Jamnews აქვეყნებს სტატიას ბონდო აჩბას საქმისა და აფხაზეთში კორუფციის შესახებ.
უჩვეულო მოვლენა აფხაზეთში – აქ პირველად დაიჭირეს მსხვილი ჩინოვნიკი კორუფციის გამო. მაგრამ საზოგადოებაში აგრძელებენ კამათს იმის შესახებ, ხომ არ აუარა ბრალდებამ გვერდი მთავარ მოქმედ პირებს. აქტიურად განიხილება ვერსია, რომ მოპარული ფული პროსახელისუფლებო წინასაარჩევნო კამპანიისთვის გამოიყენეს.
2021 წლის 5 მაისს, კომპანია „აფხაზავტოდორის“ ხელმძღვანელს, ბორის (ბონდო) აჩბას შვიდი წლით თავისუფლების აღკვეთა და ქონების კონფისკაცია მიუსაჯეს 20 მილიონი რუბლის (დაახლოებით 270 ათასი დოლარის) მითვისებისათვის, რომელიც გამოყოფილი იყო ხიდების გასარემონტებლად.
ბონდო (პასპორტით ბორისი, მაგრამ ასე მას მხოლოდ სისხლის სამართლის საქმის მასალებში მოიხსენიებდნენ) 65 წლისაა, განათლებით საავტომობილო გზების ინჟინერ-მშენებელია და ფაქტობრივად მთელი ცხოვრება პროფესიით მუშაობდა სახელმწიფო სამსახურში. ის აფხაზეთის ომის ვეტერანია, დაჯილდოებულია მედლით „მამაცობისთვის“ და ორი შვილის მამაა.
2007 წელს ბონდო აჩბა უკვე გაეხვია კორუფციულ სკანდალში. მაშინ გეგმური შემოწმება ჩატარდა დედაქალაქის ადმინისტრაციაში, სადაც იმ დროს აჩბა მუშაობდა და გამოვლინდა 24 მილიონი რუბლის (დაახლოებით 320 ათასი დოლარი) მიტაცება. ის დააკავეს კიდეც მერიის სხვა თანამშრომელთან – კონსტანტინე ტუჟბასთან ერთად. მაშინ ყველაფერი პირობითი სასჯელით დასრულდა.
2016 წელს აჩბას სახელმწიფო კომპანია „აფხაზავტოდორის“ ხელმძღვანელად ნიშნავენ. მანამდე ორი წლის განმავლობაში ის იქვე მუშაობდა უფროსის მოადგილის თანამდებობაზე.
საქმის არსი
ბონდო აჩბას წინააღმდეგ საქმე 2020 წლის ივნისში აღიძრა თაღლითობის მუხლით – მოტყუების გზით სხვისი ქონების მიტაცების გამო.
გამოძიების ვერსიით, 2017 წლის თებერვალში, ბონდო აჩბამ წერილით მიმართა აფხაზეთის მაშინდელ პრეზიდენტს, რაულ ხაჯიმბას, რომელშიც შეიტანა სიმართლესთან შეუსაბამო ცნობები სტიქიური უბედურების შედეგების აღმოფხვრის აუცილებლობის შესახებ.
მიზეზად დაასახელა წყალდიდობები, რომელსაც თითქოს ადგილი ჰქონდა 2016 წლის ოქტომბერ-ნოემბერსა და 2017 წლის იანვარ-თებერვალში გუდაუთის რაიონში, მდინარეების ხიპსტასა და ააპსტას ნაპირებზე.
იმისათვის, რომ დაერწმუნებინა პრეზიდენტის ფონდი თანხების გამოყოფაში და, რაც მთავარია, მათ მიღებაში, გამოძიების ვერსიით, ბონდო აჩბამ შეადგინა ყალბი კონტრაქტი და საპროექტო-სახარჯთაღრიცხვო დოკუმენტაცია, თითქოსდა 20 მილიონი რუბლის (დაახლოებით 270 ათასი დოლარის) მოცულობის აუცილებელი სარემონტო სამუშაოების შესასრულებლად.
შემდეგ მან შეთანხმება გააფორმა კომპანიასთან, რომლის დამფუძნებელიც – ფიქტიური პიროვნებაა და მითითებული თანხა გადაურიცხა. ამის მერე ყალბი საბუთები მომზადდა შესრულებული სამუშაოების შესახებ და თანხები ამ კომპანიის ანგარიშიდან მოიხსნა.
ბრალდების მხარის არგუმენტები და დაცვის პროტესტი
საქმის განხილვა 2020 წლის დეკემბერში დაიწყო. მოწმის სახით ფიგურირებდა ექსპრეზიდენტი რაულ ხაჯიმბა.
დაცვა
განსასჯელის ადვოკატი ინგა გაბილია ბორის აჩბას სრულ უდანაშაულობას ამტკიცებდა. ის აცხადებდა, რომ სამუშაო ჩატარდა, რისი დამადასტურებელი დოკუმენტებიც არსებობდა. მტკიცებულებები მოიცავდა აჩბას ჩვენებას, ექსპრეზიდენტის გამოკითხვასა და სასამართლოს უარს დოკუმენტებში აღნიშნული ობიექტებისა და მდინარეების მდგომარეობის შესახებ ექსპერტიზის ჩატარებაზე.
ექსპრეზიდენტმა რაულ ხაჯიმბამ მხარი დაუჭირა დაცვის ყველა მტკიცებულებას. მან თქვა, რომ მდინარის პირას არსებული მდგომარეობის შესახებ თხოვნით ნამდვილად მიმართეს ადგილობრივი სოფლების მცხოვრებლებმა და შესრულებული სამუშაოს შედეგები საკუთარი თვალით ნახა, მას ბონდო აჩბას წესიერებაში ეჭვი არ ეპარება.
ბრალდება
თუმცა, ბრალდება ამტკიცებდა, რომ სამუშაო არ ჩატარებულა. მოწმედ გამოვიდნენ სოფლების ააპსტასა და ხიპსტას მცხოვრებლები, რომლებსაც არც ხიდებთან დაკავშირებული რაიმე პრობლემა ახსოვთ და არც რაიმე სამუშაოების წარმოება.
უფრო მეტიც, ბრალდება ამტკიცებდა, რომ ის კომპანია „იუგსტროიკომპლექტი“, რომელთანაც „აფხაზავტოდორმა“ მოაწერა ხელი შეთანხმებას სამუშაოების შესრულებაზე – ნახევრად მითიური ორგანიზაციაა. მისი დამფუძნებლის, რუსეთის მოქალაქის, გვარად ფილიმონოვის მოძებნა ვერ მოხერხდა. მისი პასპორტი ყალბი აღმოჩნდა, საზღვარი კი ასეთ პიროვნებას არასოდეს გადაუკვეთავს.
დაცვა
თუმცა, ადვოკატი ამტკიცებდა, რომ შესრულებული სამუშაოების შესახებ დოკუმენტების ფიქტიურობა არ დადასტურებულა. კომპანია „იუგსტროიკომპლექტი“ კი აფხაზეთში 2014 წლიდან მუშაობს და რამდენიმე სამშენებლო ხელშეკრულება ყოველგვარი სარჩელის გარეშე დაასრულა.
გარდა ამისა, ვინაიდან გამოძიებამ ვერ მოახერხა დამფუძნებელი ფილიმონოვის პიროვნების დადგენა – ეს იმას ნიშნავს, რომ შეთქმულების ფაქტიც არ არის დადასტურებული, ამტკიცებდა გაბილაია.
თავად ბონდო აჩბა სრულიად უარყოფდა ბრალდებას და ამტკიცებდა, რომ მთელი პროცესი – პოლიტიკური ანგარიშსწორებაა.
მას შვიდი წლით თავისუფლების აღკვეთა მიუსაჯეს და ეს წელიწად-ნახევრით ნაკლებია იმაზე, რასაც პროკურატურა ითხოვდა. ადვოკატმა გაბილიამ მაშინვე განაცხადა, რომ ამ გადაწყვეტილებას გაასაჩივრებდა.
მიტაცება საარჩევნო ხარჯების დასაფარად?
საზოგადოებაში ბევრ ვერსიას განიხილავენ, მაგრამ იმის, რომ ბონდო აჩბამ ერთპიროვნულად მოიპარა პრეზიდენტის ფონდიდან 20 მილიონი რუბლი, მხოლოდ სასამართლოს სჯერა.
ყავახანებსა და სამზარეულოებში აბსოლუტურად სხვა ვერსიას განიხილავენ.
2017 წლის მარტში, ხიდების რემონტის აუცილებლობის შესახებ აჩბას მიერ ხაჯიმბასთვის ახლა უკვე ცნობილი წერილის გაგზავნიდან ერთ თვეში, აფხაზეთში საპარლამენტო არჩევნები ტარდებოდა.
როგორც ყოველთვის, წინასაარჩევნოდ ხელისუფლება გააქტიურდა და მოსახლეობის მხარდაჭერის მოპოვებაზე მუშაობდა: შეიცვალა ძველი ბოძები, აშენდა და აღდგა ხიდები, გარემონტდა გზები, სადღაც კი ტელევიზორები და სარეცხი მანქანებიც იყიდეს.
საზოგადოებაში პოპულარული ვერსიის თანახმად, პრეზიდენტის ფონდიდან მიღებული ფული იმ მომენტში სწორედ პროსახელისუფლებო კანდიდატის წინასაარჩევნო კამპანიაში ჩაეშვა. თავად ბონდომ კი, ისევ და ისევ სოხუმის ყავახანების ვერსიით, საერთო თანხიდან მხოლოდ 3% მიიღო.
ქალაქური ლეგენდაა ეს თუ მოვლენების ალტერნატიული ვარიანტი, რომელსაც საფუძველი გააჩნია, ამის გარკვევა ჯერჯერობით საეჭვოა მოხერხდეს.
P.S.
2017 წლის მარტში, ხიდების რემონტის აუცილებლობის შესახებ აჩბას მიერ ხაჯიმბასთვის ახლა უკვე ცნობილი წერილის გაგზავნიდან ერთ თვეში, აფხაზეთში საპარლამენტო არჩევნები ტარდებოდა.
როგორც ყოველთვის, წინასაარჩევნოდ ხელისუფლება გააქტიურდა და მოსახლეობის მხარდაჭერის მოპოვებაზე მუშაობდა: შეიცვალა ძველი ბოძები, აშენდა და აღდგა ხიდები, გარემონტდა გზები, სადღაც კი ტელევიზორები და სარეცხი მანქანებიც იყიდეს.
საზოგადოებაში პოპულარული ვერსიის თანახმად, პრეზიდენტის ფონდიდან მიღებული ფული იმ მომენტში სწორედ პროსახელისუფლებო კანდიდატის წინასაარჩევნო კამპანიაში ჩაეშვა. თავად ბონდომ კი, ისევ და ისევ სოხუმის ყავახანების ვერსიით, საერთო თანხიდან მხოლოდ 3% მიიღო.
ქალაქური ლეგენდაა ეს თუ მოვლენების ალტერნატიული ვარიანტი, რომელსაც საფუძველი გააჩნია, ამის გარკვევა ჯერჯერობით საეჭვოა მოხერხდეს.
JAMnews-ის მასალებში გამოყენებული ტერმინები და ტოპონიმები, ასევე მოსაზრებები და იდეები, გამოხატავს მხოლოდ კონკრეტული მასალის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას.
