტრმა ლევან დავითაშვილმა მოცვის ნაყოფი სიმბოლურად მოკრიფეს და დააგემოვნეს.
წაჩურჩულებას _ „მოცვის შეწამვლა რომ ხდება, საზიანო ხომ არ იქნება?“, ჩაჩურჩულებაც მოჰყვა: „ეს არაა შეწამლული, ბიოპროდუქციაა, ალბათ, სპეციალურად დატოვეს ან საერთოდ ბიოსასუქებით წამლავენო“.
„გურია ნიუსი“ შეეცადა, სოფლის მეურნეობის მინისტრ ლევან დავითაშვილისთვის რამდენიმე კითხვა დაესვა, რაც ყველაზე ძალიან აწუხებს და უჩნდება ადგილობრივ მოსახლეობას _ კონკრეტულად, ეს ეხება მოცვის გაშენებას გურიაში და ასევე, რეგიონში საგრანტო პროგრამების მოზიდვას.
_ბატონო ლევან, გურიაში მოცვის გაშენების წინააღმდეგი არავინაა, თუმცა, მოსახლეობის დიდი ნაწილი მიიჩნევს, რომ ამ კულტურის გაშენება უფრო მილიონების „საშოვარია“ კონკრეტული პირების ხელში, ვიდრე მასობრივი დასაქმების პროექტი. ამიტომ ითხოვენ, ანალოგიური პროექტი ჩაის რეაბილიტაციისთვის გახორციელდეს. რას გვეტყვით?
_ მოცვის გაშენებას აქვს დიდი პერსპექტივა. ამას მოწმობს ბოლო ორი წლის შედეგი. არ არის სწორი, რომ მოცვის გაშენება წამგებიანია.
_ ხალხი ამბობს, რომ მოცვზე დასაქმება ერთი თვით ხდება, ჩაიზე კი 6-7 თვით. შესაბამისად, არანაკლები იქნება მოსავალიც და სახელფასო ანაზღაურებაც…
_ მხოლოდ ამ ერთზე დაგეთანხმებით, რომ ერთი თვის განმავლობაშია კრეფა…
_ გურიას არ აკლია გრანტები, ოღონდ მიმართულებებს გააჩნია! აქ, ძირითადად, სათავისოდ წერენ! რაც რეგიონს ავითარებს-ტურიზმი და სოფლის მეურნეობა-ამ კუთხით არ ვართ სამიზნე აუდიტორია! რას მოიმოქმედებთ? ლობირება სჭირდება გურიას ამ მხრივ…
_ ვერ დაგეთანხმებით, ჩვენ დაფარული გვაქვს ამ მხრივ მთელი საქართველო (?) _ გვითხრა მინისტრმა და სწრაფად გაგვეცალა.
მინისტრ დავითაშვილის ასეთი პოზიცია – სასწრაფოდ გაცლა საუბრის დროს, გურიაში მარტო ჟურნალისტებთან არაა შემჩნეული. წარმატებული ფერმერებიც საუბრობენ გურიაში მინისტრის „სასწრაფოდ გაცლაზე“, პრობლემებზე საუბრის დროს….
„თუ გვიბარებთ, გვესაუბრეთ პრობლემებზე, თუ არადა, ერთ მზიან დღეს მაინც ნუ დაგვაკარგვინებთ ტყუილად“, _ უთხრეს არც ისე დიდი ხნის წინ, გურიაში ყოფნისას ბატონ ლევანს, რაზეც „გურია ნიუსი“ უკვე ვწერდით.
კენკროვანთა ფორუმზე ნარუჯაში, დღის განმავლობაში ხშირად ისმოდა ფრაზები: „გვიმატებენ ათ მილიონს“, „აშშ საქართველოს აქტიურად ეხმარება სოფლის მეურნეობის განვითარებაში“, „უნდა გიამბოთ ღირებულებათა ჯაჭვზე“… და ასე შემდეგ. თუმცა, ფერმერებამდე, რომლებთან კომუნიკაციის გასაჭირზე თავად დავითაშვილმა თქვა თავისი გამოსვლისას, როგორ და რა ეფექტურობით მივა ეს ყველაფერი, არავის უთქვამს.
დარბაზში კი, საბოლოოდ, 25 ადამიანი თუ იჯდა, თან, მათ შორის, იყვნენ სახელმწიფო მოხელეებიც და ჟურნალისტები…
ავტორი: მარინა ჩიხლაძე
