ლანჩხუთის საკრებულოს მორიგ სხდომაზე, რომელსაც ადგილობრივი საკანონმდებლო ორგანოს პირველი პირი ბესიკ ტაბიძე უძღვებოდა, დეპუტატებმა მერიის საფინანსო-საბიუჯეტო სამსახურის უფროსისგან, როლანდ ლაშხიასგან მოისმინეს განმარტებები.
მერიის მიერ საკრებულოში წარმოდგენილი განმარტებითი ბარათის მიხედვით, საქართველოს მთავრობის მიმდინარე წლის 11 მარტის დადგენილებაში ცვლილება შევიდა და სტიქიის შედეგების სალიკვიდაციო ღონისძიებებისთვის ლანჩხუთს დამატებით 460,0 ათასი ლარი გამოეყო. გამოყოფილი თანხა დაზიანებული სახლებისთვის პროფნასტილის მასალის შესაძენად მიიმართება.
წინა წლებში ინფრასტრუქტურული პროექტებიდან მიღებული 74248 ლარის ეკონომისა და ადმინისტრაციული შენობის სარემონტო სამუშაოების ხარჯების შემცირებიდან მიღებული 95000 ლარით, როგორც საკრებულოს სხდომაზე ითქვა, სტიქიის შედეგად დაზიანებული გზების რეაბილიტაცია იგეგმება აკეთსა და სოფელ გულიანში.
ბიუჯეტში განსახორციელებელი ცვლილების მიხედვით, ხიდების რეაბილიტაციისთვის სოლიდური თანხების გახარჯვაა გათვალისწინებული მუნიციპალიტეტის სხვადასხვა ლოკაციაზე. კერძოდ, თანხა, 175 900 ლარის ფარგლებში, გაიხარჯება ქალაქის ადმინისტრაციულ ერთეულში; ორაგვისღელის უბანში ხიდის რეაბილიტაციას 175 900 ლარი უნდა მოხმარდეს; სოფელ ქვიანში, რუსთაველის ქუჩაზე ხიდის მოსაწყობად, მერიის წინადადებით, 152 500 ლარი მიიმართება. ასევე, ხიდის რეაბილიტაციაა დაგეგმილი სოფელ ლესაში, ე.წ. კორეის უბანში და საამისოდ 36 600 ლარის გახარჯვა იგეგმება; სოფელ ჩოჩხათში, კერძო პირის ეზოსთან სახიდე გადასასვლელის მოსაწყობად ბიუჯეტიდან 25 ათასი ლარი გამოიყოფა; ქალაქში, კვირკველიას ქუჩაზე სტიქიის სალიკვიდაციო ღონისძიებაზე სანიაღვრე არხების მოსაწყობად დამატებითი სამუშაოებისთვის 29 ათასი ლარი მიიმართება; 12 ათასი ლარია გათვალისწინებული სოფელ შუხუთში გაბიონის მოსაწყობად; მამათში კი წყალსადენის რეაბილიტაციისთვის დამატებით ხუთი ათასი ლარი გამოიყო; ჯიხეთის დედათა მონასტრის ელექტროფიკაციის ღონისძიებებისთვის კი ბიუჯეტი 30 ათას ლარს გაიღებს. აცანაში სტიქიის შედეგად დაზიანებული მ. ჩხაიძის სახლის რეაბილიტაციისთვის 22 ათასი ლარია განკუთვნილი, რაც ადგილობრივი ბიუჯეტიდან დაფინანსდება.
მერიის საფინანსო-საბიუჯეტო სამსახურის მიერ საკრებულოში წარმოდგენილი განმარტებებით, სპეცტექნიკის შესაძენად 80 ათასი ლარით იზრდება მუნიციპალიტეტის გარეგანათების არაფინანსური აქტივების მუხლი; ორი ათასი ლარით იზრდება ჯანდაცვის ღონისძიებების არაფინანსური აქტივების მუხლი. მუნიციპალიტეტის ვებგვერდის განახლებისთვის კი 4100 ლარია განკუთვნილი.
როლანდ ლაშხიასვე განმარტებით, ა(ა)იპ-ების მომართვიანობის საფუძველზე იზრდება მათი დაფინანსება. კერძოდ, საფეხბურთო სკოლის საქონელი და მომსახურების მუხლი იზრდება 40 ათასი ლარით. შპს ლანჩხუთის „გურიასა“ და შპს „ლანჩხუთის“ დაფინანსება გამოიყოფა 25-25 ათასი ლარი, ქალთა საფეხბურთო სკოლის დაფინანსება კი _ ოთხი ათასი ლარით; 19 400 ლარით იზრდება ჯანდაცვის ცენტრის დაფინანსება. კულტურის დაწესებულებათა გაერთიანების სხვა საქონელი და მომსახურების მუხლი იზრდება 15 ათასი ლარით, ხოლო ეკონომიკური განვითარებისა და ინოვაციების ცენტრის კი_ 2500 ლარით.
საფინანსო-საბიუჯეტო სამსახურის უფროსის თქმით, ზემოაღნიშნული ხარჯების დასაფინანსებლად დამატებითი ღირებულების გეგმიდან 390 800 ლარი, ხოლო 314 200 ლარი _ ჯარიმების, საურავებისა და სანქციების გაზრდის ხარჯზე მიიმართება.
[sexy_author_bio]
