15 ივლისს გურიაში, წვერმაღალას პარკში, აგროტურისტული ფესტივალი „ჩაის გზა“ ჩატარდა.
ღონისძიება გახსნა ოზურგეთის მუნიციპალიტეტის მერიის ეკონომიკის სამსახურის უფროსმა, ფესტივალის ერთ-ერთმა მთავარმა ორგანიზატორი ალეკო მამეშვილმა.
_ ჩაის გზის იდეა ჩემთვის, როგორც იაპონელისთვის, ძვირფასი იდეაა, რადგან ჩვენს ქვეყანაში ჩაი უდიდესი კულტურაა. იაპონელს რომ ესტუმრები, ჯერ მწვანე ჩაის მოგართმევს, შემდეგ კი როგორც მოგესურვებათ, ისე შეათვალიერებთ მენიუს! ჩვენ დიდი პლანტაციები გვაქვს, თუმცა იაპონიაში ჩაი არ დამიკრეფია. დღეს კი გურიაში მოვკრიფე ჩაი. ვამაყობ, რომ სასოფლო -სამეურნეო ტურისტი ვარ თქვენს ჩაის გზაზე! მინდა, ჩვენი გამოცდილება გაგიზიაროთ-იაპონიაში ჩაის მიირთმევენ მცირე ოთახში, რაც მედიტაციაა. გაიზიარეთ ჩვენი გამოცდილება, ეს მნიშვნელოვანია თქვენთვის. უღრმესი მადლობა ოზურგეთის მუნიციპალიტეტის მერს, მერიას, გაეროს განვითარების ფონდს, რადგან ამ შესანიშნავ იდეას, ყველამ ერთად, დასაბამი შეუქმნა, _ თქვა ფესტივალზე იაპონიის ელჩმა საქართველოში, იმამურა აკირამ.
გაეროს განვითარების პროგრამების მუდმივი წარმომადგენელი საქართველოში ანა ჩერნიშევა ემოციური გამოსვლით წარსდგა ფესტივალის მონაწილეთა წინაშე:
_მოგესალმებით. ბედნიერი ვარ, რომ გურიაში ვარ! რა კარგი ხალხი ცხოვრობს აქ! მინდა დავაფიქსირო ჩემი სიხარული მისი უდიდებულესობა, იაპონიის ელჩის მიმართ, რომელიც ჩვენი პროგრამის ერთ-ერთი მთავარი მხარდამჭერია . ჩვენი სიძლიერე იმაშია, რომ ვიპოვეთ გადაკვეთის წერტილი და ეს არის „ჩაის გზა“ და ეს მოხდა გურიაში! გურია არის ის ადგილი, რომელსაც განსაკუთრებული ადგილი უჭირავს ჩემს გულში. ის ჩემთვის ძალიან მაღალი ხარისხის ჩაისთან ასოცირდება! გარდა ჩაისა, გაეროს აქვს გაცილებით მეტი შეთავაზებები გურულებისთვის-სამთო ტურიზმი, საზღვაო ტურიზმი და მაქვს ბედნიერება , მხარი დავუჭირო ასეთ პატარა მხარეს, ასეთი დიდი შესაძლებლობებით! მადლობა ორგანიზატორებს, მერიას, გუბერნიას, ყველას , ვინც ჩვენთან მუშაობს ამ განვითარების გზაზე, – თქვა ქალბატონმა ანამ.
ფესტივალზე, რომელიც საუცხოო გარემოში-წვერმაღალას პარკში შედგა, გურიის რეგიონში წარმოებული პროდუქციის გამოფენა-გაყიდვა მოეწყო, ბოლო არ უჩანდა პრეზენტაცია-დეგუსტაციებს. გამოფენილი იყო რეგიონის ტურისტული პოტენციალის ამსახველი კუთხეები, ისმოდა გურული ხალხური სიმღერები, რაც თავისთავად ჩვენი კულტურის წარდგენა გახლდათ სტუმართა წინაშე.
_ ასეთი ფესტივალი პირდაპირ არის ჰაერი ჩვენი რეგიონისთვის. აქ ხდება გაცნობა ჩვენი მწარმოებლებისა მოხმარებლებთან, ტურისტებთან. ამიტომ საშუალება რომ იყოს, წელიწადში სამჯერ უნდა ჩატარდეს, _ ღიმილით დაასრულა კომენტარი „გურია ნიუსთან“ ცნობილმა მრავალმხრივმა წარმატებულმა ფერმერმა და მეწარმემ დავით თენიეშვილმა, რომლის მთავარ საქმეს ჩაის წარმოება წარმოადგენს.
აგროტურისტული ფესტივალი „ჩაის გზა” ჩატარდა ოზურგეთის მერიის ორგანიზებით და მხარდამჭერია გაეროს განვითარების პროგრამა (UNDP), შვეიცარიის განვითარებისა და თანამშრომლობის სააგენტო (SDC), ავსტრიის განვითარების სააგენტო (ADC) და საქართველოს რეგიონული განვითარებისა და ინფრასტრუქტურის სამინისტრო.
ვრცლად გურიაში აგროტურისტული ფესტივალის, „ჩაის გზის“ შესახებ, მალე გიამბობთ.
ავტორი: მარინა ჩიხლაძე
